供求決定價格

    投資第一步係學睇供求，因為價格係由供求決定，多人爭既野，會出現供不應求，價錢一定會被搶高；相反，冇人要既野，就會供過於求，價錢就好難升，呢個現象隨處可見。

    價格會因為供應過多而下跌，以人力市場為例，如果將工種簡單分為兩類，第一類係要有專業技能既工作(食腦工作，例如醫生)，第二類係「手板眼見功夫」，咩人都可以做既工作(食力工作，例如清潔/保安)，前者既價格(即人工)，一定高過後者，現時入境處每日批准150個大陸移民來港定居，一年就係54,750人，十年就係54萬人，佔現時香港勞動人口360萬既15%，呢批新移民係香港搵野做，佢地可以做既，就係第二類工種，大量供應令工資停滯不前，小弟現職亦係第二類工作，咩人都做得，小弟做了七年的工作，一位fresh graduate唔使兩個月已經上手，人工平3成，小弟冇條件同老闆講：「你唔加我人工，我走架！」，因為小弟一走，好快就可以找到另一位更平既人補上，所以毫無議價能力，就算公司唔加人工，都唔一定會想走，尋日陸sir話，大陸每年有500萬大學生畢業(全港人口都只係700萬)，仲係收緊每月1千幾蚊人工，老實講，實在唔覺得自己值咁高人工。

    價格又會因為供應有限而上升，例如房地產，房地產一直以來，都係有錢人賺大錢，同埋「泊」錢既地方，係日本有「賺錢之神」既邱永漢話，只要每個月將所有收入，用哂去買地皮，咩價都買，只買不賣就可以致富，即長線地皮一定升，房地產既價值來自地皮加建築成本，地皮升樓價亦會升，睇地圖最清楚，成個香港島中間大部分都係山，只係靠邊邊部分起樓，可以供應起樓既平地極之有限。前前財政司長梁錦松係03年，有幾間清/淺水灣豪宅，樓價最低既時候話，只要捱得過，樓價一定可以升返上去，一位咁「坦蕩」既人講既野，唔信九成都要信七成，因為樓價靠租金支持，租金長線因通脹上升，樓價亦然。

    如果可以搵到一樣野，佢既供應有限，而需求就與日俱增，呢樣野既價格就會長期看升，就可以買來投資。