陸sir營運人生系列 〈一〉
陸sir的營運人生系列好精彩，引起恨多迴響。這篇文我不敢貼在大廳，因我很怕罵戰。我上次講左一句，即時有對我毫無了解的人罵我做人不知足，我亦懶得解釋。
首先我覺得網友Mya不算大使，只不過教養小孩子真要花好多錢。我認為做父母的人好偉大，要用很多錢與心機去教養小朋友。我好自私，所以我一早做左一個不婚不孩的決定。如果唔係，只會像Mya一樣，將所有金錢注入家庭去盡自己責任，而且還要不求回報。
我是個失敗的中年人，沒事業沒家庭沒子女，一生大起大落，最後發達冇我份。我在事業上樽頸左好耐，在我工作生涯中不會有得坐房，我已接受這現實。我惟有在午夜睇波，自言自語，拍手歡呼，獨自找尋無聊的的快樂。
我曾經有一間1100呎dream house，鋪了楓木地板，簡約設計，對住大海，好光猛，仲有些少西斜，我在那兒渡過了我人生最好的日子。但，我心愛的房子，我卻丟失了。我為此痛苦了好久。但後來想通了，人的房子，是為了要有塊瓦片遮頭，有個地方容身。一個人，真是需要住在1100呎的房子嗎？我落難時，有貴人幫忙，給我地方住，不用交租，只交一些雜項費用。之後我再搬到附近的屋苑。
我現在住的房子，市區樓，地鐵上蓋，沒景，望樓，略吵。沒錯這個是舊區，蚊患指數高，空氣質素差，升值潛力不高，但我這個屋苑管理完善，花園打理得好靚，管理員又好盡責，我覺得很好。2007年中時這個單位 $3500一呎，屋苑大把單位攤喺度冇人買。忽然間兩年半之後，D人一窩蜂想買樓，又話買唔起。他們是不是真的今年才有能力買呢？兩年半前為什麼D人懶懶閒沒人買？我認為，D人抗議的高房價問題，是個社會問題，不是經濟問題。
我再在金融海嘯中損失金錢，現在剩下的錢，是儲返來，不是賺回來的。我曾是大花筒，亦曾經很慳家，生活兩極化。今天我的價值觀好得意，我最朝思暮想的食物是餐蛋治和餐蛋公仔麵，因為我身體有病不能吃這些東西，所以好懷念。樓下茶餐廳餐蛋治好正，加一杯奶茶盛惠$23，但我好耐先可以食一次，不過沒分離的痛苦（同件餐蛋治），又怎會有重逢的快樂？仲有我好想好想食一桶家鄉雞，但我不能。我不能一個月只花$5000，我需要善待自己，因我不知道我會活多久，但我又不可亂花費，因為我正朝退休努力。
我人生中的不如意事，其實很多。多年前我同醫生說我需要食happy pills，醫生說他可以refer我去看心理醫生，但他認為我不需要食happy pills。我後來research happy pills的資料，發現原來食happy pills的病人自殺率很高，真令人意想不到。我亦了解到部分不如意事，是自招的，比如沒一早學會投資，沒一早為自己自我增值等。但人生已走了大半，只好算了吧！現在我好努力keep住份工，因為我知若失去這份工，出去就找不回。
我現在可能是過著一個meaningless life，因我都不知我生存意義所在。我不能像福哥背上背囊去行善，因為我不會因此而快樂。我只是個自私的小人物，不像福哥般偉大。如果我死去，我會想到我母親的悲傷，我不想比她早逝。我這個年紀的人，亦不會追求什麼快樂人生。但求早上醒來，張開眼仍然可以見到這世界，仍然可自己照顧自己，就已經很好，就已是快樂人生。
陸sir早兩日講退休要有幾多錢。我計過條數，要供滿一層自住的樓，再加800萬會比較穩當。我以前打算申請老人屋，但現在我見米埔的老人屋要一萬多蚊租金，我驚我住唔起。
我知道陸sir個blog有很多年輕人，我希望大家努力學投資，早些財務自由，再去追尋人生更高的理想。
我就係入左 #2601 呀! 貪佢每手200股, 方便分注入貨, 我覺得$30 或以下入得過, 佢既招股價係 $28, 叫做心中有個底線, 大鱷近日不問價洗倉, 股份閒閒地跌幾成以上, 都唔知個底係邊樹! 亦唔睇股份既基本因素.
