師奶手記 3

之前手痕痕寫師奶手記, 估唔到咁受歡迎, 好多網友都要求我寫多D.......

為方便各位, 已特別將師奶經驗開一個新網誌, 叫做"師奶手記"

1) 我鍾意食蟹, 今日講大閘蟹, 邊度買平? 邊度多? 好多師奶話, 買太湖蟹好, 梗係去九龍城侯王道啦, 成條街好多大閘蟹, 又平, 又多, 唔介紹邊間好, 唔想同人賣廣告(我睇質素及價錢),

Loss考察結果: 九龍城侯王道好多鋪頭賣蟹, 似批發中心, 陽澄湖D蟹好貴, 有個老細同我講, 買太湖啦, 太湖平好多, 質素唔差得遠 (其實我都唔知點分咩湖), 佢叫我唔好去一般街市買$20一隻個D, 佢話大陸有無良商人將大閘蟹苗放係D污染左既湖裡面繁值, 食左有損健康, 真恐怖

靚蟹點睇: 1) 必然定律, 要重手  2) 必然定律, 插佢眼, 要眼仔郁得快(注意: 太粗老會被人鬧)  3) 按腳按爪, 愈實代表肉質愈實淨  4) 最值錢呢一點, 要多蟹膏, 蟹既尾端飽滿及谷起, 愈豐滿愈好; 另外, 蟹膏夠多，蟹厴兩旁(即反轉隻蟹, 係隻蟹性器及口部之間位置), 會透出橙紅色.

Loss溫馨提示: 高膽固醇/皮膚過敏/ 脾胃虛寒人士少吃為妙, 另蟹肺部的腮及蟹胃, 蟹心(蟹身中央近頂端的白色六角形小肉), 因為十分寒涼, 切不可與柿子一齊食, 體質弱既人將大閘蟹及柿子同時食可引致腹瀉及頭暈不適.

2) 師奶話超市, 百佳買熟食, 魚生, 壽司, 一定要晚上7:30左右買, , 一般係7:30會將價錢下調, 最少有八折

Loss考察結果: 又真係, D熟食, 魚生, 壽司, 全部做特價, 但D熟食唔熱, 不過買番屋企"丁"番熱都OK架.....不過, 味道真係好普通, 無驚喜D師奶真係懶, 自己煮少碟, 買現成, 梗係掛住炒股啦.......

3)  師奶話買鼓油, 要買特價孖裝, 仲有野送

Loss考察結果: 真係WOR, 李X記鼓油孖裝, 平過單買$4, 仲有一支細支裝蒸魚豉油送, 師奶好野!! 不過特價孖裝送野唔係成日有, 記得留意有野送時, 要入定貨

Loss溫馨提示: 如果唔係成日煮飯, 唔好買孖裝, Loss試過買孖裝蠔油, 第2支未開已過左期......

4) 要買最平海鮮, 可以係晚上7:00左右, 去街市博一博, 師奶話, 有D生猛海鮮好難養過夜, D海鮮檔通常會係7:00左右減價清貨, 唔想第二日死左賣唔出

Loss考察結果: D海鮮檔真係同我講: 靚仔, 呢盤蝦, $30俾晒你呀(Loss心想, 大佬, 雖然真係好抵, 但咁大盤, 點食呀); 又有一檔賣魚同我講: 靚仔, 呢條青班, 要收檔, $60俾埋你呀 (Loss心想, 大佬, 咪當我老襯, 我知價架, 呢條野平時都係賣$50, 咪見我著西裝想搵我笨); 所以, 要買平野, 單係收檔前買, 係唔夠既, 仲要加埋經驗不過, 收檔前買, 有風險, 就係賣晒 係街市成日聽到"靚姐, 靚仔, 靚女"......睇真D....."'靚女"唔覺有, 咪淨係得一個靚仔--->Loss

5) 跟進買紙巾/ 盒裝紙巾: 有老友問: 好多牌子都無講張數, 及抽數(2張=1抽, 即一張紙巾2層), 點知平唔平.........

Loss意見: 好簡單, 咪又係睇重量(唔好單睇價錢, 及包裝大小), 愈重代表所用木槳愈多, 代表紙質愈厚及數量愈多, 又輕又貴個D, 梗係唔好買啦當然, 牌子質素都係考慮因素, 通常個D超市自家牌子都係差D架.