食戒

作為一個孕婦，自問都算好乖，起碼無食雪糕、無飲茶、咖啡，亦很偶然才飲汽水，凍飲亦都是幾日才飲一次，每次都必定要少冰、少甜。甜品都好少食，熱氣野亦是間唔中才一次，但亦是一件起兩件止。

最重要是之前做過食物敏感測試，即使大肚都盡量避免那些致敏原，所以奶、蛋、芝麻呢類凡係大肚婆都食的食物，我都要戒！為咗避免BB唔夠蛋白質、鈣質，我唯有靠高鈣豆漿、鈣片、豆類食品，如芽菜或大豆芽嚟補充番。點知呢兩個月濕疹又再發作，每到夜晚都又痕又熱，好似出風癩咁。於是去咗睇中醫，希望搞搞佢，中醫師問我係咪食咗海鮮或熱氣野，我心諗，係都只係一兩件，唔會咁嚴重啩！

中醫師要我將一日五餐的食物記錄下嚟，希望可以找出元兇！但係結果真係好鬼洩氣，因為中醫睇完我個食物清單後，佢話濕疹同熱、濕、毒有關，而高蛋白質亦是致敏原，基本上我每日所食的食物都有令濕疹惡化的元素，佢打圈的食物包括：

豆漿、燕窩、芽菜、洋蔥、冬菇、牛肉、鴨肉、叉燒、燒肉、蝦餃、雲吞、雞批、椰撻、大豆芽、魚柳包、梳打餅、煙三文魚薄餅、榨菜肉絲、花膠、草菇........

不如講番無問題的食物，就係魚腩粥、蒸腸粉、士多啤梨、西梅、西芹雞柳、木瓜雪耳湯、白飯、五色飯、番茄肉碎、雜菜湯、鹹菜排骨湯飯、菜肉包、蒸排骨飯、生菜魚肉、魚餃通粉、魚蛋米粉、提子麥包、藕片炒豬肉、紫菜五寶麵。

以上係我一個月，每日五餐之中，被選為可以食用的食物，在未來的日子，我就要睇住呢張清單，重覆又重覆咁食以上10幾樣野！為咗寶寶、為咗自己，唯有忍、忍、忍！