市況太波動, 落死雞盤都唔知點出價, 我唔貼市, 只好搵d穩陣股同ETF, 我相信恒指會跌穿早前低位 19400, 不過恒指從高位回落逾二千點, 有望彈一彈之後才下試呢個位.
我都覺得歐洲情況好差, 加埋班大鱷興風作浪, 歐豬危機一時當好消息炒高, 一時又當壞消息大插, 相信係有心人刻意部署, 論基本因素恒指二萬點開始向下買中長線必勝, 但拋上拋落真係會暈船浪, 令人忐忑不安, 我仍然會分注入保險股同埋ETF, 內銀股都會入, 呢d股份斷估係現水位難跌幾成, 但係其他股份我真係冇信心, 大鱷洗倉唔係人咁品.
美匯指數爆上 84.78, 商品市場有難, 跟手拖累埋股市, 而家要等歐元死貓彈喇! 英國大選, 英鎊唔慌靚仔, 英鎊弱不利匯控, 禍及港股, 所以大鱷今日只好夾硬推升中移,但係我覺得佢遲早要跟大隊轆落黎.
soho: 我同意你講不要再信所謂強勢股，但在大跌市，難免出現一些合眼緣的股份。對我來說太保#2601和民生#1988就是這種，但我出手比較低，買不到。如入到貨，我亦係會將它們當作IPO貨放倉低。今日沒有加注#2823了，稍等一下。
#1205此價博下無妨。隻#1883亦係相對硬淨，我都成日想加注。
大戶會插到低於19400嗎？我始終覺得歐洲的形勢好差。
恒指通常最多跌三日就會彈一彈, 由二月開始就算有任何壞消息, 恒指都從未試過連跌四天, 不過今次歐豬咁大鑊, 美匯指數爆上84, 阿爺又唔生性, 恒指連跌三天後都唔知天日有冇死貓彈, 如果仲彈唔起就破記錄兼大大鑊喇!
大鱷部署左咁多野插落黎, 一定唔會係二萬點收手, 各個板塊跌幅全面洗倉式下挫, 走勢非常惡劣, 恒指二萬點只係心理關口, 毫無支持力, 唔捱得幾耐, 恒指大成交跌穿250天線, 沽空金額佔港股成交高達10.49%, 五大權重股上榜, 呢種情況好罕見, 預示港股後市不妙.
港股跌300點以上我一定會幫手托市, 斷估買少少唔屎得既, 我今日買左少少保險股同ETF, 不過有一堆死雞盤入唔到, 我估大鱷一定會插穿二萬點來製造恐慌, 所以我要預留多些子彈, 中信資源冇沽貨, 反而想$1.5x加注, 就用幾千蚊同佢賭番鋪, 希望太航跌穿 $5.5俾我入貨, 不過歐豬危機不利航運板塊, 睇定d先至入.
~~~~~~~~~~~~~~~~
史哥分析: (5/5)
~ 以往當恒指在相對低位而匯控公布業績, 恒指就會借勢作出反彈, 本周五匯控公布業績, 按此推算, 恒指底部將會在本周出現
~ 留意匯控強弱可知港股後向, 當匯控回調至 $75~$77, 代表港股調整將會告一段落
dai dai Sir 分析: (5/5)
恆指平均線出現「死亡谷」利淡訊號，繼續向下。周三更出現大裂口跌穿250天平均線，觀乎周三之沽空金額及頭五位沽空股份，周四還須調整。有機會下試19874.5或19423水平。
道指周二陰陽燭出現「傾盆大雨」之利淡訊號，而更以大陰燭一口氣跌穿5天、10天及30天線，名堂叫「斷頭鍘刀」，聽名都知是利淡。道指已進入調整之第二周，預計會調整四周。
上証綜合指數有機會見底，周四若果出現陽燭，便是「早晨之星」。預計指數在2700點至 3100點之間上落。
金兄分析: (5/5)
美股回穩, 如見現貨反彈上20505點以上, 把握機會增持現金, 五.六月偏淡, 有機會下破 19800 支持.
