飲水
2010/05/14 09:42:31 網誌分類: 生活
| 貓饞嘴，卻並不熱衷飲水，貓有腎毛病，很多時都跟喝水不足有關。 正經裝在貓兜裏的，不知是甚麼問題，不是個個都肯喝，卻喜歡Lam水喉水，於是轉用一個大碗，每天更換新鮮的，骰仔和紅豆最捧場，次次換完立即跳上來搶，可是其他大爺興趣依然不大。有朋友用電動飲水器，但一樣不是隻隻大爺都受。 阿寶是野性飲水法，每當開完水龍頭洗手，水花四濺到洗手盤，寶爺就會跳上來，把盤邊四周的水花仔細舔乾淨；牠又試過喝洗菜水，洗碗水，插花水……總之不是正經給貓喝的，牠都有興趣，完全是偷腥本性。 阿Kidd和米米又是另一種刁鑽，獨愛洗澡水，每次洗完澡從浴室出來，水還未流走時，兩隻小鬼就跳入浴缸拼命舔，弄得手仔腳仔皆濕。不過只要牠們肯飲，又有乜所謂？ 關慧玲 |
 | |
以我個人經驗認為貓並非獨愛飲生水，佢地真正想要既係活水，所以水龍頭既水屬於活水，你响佢面前岩岩倒既係活水，响碗裡面放响度係死水，我見有貓奴去金魚街d金魚舖買果種風車型既偱環水器，佢屋企既貓見d水流動會飲多好多水 我屋企隻貓都係唔肯飲碗裏面既水，但佢除左飲水龍頭既水之外，佢見一開雪櫃會衝過黎等你倒凍水😂
sinsinho,
隻隻貓爺都係咁，等我等貓奴服侍呀。佢哋又未至於咁嘴刁，只係唔飲煮過嘅水啫，究竟係咪真係咁難飲??
關小姐 , 關家貓飲水叻唔叻架 ? 會唔會好似 garfield 同 貓豬咁要餵架 ? 其實唔明佢哋點解會鍾意飲生水 , 唔肯飲滾水 , 尤其鍾意 lam水龍頭 d 水 , 有時試過要開住一條線咁俾佢哋飲 , 飲夠先至關 , 冇辦法 , 唔飲水唔得架 , 佢哋肯飲就算喇 .
個大仔要新鮮換嘅水 , 重要係冇人飲過嘅 , 有人飲過就聞吓聞吓 , 坐喺兜水側邊 , 好大聲咁叫 "人嚟呀 !本大爺要飲水喇 , 我唔飲人口水尾架 ! 重唔換過 ? 渴死我喇 ! "
一定係生水，俾滾水一滴都唔飲，生水都要日日換，無就走去LAM水喉水。
chinchin & 各位貓友 , 其實我就呢個問題都問過診所嘅姑娘 , 佢哋話除非腸胃特別敏感 , 如果肯飲滾水就好 d , 唔肯飲又或者冇特別不適嘅情況下 , 香港水喉水嘅水質係可以接受嘅 , 當然有 d 舊樓水喉生銹嘅就當然唔得喇 , 就算冇煲過 , 起碼一定要清水先得架 .
cat cat , 咁冬天咪好易冷親囉 ? 不過日子有功 , 可能你已經鍛鍊到一身好武功 呢
.
關小姐 & sinsinho，
攪嘢呢！最初聽都覺得有冇攪錯，但係計落又唔係無道埋喎。雞粉比鹽嘅含鈉成份較低，而家好多營養師都主張我煮餸落雞粉取替鹽啦。
呢樣嘢我又無比較過，由第一日開始正式養貓我就開始用過濾水，因為我自已都飲濾水而唔會飲煲過嘅"滚"水好多年。等我番屋企試吓比D水喉水佢地試吓先！
蕃薯仔及Miu Miu獨愛飲水喉水, 每次沖涼佢哋第一次走入去霸住個花灑, 仲要飲好耐慢慢歎咁, 光脫脫嘅我就一直等佢哋走開先可以沖涼~
Borgee就每日一定要換新水先肯飲, 佢會一直坐喺個水兜面前一路叫住等你換新水, 仲要佢親睇住你換水先算數, 否則佢唔當你換咗新水~
至於Garfield就最麻煩, 成日唔飲水, 要我每日用針筒餵佢, 但佢每次見倒我攞住支針筒又走都走唔切, 唉~激死
chinchin, 用雞粉 ? 怕唔怕呢 ? 不過都係嘅 , 總好過唔飲 , 又唔係毒藥 .
大仔就鍾意飲新鮮水 , 一換水佢聞吓聞吓就飲 , 可能真係有 "鮮" 味掛 ! 不過佢唔鍾意飲 " 滾" 水 , 試過一兜"滾" 水 , 一兜水喉水 , 佢結果都係飲水喉水 .
關小姐同各位貓友 , 你哋 d 愛貓飲生水定飲滾水呢 ?
chinchin,
用雞粉咁有型?家裡幾隻小寶具總係鍾意飲唔正經嘅水，例如我飲嘅湯或者牛奶咁囉，真係激死人。
妳講得啱呀！貓貓飲水呢家嘢真係幾麻煩，但飲唔夠重麻煩，好彩我大部份嘅貓都對飲水機D水都OK，淨係得一隻麻煩友就要飲不綉鋼碗庒嘅水，可能佢鍾意一路照鏡一路飲水啦！
我又聽過一個偏方喎，係一個外籍獸醫教嘅，就係如果你隻點都唔飲水，可以試吓將好少量嘅雞粉，我地人煮餸嗰D呢，加入水比佢地飲，當然係好小好小份量啦，咁D水就有小小味，D貓就會飲多D水，總好過唔飲或者飲得太小。