soho 的 投機/投資 心態 與 反思

                                                             2009/7/2 下午 05:22:53
                                                             網誌分類: 經濟

要冷靜面對任何波動市, 升莫喜.跌勿悲, 炒股不炒市, 候低分注吸納優質股份, 股票本質並沒有改變, 只是市場氣氛轉變了, 不要被大鱷牽著鼻子走, 不要受噪音影響, 按計劃入貨. 講番內地股市, 以中國人既賭性, 牛起上黎可以好癲, 除非阿爺打壓, 否則國內股市易升難大跌, 係大漲小回格, A + H 股血脈相連, 你真的相信港股會獨跌? 眼見A.H股差價擴闊, 國內資金會袖手旁觀嗎? 我相信 19000 / 20000 早晚必破.

                                                            2009/6/25 下午 07:02:07
                                                            網誌分類: 經濟

阻力位係俾散戶睇既, 大鱷眼中係冇阻力位既, 幾時升穿, 幾時跌破由佢話事, 大鱷畫圖真係出神入化, 信晒幅圖真係死得, 有時睇見d分析師話港股成交太少唔配合升勢, 上升有困難, 真係好可笑, 其實成交金額細更方便舞高弄低, 又話確認跌勢要清倉, 佢地竟然忘記了港股升跌係由大鱷話事,  信佢地就俾幅圖舞到暈, 所以我一直都話預早定好買入價, 到價就分注入貨, 唔好理市場既噪音.

                                                            2009/6/22 下午 07:13:43
                                                            網誌分類: 經濟

升市莫心雄, 跌市勿心慌, 世上沒有只升不跌的股市, 也沒有只跌不升的股市, 大跌市反而要冷靜面對, 睇位分注吸納優質股, 當累積已久的沽壓消除, 又是一片新天地.

                                                            2009/6/15 下午 07:44:46
                                                            網誌分類: 經濟

經濟愈差, 搵食艱難, 散戶更加熱衷於炒股, 港股連續兩天大跌, 散戶見恒指今日跌到落 17800 左右, 已經急不及待入市搏短線反彈, 有咁多支持者, 恒指真係好難跌落去 16000 樓下, 只要對股市有信心, 大跌市根本毋須恐慌, 反而係吸納既好時機, 所謂利好利淡既消息, 只係大鱷用黎舞高弄低既藉口.

                                                            2009/6/12 下午 07:22:15
                                                            網誌分類: 經濟

早前恒指首次升穿250天線話牛市重臨了, 分析師就話唔可以咁輕率, 要50天線升穿250天線才可確認, 其實呢個係滯後訊號, 慢左十拍喇!

我由四月講到今時今日都係個句, 港股大趨勢係向上, 中長線倉要候低吸納儲貨, 短線倉可以出出入入短炒, 如果你手上仲未有貨, 想買入正股, 而家既補救方法係: 將資金分成幾注, 趁每次回調分段入貨.

恒指今日收18889, 初試大位19000, 上到都唔會企得穩, 港股一支箭爆升階段已過, 現時會係反覆整固再升格局, 17500左右就要出手喇! 吼住大市, 每次恒指跌400點左右就入一注, 驚就細細注試水溫, 買一手都得, 就當月供股票, 唔好再奢望恒指會跌番落去14000樓下俾你入貨.

去年恒指插到落10676, 大家感到恐慌, 唔敢入市, 因為向下猶如黑洞, 深不可測, 現在投資環境改善, 復蘇在望, 恒指已升穿250天線, 回調落14000機會大減, 換句話說, 係知道個底係邊, 咁仲有乜好驚? 只要早作部署, 有充足心理準備迎戰, 每次跌市都係入貨既好時機.

