貓私語——禁室培育

2009/01/09 00:00:00 網誌分類: 寫作

09 Jan

自從有了睡房門，貓就沒再跟我一起睡，米米和小襪，也因此習慣了不太黏住主人，抱多過十秒，已不耐煩。骰仔到埗後，又想牠黏我多一些，於是試試讓牠跟我睡。

最初個多星期，牠只懂在牀尾行來行去，或捲縮在角落，不過，好快牠已曉得鑽進主人臂彎中睡，更發現主人的頭頂是最暖的地方，現在我晚晚好似戴Headphone般，趕牠走都不行。看來找尋屋子裏最舒適的地方，是貓的本能呢。

行為上亦見證着骰仔的改變，牠由最初比較怕人捉、怕人抱，到現在一叫牠就來，還會用頭大力揩擦我的手。

原來貓BB愉快的童年，是真會影響牠和人的關係，人對貓好，貓會一百倍還給你。只是牠可能太愉快了，發出的呼嚕呼嚕聲愈來愈大，還有牠愛在夜裏醒來曉我的頭踱步，一晚被牠弄醒幾次……骰仔的愉快生活，可是建築在主人的睡眠不足上呢。

回應 (24)

我要發表

2009/01/13 18:58:19 回覆

Cat cat,

我都唔係太記得, 因為實在買過太多牌子, 只係獸醫度有得買, 我諗住應該冇事掛, 我同你一樣, 妹妹走咗之後俾咗其他D 貓食,佢哋又食喎, 不過可能個個唔同.

唔好意思, Caroline, 或者好似cat cat 話齋, 妳考慮吓先啦 ! 唔係好似我咁放到成雪櫃都係, 其他嗰 d 都食唔晒 ! 芝麻糊個肚仔就唔得閒啦 !

關慧玲 2009/01/13 17:23:41 回覆

其實貓貓最鐘意還是主人的體溫，隻疊隻咁堆埋來，真係好有趣，朝早起身返工，佢哋一副「咁早呀」的表情。唉，我都唔想起身呀。

2009/01/13 16:14:43 回覆

Sinsinho,

我唔知你講嗰隻糧係咩牌子, 我波波出事嗰陣醫生都叫我比呢種佢食, 佢話係高營養糧-Hills, 唔知你嗰隻同唔同function, 我買咗幾罐, 但佢一啲都唔食, 波波走咗之後, 我比蕃薯仔食, 隻"食物焚化爐"都係唔食, 其他貓都係, 最後我全部送晒比其他養貓人, 佢哋都話隻愛貓都唔食, 所以Caroline你可能要考慮吓買唔買比佢食, 費事佢到時討厭食嘢~

提外話, 講開鮑魚, 張玉姍之前有隻貓, 有一次食鮑魚佢比咗啲隻貓食, 隻貓非常鍾意食, 仲要餐餐食, 唔比佢食就咬人, 因為佢太惡, 最後要將佢送咗比人~ {#icon4}

Caroline, 我驚會食窮你都唔掂~ {#icon8}

2009/01/13 13:26:03 回覆

Caroline,

其實寵物店有 D 寵物專用嘅電暖毯, 我舊年都買咗一張, 可以連續開幾日, 都安全嘅, 如果見佢哋落晒地玩, 食嘢時就關一, 兩個小時, 我日頭返咗工都開著俾佢哋瞓覺, 費事佢哋凍親. 有時放工見佢哋幾個迫埋一齊瞓, 睡眼惺忪個樣好得意, 不過有一個就唔夠位瞓, 唯有瞓個 BB 睡袋. 妳只有兩個貓, 應該冇問題, 除非佢哋唔夾啦 ! 唉 ! 我做到散晒放工返嚟成班大帝都重未起床 !

2009/01/12 23:01:33 回覆

大家好呀，

多謝大家既支持，我同亞 B 一定會繼續努力架啦！

CatCat，我有時會覺得亞 B 係特登要我餵先肯食多 D 架，如果係真既，我都會好開心架，起碼唔係有乜唔舒服而係因為佢嗲我先咁啫！有次我同我朋友講，如果亞 B 有一日開口同我講，話要餐餐食鮑魚，我估我都會比同食架！

Sinsinho，月頭覆診時我都有問過醫生架，佢話亞 B 依家都總算是肯食野(計埋我餵既)，都算 OK，起碼唔駛再吊鹽水，佢仲話比佢慢慢肥番，千其唔好肥得咁快喎！唯有我辛苦 d 啦！

