Jacky哥 - 煤氣公司都有研發部，其實有咩做？ | 企業熱話

　　企業如果想持續發展，創新研發必不可少！最近聽煤氣公司總經理──住宅產品及品質監控李浩良（Ivan）分享，知道煤氣公司總部有個展館，展出員工發明嘅設備，而公司仲有個研發部。原來唔少人用緊嘅煤氣智慧爐具，都係Ivan同佢同事嘅心血結晶。

　　喺煤氣公司工作超過30年嘅Ivan，曾經喺負責定期安全檢查計劃嘅部門做嘢。佢話，1995年煤氣公司想幫每家每戶做安檢，但當時喺香港冇其他燃氣公司嘅定期安檢先例可以參考。嗰陣政府訂咗每三年（即36個月）為用戶換一次煤氣膠喉，以防喉管老化漏煤氣；而煤氣公司嘅先導計劃就發現成功入屋檢查比率大約50%。Ivan因為呢兩個數，得出36除以2，即係每18個月上門為用戶做安檢，後來政府都向氣體裝置用戶提出相關安檢建議。

研發產品方便用戶、保障安全

　　Ivan話，呢個經歷同煤氣公司研發部一樣，經常要喺無先例可循下，諗諗有咩方法令產品更安全、環保。以煤氣錶為例，2002年後落成嘅樓，煤氣管道舖晒訊號線連接煤氣錶，煤氣公司可以遙距讀取度數；針對未有訊號線嘅舊樓，Ivan嘅部門就研發「智能報錶系統」，將智能讀錶器加喺舊款煤氣錶，住戶用手機程式或WiFi就讀到度數，尤其方便老人家唔駛擒高擒低讀錶。

　　佢仲話，因為新錶讀數可以隨時傳返公司，煤氣同事就研究點樣透過數據去偵測一啲問題，加強保障家居安全。於是，佢哋設計咗有內置閥門嘅智能錶，當偵測到住宅用戶用氣量突然颷升並超過正常水平、煤氣錶24小時都檢測到用氣，或用戶長期未做安檢，智能錶會閂咗閥門暫停供氣，繼而煤氣公司收到通知並派員上門檢查，確保安全就恢復供氣。

十年磨一劍  全靠部門夙夜匪懈

　　咁研發部係咪要定期「交貨」呢？Ivan話，佢哋部門同事喺辦公室一日半日冇咩成果影響唔大，但半年無產出就唔得啦！所以佢成日鼓勵同事多啲諗新嘢同點樣完善每個細節，袋定啲橋，有機會就向同事同管理層介紹！佢話一般嚟講，同事嘅創新概念經過測試、認證、生產，要一年至18個月先可以成為產品推出市場。
Jacky哥