香港水災=地產業會好景?

黃金戰士係星期日寫blog既時候,恆指PE已經去到17.07.以現時經濟來看,真係一D都唔平.不過,好似話香港水災,地產業會好好景云云.如果真係要買地產股,究竟邊隻叫做比較平少少呢?不如等黃金戰士格下價先.由於紅底股下下十萬元計,實在唔係好適合散戶.所以,今次格價既目標係一百蚊樓下既恆指成份地產股.

以31/7收市計,信和置業close15.82,中國海外發展close19.12,恆隆地產close28.4,恆基地產close51.2.究竟要買,邊隻最底呢?

信和置業 (083)
現價市淨率為1.31,而過往五年度,信和置業的平均最高市淨率只有1.41.如果只睇過往兩年的話,信和置業的市淨率更從未超過1,因此以市淨率計,信和置業實在係貴左少少.而且,速動比率只有0.67,以五年計可以說是最乾塘的一年.雖然,你可以話PE9.81係歷史偏低水平,但係大股東 陳楊福娥 亦趁市況轉好的時候,於24/7以每股14.66賣出2,000,000股.人家大股東14.66都走貨,唔通你15.82買仲以為買到平貨?因此,信和置業睇來仲有一D時候先可以逃出生天(當然,而家個勢睇起來,仲有得升啦)

中國海外發展 (688)
中國海外發展......我都真係唔想寫.一個字,貴.速動比率只有0.60,比信和置業更乾.如果信和置業叫乾塘,中國海外發展就只好叫沙漠.總債項/股東權益亦有成67.03%,單債項計,都可以叫得大阿哥喇.可惜,以此槓桿比率,ROE只有15.2%,真係好難叫我買佢而唔買其他地產股.以現價19.12計,PE有成29.51,除07年度見過36.9外,過往五年都未曾有此成績.不過,如果你對中資二字情有獨鍾,你就即本去買啦.黃金戰士只係想話佢好貴.不過好貴之後可以係超級十分貴嘛,貴唔係一定無得升既.

恆隆地產 (101)
根據恆隆地產31/7公佈的業績,市淨率為1.65.相對五年歷史市淨率為1.0-2.5,都可以說是合理.流動比率為3.97,速動比率為2.21,長期債項/股東權益為7.27%.各種方向都說明恆隆地產好有水.唯一美中不足的是ROE由19.82%跌至6.07%,而且相信仲有得跌.不過,如果你睇返恆隆地產31/7公佈的業績,佢係大陸既業務越來越好,而且佔收益比重亦越來越大.因此,黃金戰士認為,如果你睇好大陸地產,恆隆地產係比中國海外發展好的一個選擇.不過,一定要記住恆隆地產唔係超平股就得喇.

恆基地產 (012)
以31/7收市價計,恆基地產的市淨率為0.91.而過往五年,恆基地產0.89-1.3,因此,現時的市淨率屬於偏低水平.PE現為6.79,亦是所有紅底恆指成份地產股最底的一隻.現金方面,流動比率為7.22,速動比率為2.93,可以為大把"水".ROE為12.77%.值得留意的是,恆基地產過往五年的ROE從來未少於雙位數字.在困難的環境中,則可以藉由港華燃氣提供的穩定股息收入.黃金戰士認為,恆基地產係所有非紅底恆指成份地產股最底的一隻.

PS. 今日黃大仙靈簽叫我今年餘下時間要投資得保守D,不可偏離價值投資之道,少少都唔得.因此,今次"香港水災"一浪我就唔入貨喇,大家努力D啦.

[友好連結: http://blogcity.hkheadline.com/denjilightan]

by 黃金戰士