有分析話港股呢兩日成交縮代表沽壓不重, 我唔認同, 我覺得係冇人接貨, 股價跳空式急挫, 成交當然不多, 但係沽壓係非常沉重, 現時恒指企係20700其實係假象, 只係托住指數黎沽, 好多股份已跌到等同二萬點, 大鱷係不問價沽貨離場格, 唔理股票既真正價值.
我地又要出絕招, No eye see !
中信資源我長倉有零成本貨, 短倉仲有4000股, 見澳洲徵重稅咁大鑊, 我估佢會落 $1.65, 所以今朝想走部份貨, 點知手腳慢出唔到, 希望佢超賣跌多一浸會彈下.
我今日掛 牌買A50, 入唔到, 天日可能會跌穿 $12, 我發覺自從股指期貨出台後, 內地股市未好過, 我係度諗緊內地股市是否已經進入熊市, 內地股市係港股既後盾, 佢死我地就大鑊.
炒股座右銘:
~ 真正筍價係唔會停係度俾你慢慢入貨
~ 當隨街平貨任你揀就代表大鱷要錢唔要貨走鬼鬆人
~ 強勢股係大鱷營造出來, 隨時會逆轉, 唔好信圖表顯示既上望目標價
我最愛北京大董烤鴨店的北京填鴨，D鴨好瘦，碗鴨湯好甜。我好快飲完一碗，D waitress姐姐就會請我飲多碗。好多菜式係fusion style，我好鍾意。
馬仔：你好！你去看看金師兄網頁就會明晒咖喇。
Soho：因為以前師奶團好喜歡看高低水，影響了一班信徒。D紅字系反擊Apple Wong 的，其實並無惡意，但學你講，D留言已經冇乜意思。
soho
//相關股份都未除凈呀!//唔明？，你有時間先解釋，
夜了，好；瞓啦
豪餅，你沽晒#1205了嗎？我仲有幾千股。呢隻衰野，贏埋唔夠輸。但我不能怪人，明明有錢賺，我都唔放，隻#1280又係一樣，賺$2000唔放，唔通到蝕$2000才放？
試過好多次，我止蝕之後，股價升番到高過我買入價，所以我漸漸沒有了平手走的概念。在熊市，這是會輸得很慘的。所以我短炒貨得廿萬，輸晒都係廿萬。
我係阿Sir blog 耐不耐就見網友大大隻紅字留言 "股災喇! 沽貨呀!" 雖然明知係開玩笑, 但係我都覺得好礙眼, 我相信沒有一個股民喜歡見到呢d留言.
而家睇完阿 Sir 既網誌同埋回覆就可以鬆人, 完全提不起興趣睇網友留言, 我曾留言解釋五月期指低水是因為除凈, 周圍既財經分析都有講解過, 但係網友仲係不斷為大低水而煩惱, 仲話點解踏入5月仍然大低水, 大佬! 相關股份都未除凈呀! 期指會隨著股份逐一除凈而慢慢收窄咖! 期指既野我都唔識咖! 只係以常理來猜度.
舅父仔，
好耐無見
經過這幾場賽事，阿迷已越來越少，因大部分已爆血管死掉了。雲加，我想告你謀殺。
北京填鴨。。。。冇。日日行到鬼咁累，都無心機搵食，在酒店吃晚飯.
只吃了一次火鍋，（東來順）一般，個醬幾好食. 有一間叫（永和）的快餐麵店反而有驚喜。番茄牛肉麵，五香牛肉麵，梅菜扣肉飯都好食
民間消費一般唔貴，和香港差不多.
安樂晒!
