(河馬仔專欄)佐敦渡船角越南菜評論

小弟趁馬季未開鑼之前都想儘量到處走,希望能找到不同類型的食物來寫寫.恰好近期有不少網友講開食東南亞菜,一諗便諗起越南菜,便在網上找找,結果便和爸爸走到佐敦渡船角文苑街的老趙越南餐廳,試試這店的越南食品.

地點都唔係咁方便,只好在九龍站轉綠色小巴去到,唔太想在佐敦站行過去.


渡船街一帶算係舊區,頗有九龍城之味道,不過區內有名的餐館算唔少.

入到店內地方唔大,坐得迫一點,冇法子.看看餐牌散叫吧.



這是小弟好耐好耐都想飲的越南啤,皆因以前飲過一兩次三十三之後便搵唔番,今次見到餐牌有,可惜.................當日冇貨,還是要飲的.


(如大家知道哪兒有33啤酒賣請短訊給我啦,皆因我真的好想飲啦)

冇的話都要支西貢啤飲飲,一支兩杯,出奇地有一陣久違了之啤酒麥味,只可以怨的係唔夠大支啦.


講番食物,先來碗生牛河,湯底好濃,略甜但牛味重.牛肉幾嫩,河粉夠滑,加上青檸等等配料,真係食得過的.85分.


咖哩鴨煲,呢個配搭算係少見,自己都係第一次食.煲內鴨肉頗多,只係欠了少少肉味.咖哩調配得好,唔甜但帶少少辣,應該大家都食得到,打包回帶送白飯一流.80分.


牛柳粒紅飯,典型越南菜,紅飯用茄膏及類似牛油之類少香製作,極重蕃茄口味.而且牛柳粒唔硬夠香口,夠兩個人share食.80分.


見到九層塔(即羅勒)大家應該唔陌生,一見就會見到一些越南春卷,包埋生菜一齊食.春卷入面好多菜絲,落料算足,點少少酸汁佐食,送啤酒小食一良品.82分.


講埋蔗蝦,出面好多時食此品時,發現一咬成舊蝦膠飛出來,而且味道係分開的.老趙的蔗蝦就唔同啦,食到蝦膠有蔗香,而且蝦膠係壓得實的,而且蝦肉頗多,雖然一隻都唔平,不過都算係交得出水準.85分.


最後來了碟蟹肉焗蛋金磚,外面煎蛋內有蟹肉,煎得幾香加上了蔥蒜,頗為特別,80分.


最後還是來了一支Porter39.Porter啤酒係一種較黑較苦的黑啤,由黑麥所釀造.不過佢又未去到Stout咁高酒精,有傳此字來自18世紀的倫 敦之River Porter,當時Porter在此大行其道而以此命名.味道濃郁但算係唔苦,都適合一些想轉一轉啤酒口味的人飲.



此店算係歷史悠久,能在香港如此有名一定有其理由,當然如果店內的坐位較好坐的話會更加好.