發達

早幾日同同事講起抽中信1616．其間有同事覺得抽新股次次究抽唔到，又輸埋手續費，唔係好抵，寧願買Ｄ一買即爆升嘅股票．講到另一個同事買咗隻一個月內升咗一倍嘅股票．

於是一班同事更加熱烈討論點樣買股票發達．結論要發達梗係：  
１．買Ｄ短期內暴升  
２．有咁大買咁大，成份身家買哂，最好仲買突份身家，借錢買啦

你千祈咪咁做呀！

暴升即係幾多？一個月１倍？一日一倍？一個月５倍？夠你發達咪？除非你份身家有過百萬．唔係升得幾倍點夠退休？點咁發達？  
一次唔夠，冧多幾次，咪夠囉．  
不如過大海仲快啦．

其實，買股票買到發達有幾多人．記住畢菲特今日有咁多錢，唔係淨係靠炒股票賺．佢都係靠賺你哋股民Ｄ錢（資產管理費用）．除咗資產自己升值嘅同時，仲要不斷有資金投入滾雪球．香港股神中東股神本身就有錢．真正炒股票白身興家嘅，淨係得方展博．佢最後都要有錢佬幫啦．

仲有買股票，其實係買一間公司，公司嘅股價其實反映緊間公司嘅營運同資產情況．如果間公司短時間升一倍，唔通佢一日內可以比尋日賺多一倍，又或者佢嘅資產比尋日升值一倍．咁神奇？雖然就到復活節，你信唔信有耶穌再生表演五餅二魚？

投資股票，最踏實嘅目標，不過係抗衡通漲．作為打工仔小市民，日做夜做，係經濟金字塔最底層．搵嘅錢好可能夠日常基本開支，可以剩落嚟嘅唔多．如果衣食住行等必須品，因各種原因加價，我哋就會好被動．唯一可以做嘅就係著量投資於與日常生活有關係嘅公司．

今日投資咗一隻屬於衣食住行嘅公司，而且佢嘅增長係長期持續穩定雙位數字增長．

０９９５　４０００（＄　６．２５）　    
０６０６　１０００（＄　３．８１）　  
０１３７　１０００（＄　１．２６）