早排Persie同埋我沽貨, 見你冇反應仲擔心你未走添!
係京城有冇食北京填鴨? 仲食左d乜?
我平手走咗啦。
搭MTR 好平，無論遠近都是 2 蚊，好抵搭，可以說好彩，weekend個兩天好好太陽，今日走就天濛濛。
可能係黃金週所以特別多人, 睇見上海世博同志們的表現真係好羞家, 人多好混亂就真.
你使唔使問下主席邊個位止蝕中信資源? 要有心理準備佢會轆落 $1.6 邊, 澳洲咁狼死徵重稅我都係穩陣d忍下手.
Hello
豪姐姐，I just back。 京城一夜氣溫上升二十度，我要著短袖襯衫。
整個京城都是人，在皇宮所有走廊都堆滿人，你可以知道我國真是好多人。但是否好辦事呢？
皇宮收費＄60大洋，澄排隊入皇宮都一個鐘,$60x How many people?我收錢收到手軟呀!!
近排中移.中國電信.電訊設備股突然由強轉弱, 原來係三網融合押後出台同埋印度禁止從中國進口電信設備
中信泰富同埋中信資源一直轆落黎, 走勢反常, 原來澳洲計劃於2012年對礦業股徴收40%暴利稅
內房股食瀉藥, 原來阿爺毒招層出不窮
內銀股早排彈完就散, 原來人行上調存款準備金率
半新股派晒火棒就跌到趴係度
大鱷一早收到風係高位派貨, 散戶後知後覺, 輸到嘔泡, 睇到財經新聞已經走唔切, 係鱷魚潭搵食真係艱難, 都係買指數基金唔使煩
Persie, 自從有歐豬危機.高盛事件及加息陰霾後, 我既短倉一直保持係不高過50%滿, 我近排好多買賣都係幫長倉游水, 我會趁港股大調整時用盡短炒資金, 即係入滿短炒倉, 亦會沽出蝕本股仔, 換入優質大藍籌同埋指數基金, 入大藍籌係因為佢地帶領港股下跌, 將來反彈力亦會較股仔強勁
假如港股跌到恐慌價, 我會加入少許新資金, 主力都係買入保險股.
假如金豬真係逐隻爆, 相信上證都未必會跟足, 我今朝係 $12.48 幫老豆入左600股A50, 佢打算一直向下買, 當月供股票, 本來佢想一注過, 我極力阻止佢先至肯分注, 天日 $12.2 樓下希望入到下一注.
我最怕幫家人入貨, 上次老豆想$3.9入中行, 我話仲會跌, 點知跌多少少就彈, 仲飆左上$4.3 樓上, 俾老豆話我出手孤寒累佢入唔到, 唉! 好人難做.
~~~~~~~~~~~~~~~~~~~~
中信資源死因揭盅 ~ 勢頭直指 $1.65
澳洲計劃對礦業股徴40%暴利稅，過去礦業稅由34%逐步減至14%，而一下子加番上40%，咪話唔傷。澳洲兩大礦業公司之一必和必拓估計，徵暴利稅會令 佢地純利大跌19%。香港有一堆中資公司在澳洲買了不同礦產公司股份，遇上澳洲這一招，有關股份股價大跌，投資也需減值，如#2600中鋁和#267中信泰富等有投資澳洲礦業股的公司皆會中鎚, 今早相關股份皆下挫.(轉貼 陸 Sir 3/5)
soho: 阿爺手下不留情，明日股市又會下跌囉，要下試條250天線了。
看來#2823低處未算低，可以慢慢買也！
但如果金豬真係逐隻爆，上證的底線又會下移多少？
我們又曾說過今年不要投入新資金買貨，但如不投入新資金，又如何買貨呢？
以短炒來說, 當我預期大市會有反彈, 我就會入權重股, 相反, 當我預期股市大跌, 我就會拿拿臨沽出權重股.
至於手上既蝕本貨, 我會趁反彈止蝕沽出又或者 no eye see, 等佢地慢慢返家鄉, 我唔會俾呢 d 跎衰家影響我既心情.