係人都知 陸 Sir 係大淡友, 再加上佢曾經講過, 自己寫野會比較保守, 因為頭條讀者既投資水準參差, 所以用陸 Sir 定下的14000 為指標, 加 2000點 就差不多, 即係恒指16000就可以入貨, 進取一點, 17500左右出手, 唔好理佢係真牛定假牛, 細細注分段吸納, 愈跌愈買, 平均價也不會高, 如果做死硬派, 一味坐係度等14000, 萬一跌唔落就大件事, 陸 Sir 都話:  唔好俾自己在2009年過去後，整個投資倉空空如也.

~~~~~~~~~~~~~~~~~~~~~~~~~~~~~~~~~~~~~~~~~~~~

                                                            2009/5/29 下午 07:36:40
                                                            網誌分類: 經濟

港股市盈率逾16倍 (PE16), 位高勢危, 價值投資者睇見d走勢圖.技術分析.基本因素真係唔開胃, 買唔落手, 唯有繼續等港股大插, 勇者無懼, 現時既股市係投機者天堂, 恒指幾時爆上 19000 / 20000 係由大鱷話事, 千祈唔好話冇可能, 我就覺得機會好大, 而家既股市並唔係睇企業盈利, 係炒半年後經濟復蘇概念, 升幅可以好驚人, 大鱷有足夠彈藥推升港股.

雖然我認定股市大方向係向上, 但當中必定有回調整固, 好似早前恒指由17700跌番落16300, 我一早定下16500入一注補貨, 當時既股市氣氛好差, 但我按計劃入貨, 結果恒指好快拗腰上番高位, 所以凡事要作兩手準備, 股市升得急時跌得速, 要早作部署, 定下沽貨入貨策略, 收細注碼, 留起部份資金待回調時分段吸納, 便可炒得安心, 散戶既通病係高追低沽, 冇預早定下入市位, 跌市時眼光光唔敢入貨, 希望跌深d先至入, 到頭來兩手空空.

港股就算回調整固, 大方向仍是向上, 每次跌市都係入貨良機, 驚就收細注碼買一兩手, 日日驚港股大插不如做月供, 唔使睇市. 有網友話遲d會有一單比雷曼事件更嚴重既事發生, 淡友猶如打了強心針, 繼續做塘邊鶴等股市大插, 但係呢個傳言冇乜影響我既部署, 因為我早已定下沽貨入貨計劃, 睇位做野, 不會受市場既噪音所影響.

匯控 係權重股, 無論佢歐美既業務上出左乜野問題都好, 恒指要升無匯控不行, 況且能以 cdr 在國內上市及在港發人債的確係利好因素, 加上英鎊轉強, 我覺得匯控仲有上升空間, 時移世易, $40邊既供股價好難再見番喇! 6月8日匯控既比重會由20%回復至15%, 股價會有壓力, 我會睇位入貨. (#5 匯豐控股在BrandZ 2009年全球最具價值品牌的整體排行榜中，名列第30位(有說是第4位)，是金融機構類別中，品牌價值最高的國際銀行)

                                                              2009/5/8 下午 09:29:42
                                                              網誌分類: 經濟

人人都話月供股票係王道, 點解呢? 重點係不理會牛定熊, 分注吸納, 我冇做月供股票, 因為我唔想咁被動, 在每月指定某一日入貨, 我既做法係靠自己, 每個月分注買入心儀既股票當月供, 升市買少d, 跌市買多d, 大市升到乏力時我就沽出部份來鎖定利潤, 以前我唔鍾意d股票拆得太細, 每手 100 / 200 / 500, 好濕碎, 而家反而覺得少少錢就可以買到一手, 幾好呀!

策略係高位減持部份, 候低補回, 股價好多時未必跟指數走, 例如業績差或配股都可以令股價急跌, 炒股唔炒市, 太著眼於恒指某水位才入貨其實係不正確, 我就會先定下入貨價位, 到價入貨, 驚就入少d囉! 一手都得咖! 恒指係幾多點反而唔係重點, 我冇辦法知道恒指會唔會轆番落去 14000樓下, 又或者爆上20000, 唯有做兩手準備, 細細注分段吸納.  

我唔知股市會升到去邊樹先至識番 轉頭, 四月初各國齊齊出手救市, 市場恐慌情緒舒緩, 我已轉為審慎向好, 而家大市升到癲晒, 但係我在上週四.五都仍然有沽貨同入貨, 大市繼續升, 睇位沽出部份止賺, 大市掉頭向下, 我仲有好多注可以入, 16000, 15500, 14500...... 港股仍有大插的可能, 但當我知道恒指底部係邊, 我就冇有怕, 萬一恒指跌到落14000樓下, 由於我係分段入市, 平均價也不會高.

日日心慌慌望住股市, 插就驚, 升就鬧, 唔敢入市, 只會永遠做塘邊鶴, 升市應該係皆大歡喜, 而家點解咁多網友都唔開心? 一係冇貨, 一係站錯邊, 恒指13000時, 市場極度悲觀, 各大分析師估計恒指會跌穿 10000, 以現時既經濟數據來看, 機會真係好細!

~~~~~~~~~~~~~~~~~~~~~~~~~~~~~~~~~~~~~~~~~~~

                                                              2009/4/5 下午 03:15:44
                                                              網誌分類: 經濟

有阿爺睇場, 國內股市氣勢如虹, 今次A股上升每日都有大成交配合, 港股成份股當中紅色股比重甚高, 美國頻頻出茅招搬龍門, 疲弱既經濟數據當好消息炒, 企業 業績差就話最壞時刻已出現, 真係任佢點講都得, G20 大洒金錢救經濟及就業, 最徬徨無助 恐慌的時刻已成過去.

驚世金融海嘯遇上絕世救市方案, 不可看輕這支超強嗎啡針的威力, 市場情緒轉趨樂觀, 大鱷要炒上並不困難, 熊市反彈力度可以好驚人, 上兩次港股大插是由雷曼事件和匯控供股引發既, 究竟仲有乜野誘因會令股市跌番落去 11000呢?

市場普遍認為今個星期匯控新股上市會對股市造成壓力, 當大家有晒心理準備, 情況會不會還是想像中那麼壞呢? 全球股市在過去兩星期升得太急, 回調是無可避免的, 問題是如果整固後反覆向上的機率是較大, 便要調整入市策略.

日日係度爭論牛市定熊 市, 係升市中不斷估頂, 只會錯失一個又一個炒反彈的機會, 我發覺一個好奇怪既現象, 就係留言睇淡就人人讚, 但係睇好就會俾人鬧, 事實係這幾次熊市大反彈睇淡既網友都輸到一敗塗地, 這個問題值得一眾淡友反思, 人人以為現時經濟市道差, 股市/樓市就一定會差, 係一種非常錯的觀念, 大家忘記了股市/樓市人為既炒作成份極重, 可以唔跟基本因素, 反彈幅度足可令淡友屍橫遍野.

#2628 中國人壽可以說是港股寒暑表, 在匯控出業績及宣佈供股港股大插時, 大家都以為它會再次跌穿 $20, 但它卻展現強勢, 穩守 $21, 當各位技術分析高手道出一個個阻力位, 滿以為它衝不破, 它卻穩步上揚.

技術分析有利有弊, 但過份相信技術分析會令自己畏首畏尾, 裹足不前, 最穩妥既方法係分段吸納建倉.