除非唔玩, 玩就要隨波逐流

 講番李四叔那個「分段沽貨」建議，作為短炒策略無可厚非，作為長線投資的方法，就有少少問題，點解長線投資者要而家沽貨離場呢？

        下插過深反彈會急

        長線投資者最好手上長期有貨，唔好動不動就沽晒啲貨，在現今世代，下一波出現惡性通脹的機會，開始大過再出現金融海嘯，唔通走去買債券咩？我們在預期跌市時買債券，預期升市要買股票，因為債券雖然夠保險，但回報太低，例如香港政府準備推出的港債，利息只有2厘幾，買人民幣債券仲話博佢升值，買港債連升值都唔會，而家買房地產基金都有8厘、10厘息，買其他股票的潛在回報更高，點解要沽股票，放錢入銀行，或者買低回報的產品呢？

        我開始覺得，而家股市的情況，有啲似98年的大跌市過後的處境，股市反彈不少，但不是離場的時候，港股低位去年10月27日造的10676點，反彈1倍是21352點。和98年股災後恒指彈上11000點時的情況差不多，短期覺得好高，都有點超買，但拉長一兩年睇，就遠未走到盡頭。人好得意，見過10676點，就高少少都唔想買。我反而有另一種睇法，去年底今年初是環球金融海嘯，若然止不住跌勢，股市會超跌，正路港股高位32000點，跌一半去番16000點都好甘，但結果跌到10676點，若果當時環球股市止唔到瀉，跌到5800點亦唔奇，所以當然怕風險唔敢買好合理，但10676點已經超低，當時無買，唔等如股市回穩咗升高後唔可以買，若升高咗之後反而安全啲，係唔係可以用正常一點的心態睇股票呢？睇吓佢地有無機會去番正常盈利水平，如果去番那些水平，合理的市盈率和股價又應該係多少呢？若細一點的跌市跌到16000點都好夠，現價距離16000點這個「理論低位」又未算太遠，未至於太離譜。

        我有一個假設，若股市重見藍天，以現時資金供應比較充裕的情況，兩三年內恒指有機會再試32000點的高位，咁樣就係重複98年的情況，特別是港股的紅色比重愈來愈大，若中國明年重見11%增長，並以這個速度發展下去，絕對不能排除港股重上高位的可能。而家個市最大的敵人是泡沫急增，若果升三步回番一兩步，打好個底，就有機會一級一級咁上，反而一支箭咁向上唔回吐，你就要小心，咁樣的升市不能持續。較合理的發展是股市見高後會調整吓，回落番一兩成，抖吓氣，今年只是泡沫開始，明年才是最大泡沫的來臨。

        實力股未開車

        換一個角度，若出現比較壞的情況，港股會回試15000點，記住這是比較壞的情況，就是所謂金融海嘯回頭咬第二口的情況。若然環球經濟已經穩定，股市只是調整而非大跌，咁樣跌到17000點、18000點左右已經有大把人入市。

        呢個市升上來，好多散戶唔敢買，特別是過了18000點之後，散戶不斷沽，甚至沽到清倉的大有人在，邊個去買？主要係各種類型的基金去買，基金持貨力較強，唔係話基金買完唔會跌，而係話而家唔係基金減持散戶狂揸那種癲狂局面，我反而見到一些芬佬，半年結算時出咗貨套利，之後個市再上，佢地反手再揸，但散戶游錯水去追番貨的較少。

        唔好以為個市升咗咁多無嘢好買，其實而家係指數股升得多，還有大量二線三線的實力股只是從低位略彈，完全未算開車，大可以慢慢發掘吓尋吓寶。長線投資者唔係要見高減持，而係要候低吸納，但買貨唔好一注買晒，分開慢慢吸，以免一買就遇上調整市，搞到自己無晒癮。

        陸羽仁