KellyChu - 饒宗頤學術館展出大師藏品 | Executive日記

已故國學大師饒宗頤教授畢生醉心學術研究，走遍大江南北甚至海外多個國家鑽研中華文化，其捐出嘅書籍、書畫、筆記、手稿等文物，現藏於香港大學饒宗頤學術館。小妹昨日到館一遊，認識到大師豐富嘅學問成就，實在大開眼界。

　　饒宗頤學術館位於香港大學鄧志昂中文學院，該幢建築喺1931年9月28日落成，歷史悠久。由於饒教授生前曾於港大中文系任教長達16年，因此港大就將呢幢昔日嘅中文學院，用作收藏大師嘅作品。

　　地下展覽廳會定期選取不同主題，展示饒教授捐贈嘅各類藏品，今期展出嘅藏品有甲骨文書寫畫（見圖）、水墨畫等，以及明朝嘅古琴書籍《伯牙心法》，據說呢本書係饒教授喺貝魯特與荷蘭漢學家高羅佩相見時，獲對方所贈。

　　饒教授捐出4萬本書籍給學術館，其中館內嘅「選堂文庫」就藏有古籍約700餘種，但公眾要向館方預先申請先可閱讀。

　　饒宗頤學術館一般只於平日開放，但3月23日及4月6日兩個星期六，就特別開放公眾參觀，有興趣嘅讀者可以上網登記：Bit.ly/435b6sT。

KellyChu