其實當我用針筒餵佢時，佢一次都可以食到半罐 "三才" 架，我唔知算唔算多定少呢！因我亞 B 同芝麻糊由細到大都係食乾糧 "自助餐" 架！

呢排真係好凍，日間無人响屋企我唔感長開暖爐比佢地，但我就專登留咗張棉被比，等佢地可以自己躲在裡面暖 D，早兩日我唔駛返公司响屋企做野，到下午成四點幾先見芝麻糊起身食野咋！......我就做到天昏地暗，佢就....我都好想好似咁佢呀！

關慧玲 2009/01/12 19:08:49 回覆

caroline,

記得開少少暖氣俾阿b，天氣凍佢食咁少嘢，驚佢抵抗力唔夠冷病。我家幾隻都在打噴嚏呢。

2009/01/12 19:05:01 回覆

Caroline,

有一隻罐頭係醫生配方, 叫Recovery, 好似專供唔舒服貓狗食用, 重有Cat cat 上次個方法呢 ?有冇試過 ? 阿 B 唔肯食嘢醫生有冇好提議 ? 都成三個星期, 天氣又凍咗, 重係食得咁少怕唔怕唔夠營養 ? 盡力吧 !!可幸你俾咁多愛佢, 佢會知嘅 !

阿 B , 媽媽咁辛苦為你, 一定要爭氣呀 ! 我好想見到你個肥肚腩, 唔要得層皮 "Fing Fing" 吓嘅! {#icon0}

2009/01/12 14:10:08 回覆

Caroline,

阿B有你呢個主人真係幸福, 佢都係想你餵佢食多D~ {#icon5}

2009/01/12 12:56:58 回覆

Caroline ﹐亞 B情況好轉﹐這消息實在可喜﹐唯是食野唔乖呢﹐好主人繼續努力呀﹐支持你﹗

2009/01/12 10:57:34 回覆

HI, 我依家都轉返用佢用開嘅木砂, 不過佢都係唔肯再用. 開大依然係地下. 我都無晒計....

依2日凍左, 就比佢上床瞓, 想叫佢瞓上D, 瞓係我手臂位啦. 點知佢唔肯, 係都要瞓係腳同大脾. 一陣唔知伸佢一腳就比佢咬.....

2009/01/12 10:57:06 回覆

Sinsinho,

係呀, 亞 B 剛剛在 3號覆咗診啦, 驗血報告話佢既肝 XX 素回復到正常水平, 而甲狀腺 XX 素則下降到非常低既數字, 醫生話可能用藥既份量太多才出現這個情況, 所以今次比既藥份量就減半, 醫生又話今次聽到亞 B 既心臟跳得好快, 所以都有比心臟藥佢食...

亞 B 依家都係唔係咁食野, 明知肚餓, 佢會喵喵咁叫你比野佢食, 但比佢佢又唔食落肚, 以為 d 貓糧唔啱佢胃口啦, 試過一次過放四種不同味道啦, 點知佢都係啋你都傻…..佢明知自己肚餓都唔肯食…唉 ! 咁都唔係辦法, 唯有日日用針筒餵比佢食啦, 咁佢又食喎, 真係唔明 ! 下星期又足三個星期, 到時覆診再驗血睇下點先算啦 !

2009/01/10 10:58:08 回覆

Caroline,

妳為咗照顧阿B, 甘心同妳先生做 "廳長", 我真係好感動! 最難得連妳先生都咁體諒 , 真係一個好主人的榜樣 {#icon69} 想起妹妹走之前我都係咁 , 成晚起身睇佢, 淨係識喊, 雖然我知道幫唔到佢....., 當然, 這都已是過去了.... {#icon57} , 我衷心希望阿B 能夠健健康康同妳哋一齊過新年, 係呢, 阿B 好似差唔多時間覆診喎, 呢排係咪好D 啦 ?

關慧玲 2009/01/09 23:43:13 回覆

哈哈，原來大家都係愛貓愛到無覺好瞓，貓寄居你們的家，真幸福呢。第時投胎，都要投去你們的家呀。 {#icon26}

2009/01/09 23:06:09 回覆

哈哈！大家好！

講到瞓覺，以前亞 B 和芝麻糊都會入房和我們一齊瞓的，但自從搬咗屋之後，因睡房內的衣櫃是無門的，雖則內裡並唔係 D 乜靚衫，但總要返工見人麻，所以唯有給她們睡書房啦。

自亞 B 病咗之後，我想有多些時間陪她，留意她的情況，我和我先生都搬到廳裡和她們睡。因我是側睡，S 形狀，亞 B 會睡在我的手臂灣內，而芝麻糊則會睡在我 pat pat對落，但如果你一轉身，芝麻糊會即刻咬你叫你唔好亂咁動呢！

依家天寒地凍，都好想返上張床度瞓，但一想到亞 B還未痊癒，我倆都不捨得入房瞓呢！

2009/01/09 22:32:42 回覆

我果三隻貓自從知道張床可以上得後,就無論冬天夏天都"戀上我的床"! 平日最愛在床上午睡,夜晚就會輪流睡在我們的枕頭中間,頭頂,心口. 雖然搞到我冇覺好訓,但又唔捨得趕佢哋走,結果我仲癲到整埋道"貓貓專用門"喺睡房,等佢哋夏天都可以一齊涼冷氣,我哋又唔怕走冷氣. 依家已經慣晒,仲發現如果冇貓一齊睡果晚會若有所失咁...

