師奶手記 4

師奶手記又同大家見面啦, 今集探討師奶選擇貨品質素:

1) 師奶討論用邊隻盒裝紙巾好, 有師奶話最近TEMPO出左盒裝紙巾, $22得3盒, 價錢比一般貴$1.5一盒, 不過紙質好厚, 濕水唔易爛, 物有所值; 不過有師奶話要咁厚無用, 最緊要經濟.....結果, 佢地都係無結論......

Loss 百佳考察, VERY GOOD, 昨天百佳做紙巾Promotion, 買滿任何紙巾, 廁紙滿$40, 一律95折, Loss買左3款, Tempo, 健力氏, 及Dear Soft., 哈哈, 95折慳左$5

呢排Loss大傷風, 一用健力氏, 有少少香味.....勁唔得, 一掂到鼻水即濕晒, 每次抺鼻水要用2-3張; 但TEMPO好得, 1張已OK, 明顯慳好多張數; Dearsoft吸水介乎2者之間, 不過佢張數最多, 有200張一盒.......所以, 如果唔係傷風, Dearsoft抵用, 要求吸水及堅韌必選TEMPO, 健力氏價錢唔平, 勝在柔軟, 即係薄...not good

2) 師奶討論買米邊隻好, 有師奶話買米唔好貪平, 要買好味, 夠軟夠香既米, 大多數師奶都話如果唔介意貴D, 買金鳳, 金象, 煲粥買雙羊......

Loss 百佳考察: VERY GOOD!!!! 金象昨天做Promotion, 大減價, $48.9一包5公斤, Loss即掃2包, 每包慳$13, 講番質素, 真係 金象, 金鳳好味D, 雙羊係最Q貴, 不過煲粥真係好"念", 幾香

3) Loss討論買魚, 一D街市魚販好PK, 見Loss著住老西成日當我係水魚, 拎條青班同我講係海星班, 咪當我老襯, 又話係海魚.....著西裝都可以好師奶架!!!

Loss教睇魚, 9成以上游水魚都係養魚, 係海捉上來好難養, 海魚肉質較"鞋", 較實淨, 因為海魚要係海上生存, 運動量大, 食新鮮魚毛, 所以肉質較鮮味, 較實淨, 魚身會較鋼條型; 反之, 養魚係人養, 食詞料, 肉質較鬆散, 較"林", 魚身會較肥胖型......D魚小販好識睇人, 見你斯斯文文就想搵你著數:

賤招數一覽

A) 開貴價, 個價錢牌一定標貴D, (破解方法, 可參考第一集);

B) 欺騙你係海魚, 又話星班, 又嘜又七, 唔好信佢, (買貴魚要搵有經驗既人幫手);

C) 將條魚其中一面俾你睇, 查實另一邊可能受左傷, (記得睇晒條魚兩邊)

4) Loss討論買豬肉: 一D街市豬肉佬好PK, 見你唔係熟客, 表面上"好好心"問你要來煲湯, 定係炒...etc...其實佢將D賣唔出既肉賣俾你, 不過你唔識點算呢?

Loss買豬肉Tips:

A) 買豬肉一定要早, 一隻豬有好多部分, 好野梗係一早賣晒啦, 所以好肉一定要早上買先有....(不過太早可能會有隔夜肉)

B) 切不可買碎肉, 即你買$20-30肉, 佢俾2-3舊肉你, 一定係俾人搵老襯, 將賣剩庶夾埋賣晒俾你, 你一定要識得 SAY NO!!!!自己睇, 鍾意邊舊就指明要邊舊!!!(不過要買多過$20, 先可以, 買太少, 佢可能唔SHOW你)

C) 煲湯通常買豬尾骨, 豬展, 豬尾骨買那些有尾巴及不要有太多肉跟住既, 因你買骨煲湯, 唔係買肉, 慳一D;  豬展要連埋條"筋"買, 條"筋"先至係寶; 炒既買"柳妹", 買排骨要7分瘦肉, 3分肥肉最好.......

5) Loss討論買菜心:

通常靚菜心係北京/ 銀川.....不過檔檔都話自己係北京/ 銀川, 咁點分呀....

Loss買菜心Tips:

A) $8以下一斤既菜心好大可能唔好食, 北京/ 銀川菜心來貨價貴, 通常賣$8-$12/一斤, (打風, 水浸, 太冷天氣另計), 太平既, 太大條既係假野

B) 菜葉要夠鮮綠, 要嫩, 不要太大條, 菜柄有少少直紋, 不要有太多菜花, 菜柄中心不要白色, 要嫩綠色

C) 菜心苗.....食都OK, 不過有排洗, 洗死人, 因太細條, 要洗好耐, 入口欠質感

記住, 街市如股場, 充斥住好多奸人, 一唔小心, 好易俾人搵笨!!!!

Loss有今日既經驗, 都係偷聽左唔少師奶既對話, 再親身探討再考究, 亦都係街市留低唔少腳毛!!!