我會趁每次大跌市入優質大藍籌, 恒指十大權重股任揀唔嬲, 反彈一定有佢地份, 呢個就係最簡單既執五舊或者儲貨方法, 呢幾日跌市我望住個恒指比重表黎揀股撈貨, 匯控15% 中移9% 建行6.8% 工行6% 國壽5% 海油4.3% 中行4.3% 中石油3.8%, 今日恒指升329點, 佢地隻隻都表現亮麗, 相反, 好多股仔今日都逆市下跌.
Persie, A50 今朝走勢好古怪, 不單止冇跟內地股市跌, 仲倒升添! 睇番午後內地股市由跌轉升, 就明白原來上晝係有春江鴨買上, 你可以趁下周調整市係低位幫小B買定 #2823喇! dai dai Sir 估計 // 上証綜指下跌極限在2740點。在2800水平已可以分段分三注買入ETF，例如2823、2827、2846、3049。放長線少少，睇三至五年，必有大收穫。//
我都好奇怪點解公用股係咁跌，又唔係係升市，又唔係資金流向其他版塊，唔通表示個市會好全面咁跌落黎？
真係要信見光死呢回事，如果阿sir提起第一天就入貨咁會沒問題，但我咁耐先跟車，就失晒先機。
同馬仔一樣，手上嘅貨蝕緊咁多，點彈都無用。
近排公用板塊頻頻跌600~900點, 係極不尋常, 呢位財演咁行貨既回應我就唔收貨喇! 我覺得佢係諗唔到原因, 敷衍了事.
1) 通常跌市中最硬凈既公用股持續急挫,跌幅竟然超越其他板塊// 前幾日睇電視有人問過呢個問題, 當時人答因為中電之前已經升左好多~~
佢彈都無用對我來說。
內需板塊始終係今年既焦點, 不過任何強勢.弱勢都係大鱷刻意做出黎, 派完貨夠鐘走鬼一樣會大插, 大鱷既強項係快速變臉, 你睇下近排熱炒既#2342 京信通信今日跌左8%, 仲有好多股份都大插插, 跌穿250天平均線, 所以千祈唔好信d股份真係強勢, 呢d係假象, 短炒執少少就要跑.
恒指通常跌兩日或三日就會彈一彈, 由二月開始從未試過連跌四天, 周二.周三及周四已連跌三天, 今朝彈一彈就腳軟, 睇下天日有冇死貓彈, 如果仲彈唔起就破記錄喇!
今日下晝跌個浸真係莫明其妙, 三點歐洲開市初段好靚仔, 美匯及商品市場又無乜事, 大鱷就無啦啦狂沽, 港股只係跌左0.8%, 但係好多股份都跌到趴係度, 照計今日結算完天日沽壓應該會減低, 有利反彈.
前晚我話BDI急升183點, 係近一個月首次, 所以我尋日決定入太航而冇揀中航科工, 航科分明係俾大鱷洗倉, 陸 Sir 推介得太揚, 大鱷睇住黎做野, 真係見光死!
今朝競價盤掛 $5.96沽出太航, 點知開 $5.99, 執多幾仙, 以為自己好醒, 點知下晝逆市升到上 $6.05, 好彩未沽清, $6.03 沽多一手, 太航真係彈力十足, 睇黎仲有得去, 天日再出貨.
過去幾日有d奇怪現象:
1) 通常跌市中最硬凈既公用股持續急挫,跌幅竟然超越其他板塊
2) 派高息股份係除凈前竟然無人問津, 以往會有買盤掃貨, 股價有抗跌力, 但係近日就跟住大市跌.
無論d歐豬爆唔爆都好, 每次拎出黎講下都係最佳造淡藉口, 250天平均線早晚必破, 我可能會趁呢次跌市入齊貨就暫停短炒, 唔想花精神睇市.
近排好多股份俾大鱷洗倉, 抽高派貨然後大插, 所以我話強勢股都係幾日貨仔, 唔好信幅圖話佢上望幾多, 有糊就要食, 唔好大貪.
