投資格言

轉自陸sir 13/3/07 對投資者格言:

第一個是股神唔易做，正如我在頭條日報講到那個「中國股神」，唔好見到人家賺錢就心郁。我都見過一個本地股神，白手起家，就係聽消息大炒四線股，一元變兩元，兩元變四元，曾經幾千萬身家，最後破了產，你可以話佢入到決賽才出局，幾唔抵。還有大量想做股神的散戶，在初賽已出局。股神得一個，傻仔上萬個，你想做股神時，好易變了儍仔被人滾，千祈不要話自己錢少唔怕輸，少少錢都好難儲番來o架。記得巴菲特講過，自己同幾個人打啤牌，如果打了３０分鐘，你仲唔知邊個的技術最差，你咪係最差那個囉，有時做咗傻仔都唔知。你可以博，但要預咗輸清，輸清唔好怨人，唔好怨個社會對你唔好，路係你自己揀o既。 　

　　第二是慢線更易到站。有些事情似難實易，有些事情似易實難。賭錢贏錢看來好易，舖舖都有人贏，但長期贏錢的賭徒萬中無一。穩陣投資看似好笨，努力儲蓄看似好辛苦，但成功到站者十有八九。我看見不少網友回應時話自己廿幾歲，我更覺心驚，你們一開始投資就只是賺多賺少的遊戲，未經歷過股災，未知股災之慘。我家做小生意，七三年股災之後，又有石油危機，爸媽不但股票投資損手，而且七四年成年只做了一單生意，市面靜到嚇死你，生活壓力之大，我一個小孩子也感受到。 　　

　　投資如何控制風險，是高度的藝術，能控制風險，長期保持正回報，在好市時或許賺少一些，在大跌市時可以保存性命，二十年下來，複式回報好可觀。反正，你的組合今年賺一倍，好叻，明年再賺一倍，更叻，到後年大跌九成九，就玩完，又從零開始過。所以我建議大家，年紀愈大（以三十歲為分界線吧），就愈要行慢線，即係話投資要審慎的，控制風險，你雖然仲係年青人，但係輸唔起o架o拉，否則工作１０年積蓄，一舖輸俾佢，唔抵呀。個個想一朝發達，到尾十有九個落空。

　　第三是買樓易過買股。好多人買股票唔識控制風險，三更窮五更富，或者出出入入，出入的時間錯了，一無所得。若果自知是這類人，可以把自己大量注碼買樓，只餘少量錢炒股，過下手癮就算。買樓既可強逼儲蓄，又可防止自己經常在錯誤的時間出入市。你看這次跌市，若果能在二月底第一日跌市就斬，到上周稍定時買番，回報好可觀，如今短炒都可以離場了，但做到的有幾多人？大多數人慢三拍，會做好多錯誤決定，本來長線投資唔郁無壞，衰又衰在好貴入市，唔止蝕面對的風險更大。 

　　第四是肯博肯學永遠有出頭。我深信香港人只要肯博，無論幾低學歷，都有出頭天。學歷低做野都可以博盡做，搵多一元就是一元。香港好在社會開放，你覺得工字不出頭，可以在你熟悉的行業，出來做小生意，希望打出一片天，你創業輸錢唔好怨人，只能怨自己唔夠博，或者無料到。投資也是一樣，唔係讀過大學就一定投資好叻，大學都無教投資，一個小學生投資，和一個大學生差不多，所犯的錯誤都係一樣，香港最好，報紙都免費，上網又唔收錢，陸羽仁知到幾多盡量講俾你知；我好似真矢老師咁同你講，有野你唔學，學唔到，係你自己的問題，唔好怪人。你要自己學，每輸一次錢，都要明白輸的道理。我亦都見過好多投資老叔父，小學都未畢業，捱個學師仔出身，儲得少少錢學人投資，老來手法都好鬼精，深懂投資竅門，身家豐厚。

　　 最後寄語阿kym，你比我好，有「兩隻窮鬼老豆老母」，我老豆老母過身後，過時過節想起他們，暗自落淚，想起兒時種種，只留追憶。錢並不是一切，有時人擁有的東西，並不懂得珍惜，只要等失去後，才知道那些東西有多寶貴。