KellyChu - 紅花嶺郊野公園開放迎行山客 | Executive日記

Kelly好開心香港又多一個郊遊好去處！漁護署昨日宣布成立紅花嶺郊野公園，紅花嶺郊野公園位於沙頭角，北面與深圳梧桐山風景區嘅山脈相連，山上有唔少屬高保育價值嘅物種，以及1940年代嘅礦洞，目前已經有兩條郊遊徑開放大家去遠足。

　　隨着沙頭角近年逐步開放更多區域予市民遊客參觀，政府都積極推動當地深度遊，昨日宣布新成立嘅紅花嶺郊野公園，係香港第25個郊野公園，面積約530公頃，自然生境包括次生林、灌木及高地草原，生物多樣性豐富，當中更有唔少屬高保育價值嘅物種，例如紅杜鵑、土沉香、大草鶯及灰伏翼。

　　漁護署發言人仲話，郊野公園內有曾生產方鉛礦嘅礦洞，係本港1940年代最大規模嘅採礦系統之一，提供咗獨特嘅人文景觀。礦洞現正進行活化工程，之後會變成一個開放式博物館，讓公眾了解當地嘅採礦歷史同蝙蝠生態，工程預計年底完成。

　　目前已開放嘅兩條郊遊徑，分別係紅花嶺郊遊徑及蓮麻坑郊遊徑，入口分別位於沙頭角山咀和蓮麻坑村。紅花嶺郊野公園位置偏遠，山勢崎嶇，沿兩條郊遊徑遊覽，需步行約4至5小時，要評估好體力同天氣先好出發行山呀。

　　漁護署亦正同深圳市梧桐山風景區管理處共同制定工作計劃，包括資訊交流、專項研究、改善生態廊道嘅質量，以形成更大範圍嘅連續生境，促進港深兩地生態融合。
KellyChu