早排我最鍾意炒既中國電信突然爆上 $3.8, 我拿拿臨分注出貨, 一直沽到上 $4.08, 肥青話佢會上 $4.4, 我留番一注睇多兩日佢都上唔到, $3.99走埋最後一注, 唔等收息$0.08, 驚除凈後有沽壓, 點知佢除凈後真係一直轆落黎, 今日收 $3.46, 大鱷派貨手法高明, 真係好得人驚! 如果我大貪冇食糊就真係見財化水喇!
豪姐姐
我發覺運動用品股幾好，好多時大市跌，佢地唔喺好跟，你意見？
例如＃2020,#1368,#1968
巴賽11打10都無運行，技不如人了，看來難免被淘汰。
話口未完1:0，碧基係隨時可以由中堅變中鋒的球員，好好笑，但他的入球有越位之嫌。
巴塞今場有D老鼠拉龜，對國米滴水不漏的防線無從下手。但我好欣賞柏度。
不過1:0都係輸，難怪Xavi咁失落。唔緊要喇，上屆巴塞勝車仔好有運，今屆幸運之神不降臨，也不奇怪。球證的執法有少少偏向巴塞，國米先勝車仔再取巴塞出線是實至名歸。難怪Mourinho咁牙刷。
這兩屆意甲德甲比較落下風，英超同西甲領風騷，今屆的冠軍戰卻是德意對壘，有趣。基於我唔抵得Mourinho，所以我希望Bayern捧杯，Bayern對上一次捧杯，已是2001年的事，當年大猩猩Kahn在12碼戰時盡施渾身解數，終捧杯而回，至今仍令我記憶猶新！
今日見到阿哥，他仍維持睇淡的看法，覺得金豬可能逐隻爆。我知佢好鍾意買金，就問佢咁金好唔好，佢話，你今日冇睇信報林行止咩？原來林行止專欄叫買金。
我今日入到一注#2357 ($3.48)。其他入唔到。冇加注#1205。
乜豪婆婆整容變左豪姐姐?
阿爺發惡唔係人咁品, 過去十個交易日, 上證綜指9跌1升, 國指受佢拖累亦8跌2升.
市傳今個黃金週阿爺會出招, 我諗唔會卦, 話晒周五世博開幕, 斷估唔會搞d咁既野.(後記: 周五晚避開世博開幕禮冇出招, 周日晚先至黎料! 大鑊!)
BDI 繼周二急升183點後, 剛剛再升126點, 市旺時航運股大多跟BDI炒上, 可惜遇著跌市.
國壽表現硬凈相信係預期業績靚仔同埋周五除凈 $0.7, 有好息之徒撐場, $35.5 樓下我會再入多一手, 天朝國壽係收息既最後上車機會.
好多股份都跌穿左250天線, 但係恒指距離250天線仲有大約500點, 跌到呢個位我會再入貨, 五月多數會見到, 恒指250天線向來都守得好好, 就算跌穿都識得番上黎, 唔好太悲觀, 大跌市係分注吸納優質股份既好時機.
「歐豬」債務危機沒完沒了, 話憂慮時股市就插, 話憧憬債務危機會獲得解決就當好消息炒, 全都是大鱷的把戲, 股民不應俾佢地牽住鼻子走, 如果大家驚跌市, 一早就應該離場, 既然選擇留係度同大鱷搏鬥, 就要克服恐懼, 趁低吸納, 中.美企業既業績亮麗, 對股市有支持作用.
內房股有回穩跡象, 對壞消息開始冇負面反應, 但未能確定是否見底.
恒指通常跌兩日或三日就會彈一彈, 由二月開始從未試過連跌四天, 周二及周三已連跌兩天, 我搏反彈就係睇住呢個指標做野, 我估結算日會彈下, 希望有得食糊啦!
舅父仔，豪姐姐，
阿sir話#2357 $3.50 可以買吓，真係到價！太揚啦，跌就預左。
A50好樣衰，買小小冇壞。
yes
你係唔係放緊假?
