KellyChu - 阿Jack怪誕大餐食得又睇得 迪士尼「惡人」萬聖節邀你「瘋」騷共舞 | Executive日記

下個月就迎嚟扮鬼扮馬嘅萬聖節，香港迪士尼樂園已準備咗一連串驚喜體驗，其中「惡人大宅舞會」邀請大家一齊cat walk共舞，以及同阿Jack、莎莉享用滋味怪誕餐，更有機會喺園內目睹多個正邪角色同時登場。小妹日前變身鬼馬Kelly，率先投入呢場精彩Halloween Time。

　　迪士尼第2年舉辦「惡人大宅舞會」，今年加入新元素，喺表演開始前邀請大家行cat walk，一齊跳舞熱身。全新原創「惡」曲《House of De Vil-lains》為呢場「瘋」騷時尚舞會拉開序幕，時尚女魔頭庫伊拉與一眾惡人手下，以一身「衣」不驚人誓不休造型霸氣登場，《白雪公主》入面嘅邪惡皇后，以及《愛麗絲夢遊仙境》嘅紅心皇后亦難得現身！

　　另一場喺原野劇場上演嘅得獎歌舞匯演「惡人舞動迪士尼」，首先有魔術表演為大家暖場，然後多個反派角色包括海女巫烏蘇拉、巫師霍博士、黑魔后、嘉芙夫人和加斯頓，亦喺舞台上大肆作惡，以歌舞迷惑觀眾，帶領走入迪士尼故事中嘅經典暗黑劇情，好過癮。

　　河景餐廳嘅阿Jack怪誕大餐食到Kelly舔舔脷，加入惹味醬汁嘅豐盛扒餐，配以南瓜、烤焗紫薯等多款蔬菜，非常Halloween。同場仲有南瓜王阿Jack和女伴莎莉、布袋鬼Oogie Boogie，以及一眾怪誕城村民近距離互動用餐，更添歡樂滋味。

　　萬聖節期間嘅花車巡遊表演「米奇Halloween玩轉大街派對」，有《灰姑娘》邪惡後母杜明尼夫人攜同2位女兒，於美國小鎮大街物色心儀對象，佢哋大搶「瘋」頭後，登上巨型南瓜車，同米奇、Duffy、ShellieMay等人氣角色出巡狂歡，反轉香港迪士尼！

KellyChu