KellyChu - 掛8號波前菜檔大減價避風 市民晒戰利品：20蚊有7kg | Executive日記

　　超強颱風「摩羯」旋風式襲港，前日天文台一早預告晚上6點20分將掛8號風球，市民就趁打風前買定糧食返屋企煮飯，菜檔亦趁機清貨，以免風雨來襲時損失慘重。有大埔街坊分享，自己只係用咗20蚊就買到7公斤多，當中包括薑、馬蹄、番薯、粟米同埋青瓜，滿載而歸！

　　呢位街坊寫道：「所有嘢加埋20蚊，有7點幾kg重，人生第一次用20蚊買咗咁多嘢。」佢表示，當時菜檔就係賣剩咁多嘢，所以以20蚊賣出後檔主就可以快啲收工。

　　帖文吸引唔少街坊讚好和留言，有街坊亦分享指自己用20蚊買咗3兜生果。由於打風時啲菜賣唔晒都係唔留得，所以打風前夕啲菜係最平，不過打完風之後就貴喇。

　　亦有網民發文稱，超級市場啲蔬菜幾乎被搶購一空，貨架上只剩低零星幾款商品，笑言：「每次打風就覺得香港人特別鍾意食菜」。不過都有部分菜式係無人問津，貨架上仍有價錢較貴嘅沙律菜，西芹、紅蘿蔔及部分瓜果類，呢啲似乎就唔太啱港人口味。

　　此外，有菜攤負責人表示，打風前當天生意比平時好，客流量增加約一半，商品價格稍微上漲，進貨量亦都比平時多，預計打完風之後生意會比較清淡，因為大家已經買晒菜了。

KellyChu