隻＃2357 有 無 咁 無 人性呀！！
我都鍾意＃11，亞sir咁講，可能會升呢!! 我發覺我開始short short 地!!
港股尾市跌得好急, 大鱷要錢唔要貨! 預示今晚外圍好大鑊.
跌幾耐點知呀! 下跌目標相信係250天線 20400 左右.
上証綜指 2800點如果有支持就可以幫到手.
我係度諗緊5月11日英國保誠上市, 大行會點樣營造市場氣氛.
周四期指結算, 港股會受轉倉活動影響, 唔可以用常理來猜度市況.
屎火! 美匯指數升穿 82!!!!!!!!!!
真係黐左線! BDI 急升183點(報3203), 自從三月中開始未見過升得咁急.
#2357 我都想入, 不過隨街平貨, 要諗諗, 中航科工近日既沽壓唔知係唔係同呢批新股有關.
中航科工三月初向市場批出3.35億股新股，配售價3.4元，抽水11億元。
soho
hello 你估仲要跌幾耐
#2357我＄3.64買多一住
維達真係癲左, 飆完上天就轆落山, 今日跌左 7.9%.
唉! 中信資源愈跌愈有, 而家等 $1.9 樓下先至算, 呢隻野真係激屎我
我今日沽出特步, 財息兼收, 吉仔執五舊水走埋.
近日我同國藥復合, 炒左兩轉, $35 樓下入, $36.5 左右沽出, 佢每日波幅好玩過壽仔.
我最開心就係隻匯控, 史哥話佢 $85 有阻力, 我係 $84.4 走左, 而家等 $80 樓下補回, 真係要多謝史哥.
今日卒之入左第一注 A50, 又買多一手龍源, 我懷疑中航科工既死因係 [陸 Sir 推介], 因為好多散戶上左車, 大鱷想震走晒d散戶, 所以要插死中航科工.
大鱷變臉超快, 強勢股份都係幾日貨仔咖咋! 藍籌股壽仔.匯控.平保.新地.....早排升得好地地, 失驚無神沽壓殺到就轉弱喇!
// Tracy:你手上的恒生、龍源和中國建材近日都比較弱，中建材破咗上升軌，直情要睇吓佢守唔守得到12.7至13元的低位，走勢略差，因為大陸打樓市，建材股都被人沽埋。龍源公布業績後有沽壓，但又未算跌得太慘，好似定番少少。恒生亦受制於業績，利率低，息差收窄，對佢唔係咁有利，但大家當收息股揸吓無壞，現價息率4.8厘，可以守。幾隻特別係恒生，唔建議現價走，因為都係在較低位，但佢地都比較弱勢，有錢個市跌多啲時也不要買佢地，可以買些較強,勢的股份。//
soho: 阿sir唔太鍾意 #11 同 #916，偏偏我有持貨。找尋強勢股，就是我首要目標。我可以持有70%高息股，但亦該有30%增長股吧！
A50死亡谷我沒所謂，反正我是打算低位儲貨。
根據陸 Sir 既說法, 我地想儲A50就應該趁上証綜指跌穿3000點時入多d，3000點樓上入少d，阿Sir 話市盈率只有17.9倍，唔單止無泡，簡直係有d便宜。
dai dai Sir 就話 A50 出現死亡谷, 而且 A50 近排又上埋五大沽空榜, 看來我地可以係低位入貨喇!
