古星輝 - 5G寬頻開拓海上覆蓋 | 乜都5G

落咗好多個禮拜雨，終於見到陽光！嚟緊幾個月都係釣墨魚、遊船河、開海上派對嘅季節，好多人都會出海，依家大家可以邊玩邊體驗海上5G極速網絡！

　　記得以前讀書嘅時候，教科書會用「水深港闊」來形容香港，因着這得天獨厚嘅條件，奠定咗當時轉口港嘅地位。時至今日，我哋已經成為國際航運中心，講緊發展海洋經濟，即係建基於海洋嘅經濟活動，例如航運、漁業、養殖業及海上旅遊等。

　　事實上，全國海岸線最長、超過4000公里嘅廣東省，已經成功做到5G沿海全覆蓋。佢哋喺海上構建5G網絡，開拓5G養殖場、5G海上風力發電等，為海洋經濟注入動力！

採嶄新技術提升通訊質素

　　近在香港，我哋亦一直致力開拓5G海上覆蓋及應用。喺基建方面，早於去年，公司已特別喺香港仔至西貢沿岸，即西環、鴨脷洲、赤柱及鶴嘴對開海面，升級流動通訊設備，並配合700兆赫頻譜嘅應用，提升傳輸速度及穩定性，大大提升海上5G覆蓋，為客戶打造極致嘅海上通訊體驗。我哋同時亦利用咗嶄新嘅e-MIMO Pro技術，減低海上嘅電波干擾，進一步提升海上通訊質素。

　　喺加強咗5G海上覆蓋後，我哋隨即有「海上特工隊」嘅同事，專責向遊艇船主，以及漁船及躉船用家推介5G寬頻。佢哋為咗要見客戶一面，日日喺凌晨周遊鯉魚門、油塘、香港仔一帶。最難得係，聽啲用家講，冇諗過出咗海都有5G高速上網，可以睇片、直播同打機，喺船上工作有番啲娛樂好開心。

　　另一方面，喺海上收到5G，航行時多咗一個與外界保持聯絡嘅途徑，有咩事都可以搵人幫手，有助提升安全。

　　對於提升用戶喺海上使用5G嘅體驗，我哋從來都勇於嘗試。大家可能仲記得我哋喺香港啱啱復常嘅時候，成功舉辦全港首個海上郵輪5G高清直播音樂會。當時大家都好緊張，因為海域廣闊，要確保訊號清晰，實在有難度。而我哋憑着勇於創新嘅態度，成就咗嶄新嘅海上5G直播，實在令人自豪！未來要打造智慧海港，指日可待。

和記電訊香港執行董事及行政總裁
古星輝