2009/01/09 15:49:36 回覆

哈哈~原來大家啲貓大爺都係一模一樣!!! {#icon1}

2009/01/09 13:25:56 回覆

我地冬天都鍾意訓被面，令主人轉唔到身，又唔捨得推開不停發出呼嚕呼嚕聲既我地。

豹紋和黑白

2009/01/09 13:09:51 回覆

我初帶貓豬回家,係唔比跟我一起訓覺的,覺得牠會污遭﹑脫毛等等,但跟牠相處久了越親厚,就想牠時刻和我一起,包括訓覺呢。現在冬天冷,牠就痴到實,夏天太熱,我開冷氣佢唔鍾意就唔同我訓了。但我都跟妳一樣,在牠夜裏醒來也愛在我的頭身踱步或跳,都會被牠弄醒呢。丫﹗原來主人的頭頂是牠們最暖的地方,唔怪知得貓豬常訓在我頭頂和我分享一個枕頭,我都有似戴Headphone般的感覺,還聽到牠的呼吸聲。

Cat Cat,貓豬都會訓被面澤實張被,半夜就鑽入被內訓,都是又出又入,來來回回幾次呢﹗

2009/01/09 12:59:26 回覆

關小姐,

我小米又係鍾意瞓係我頭頂, 原來嗰度係最暖架 ? 你唔講我都唔知添.

Cat cat, Borgee 好似我大仔, 睡眠要求一樣, 蕃薯仔就似我 Joey 豬, 要係被面瞓, 唔好話拉被, 轉身都轉唔到. 妳個垃圾桶冇蓋架 ? 佢哋只係玩啫, 不過就小心佢哋食到雞骨會整親, 小米都鍾意擔嘢架, 不過就冇 Miu Miu 咁狼, 佢淨係鍾意擔玩具同食物, Miu Miu 就連化妝袋, 書, 冷衫都嚟, 厲害 !!!! {#icon36}

關慧玲 2009/01/09 12:29:06 回覆

catcat,

近日天氣凍, 蕃薯仔先入房訓, 平時訓廳, 佢入嚟訓就要訓被面, 佢好重, 半夜凍都唔可以拉被, 都冇可能拉到張被, 又唔可以移開佢, 如果佢訓到死豬咁還好, 如果唔係佢會咬人你一嘢~ "

嘩哈哈，你的形容真係笑咗我半日，好好笑呀。諗起番薯的噸位，真係要為你這位偉大的主人鼓掌!!!!!!

關慧玲 2009/01/09 12:27:18 回覆

zesu,

我用水晶沙的，貪它無塵，有沒有試試將有牠們尿味的沙混進新沙內?貓大爺都是比較念舊的動物，環境一改就唔鍾意。其他網友有無計?

2009/01/09 11:03:17 回覆

我隻靚仔又係甘. 如果我夜瞓睇波打機, 佢就鬼殺甘鬧我, 要我去瞓. 同佢講打多陣/ 睇多陣佢又會收聲. 不過一陣見你唔瞓又再嘈過.... 唔得佢死.....

仲有, 依家咁凍唔比佢入房瞓?! 佢門都拆左你架.......

不過依家有麻煩事. 原本係用木砂比靚仔TOILET, 不過因為多塵, 整到佢成日都眼發炎. 轉過水晶砂, 紙砂, 豆腐砂佢都唔肯用. 再轉返木砂都唔掂. 佢都只係肯去小便, 大便仍然唔肯用... 有無好提議 OR 砂介紹??

2009/01/09 10:38:25 回覆

我以前隻mimi都鐘意在我頭頂訓!!

2009/01/09 10:20:02 回覆

講起睡覺...

我家Borgee每晚10點左右就會企喺房門口, 喵喵叫你入房訓覺, 仲一定要你訓, 你唔堊佢佢會走出嚟搵你, 所以大家都習慣早睡早起 {#icon2} 佢最鍾意訓喺我半邊枕頭度, 無論夏天冬天都會訓喺我隔離, 冬天還好, 有貓肉暖包, 連電熱毯都慳返~但到夏天, 唔明點解佢唔怕熱, 熱到我出晒汗都唔走, 有時都會熱醒, 激死~~