~~~~~~~~~~~~~~~~
呢兩日券商推出龍源認購證, 相信對龍源股價有幫助, 單邊向下的情況有望改善, $8.16招股價相信可以守到。而且近日有消息話國家發改委透露，新能源規劃將有望率先出台。(後記: 四月尾出左窩輪後龍源跌穿招股價, 原來仲死得快d, $8 危危乎)
如果講泡沫，內地A股市場又真係無乜泡，上證綜指上周五收2983點，現價以去年A股歷史盈利計，市盈率只是22.9倍，若以今年A股估計盈利計，市盈率為 17.9倍，在內地標準一d都唔高。
上證綜指市盈率的最低點是16倍，當時是在2005年6月6日，上證綜指只有998點。反觀高點，
上證綜指市盈率的最高點是68倍，發生在2007年10月16日，上證綜指為6124點，那時也是環球股市的高潮。
以歷史走勢計，上證綜指的極低位是16倍市盈率，68倍市盈是極高位。上證綜指市盈率跌到的20倍以下時，已進入低估區域，升到50倍以上時，就係高估區域，
「投資的我」睇長線，可以在A股市盈率低過20倍 開始吸納，升到50倍以上時開始減持，而家跌穿3000點，開始接近下方，市盈率只有17.9倍，唔單止無泡，簡直係有d便宜。
點解內地股市咁弱，我估其中一個原因，係因為樓市太強，去年下半年開始，在內地買樓買親都升，而且唔係小升，係大升，槓桿又大，就把大量資金吸引去左炒樓唔炒股，係造成股市偏弱的原因。
A股唔升另一個因素係怕阿爺加息退市，估計可能在6、7月發生，但到壞消息真正出現時，股市就可能見底。真正會打擊股市的是經濟不振，但照睇今年內地GDP增長有10%，暫時又睇唔到企業盈利有不達標的可能。
總括而言，內地和香港打擊樓市，唔一定會令樓市在短期內爆泡，但會令樓市放慢，但只要全球仍維持在相對低息的環境，資金仍然充裕時，資金仍會到處流竄，最後 可能落返腳在股市，內地的A股，甚至香港上市的H股，跌下跌下，中線開始有少少吸引力，可以候低吸納下啦！(轉貼 陸 Sir 26/4)
我都相買樓，但是我不想樓價跌太多，樓價跌會對香港經濟帶來影響，到時份工
凍過水，都唔敢買啦。
不過調整少少俾我買啦。
我都少了貼文在大廳, 留言亦好小心, 怕引起迴響, 好煩!
今年有好多香港人抗議高樓價, 迫政府出手, 令我想起當年董伯伯出招壓樓市, 結果樓價下跌, 怨聲反而更多.
想當年我努力儲錢買樓, 只會怨自己賺得少, 追唔上樓價升幅, 從來不會怨樓價高.
我好恨食阿一鮑魚, 我會怨自己賺得少, 食唔起, 但就從來唔會走去投訴鮑魚昂貴.
好耐未試過星期六唔駛返工，優優閒閒，好爽
瞓到12點先至起身, 好番晒喇! 謝謝各位的關心!
伯母應該慶幸當日係換樓, 而唔係持有現金走左去租屋, 否則而家就會一殼眼淚.
我既最大資產就係自住間屋, 睇住樓價飆升真係好鬼開心, 乜都唔洗做日日升值, 好搵過番工, 想當日雷曼事件我間屋跌左50萬就已經唔肯跌, 而家已經反彈左超過100萬, 即係升突左, 大吉利事講句, 股市蝕一萬幾千都係濕濕碎, 樓價升幅都係番度.
我媽咪上月見到以下這段新聞：
▲美聯盧浩稱，北角半山賽西湖大廈 8座低層 B室， 1260方呎，作價 1440萬元，呎價 11429元。賣方 78年購入價 38.4萬元，進賬 1401.6萬元，勁賺 36.5倍。
媽咪在1978年以33萬沽出舊居，用48萬買入1200呎新居。今天，她層樓大概只值600多萬。她慨嘆當日應該買賽西湖大廈。我說，算啦，有早知，冇乞兒，冇得咁講。
我今日見到以下這段新聞：
▲利嘉閣龔彥峰表示，鰂魚涌太古城泰山閣低層連平台單位， 641方呎，成交價 465萬元，每呎 7254元。賣方 05年以 268萬元購入， 5年獲利 197萬元，升值 73.5%。
05年以248萬購入我的單位，今天都只是值350萬，但如買入太古城單位，已升值至465萬喇，證明投資真係好考眼光。