KellyChu - 環地中海賽豪奪7金1銀 何詩蓓摩納哥度假look靚爆鏡 | Executive日記

香港「女飛魚」何詩蓓於環地中海游泳系列賽游出好成績，周日喺最後一站摩納哥以52秒72於100米自由泳奪冠，連續三站稱霸此項目，包攬7金1銀。詩蓓仲喺IG分享摩納哥靚景，一身長裙度假打扮，加上甜美笑容，靚爆鏡。Kelly認為，詩蓓正面樂觀嘅心態，都係佢成功嘅因素之一。

　　環地中海游泳系列賽上星期起，先後於法國魯西永地區卡內、西班牙巴塞隆拿及摩納哥展開，詩蓓狀態大勇，首日已分別喺女子100米蛙泳及主項200米自由泳贏得雙金，次日轉戰100米自由泳，以1秒優勢力壓荷蘭好手奪冠，於法國首站贏得3面金牌。

　　去到第二站巴塞隆拿，詩蓓繼續強勢，同樣輕鬆摘下100米及200米自由泳金牌，摩納哥煞科日，詩蓓先喺200自以近4秒差距拋離對手封后，連續3站奪金，翌日出戰100自同樣戰無不勝，先喺初賽以54秒77晉級，及後再於決賽游出52秒72，締造三連霸，總結三站豪取7金1銀謝幕。

　　詩蓓心情靚靚，喺IG新reels同網民分享賽後休閒時光，畫面先係着泳衣同拎起港隊泳帽嘅詩蓓，畫風一轉換咗套雪紡長裙，喺黃昏時份嘅摩納哥碼頭散步。

　　作為Chanel代言人，詩蓓一向將佢哋嘅產品carry得好好，手拎馬卡龍藍色小廢包，穿上黑白尖頭高跟鞋，配以招牌甜美笑容示人，好有氣質！雖然詩蓓擁有運動員嘅健碩身形，但淑女風打扮對佢嚟講都無難度，真係又靚女又叻女呀。

KellyChu