美國次按的幣病..

轉自曹仁超:

透過次級樓按操作買入一間二十萬美元市值嘅樓，首期只須畀一萬美元（樓價5%）；第一年次級按揭利息成本2%，即四千美元或每月供三百三十三美元（另加餘下80%銀行貸款利息）；第二年次級樓按利息成本5%，即一萬美元或每月八百三十三美元，另加80%銀行貸款利息。

　　假設樓價每年上升10%，兩年後你嘅物業已值二十四萬美元，再向銀行申請80%樓按，便可享受低息貸款，收回約四萬美元還畀次級按揭公司。依家問題係2005及06年美國樓價升幅不足20%，次級貸款兩年低息期完畢，今年利率一下子跳升至十厘以上，即供樓者除咗應付銀行80%樓按利息外，仲要應付財務公司20%貸款，並以十厘或以上計息，呢條數由第一年每月負擔三百三十三美元上升至第二年每月八百三十三美元一個月；第三年升至一千六百六十六美元一個月，另加銀行80%按揭利息，令供樓者利息負擔一下子增加25%或以上。美國供樓人士平均借入樓價由2000年78%上升至2006年86.5%，此乃點解美國承受唔住樓價下調15%嘅理由（可令大量供樓者變成負資產）。美國樓按問題應該唔會影響其他行業，除非樓價下跌幅度達15%又作別論。美林證券一份研究報告預期，今年美國樓價可能下跌10%左右。如上述情況出現，美國今年GDP增長率年底可能只有1.5%至1.75%。