張文慈：有幾多個周秀娜？

法網群英 贏盡讚賞
笑談o靚模博出位，張文慈：有幾多個周秀娜？

　　有說演技需要時間浸練，相信不會有人反對，張文慈是我其中一位頗留意的演員，剛播出的電視劇《法網群英》讓我看到她的另一面，端莊、剛強的女督察，多得監製鄧特希。今天的張文慈變得開朗，平易近人，信主讓她學會感恩，不再抱怨和執着，她會細心分析o靚模現象、激讚羅守耀人品，任何事都處於平常心面對。

　　跟鄧特希合作，有幸改寫演技，沒錯，是改寫，先把過去的統統抹去，重新再來，是新的一頁，《法網群英》的演員深明「依賴」會累事，「飛紙仔」的拍攝過程讓演技極速成長。

　　「第二次同監製鄧特希合作，之前有部《俠骨仁心》，兩次都係『飛紙仔』拍攝，即係無劇本，考臨場反應，我唔係一個聰明嘅演員，記性唔好故然要將勤補拙，劇本一定要背得好熟，今次同鄧特希合作就成日『飛紙仔』，就無時間畀我慢慢學，焗住操好記性，雖然係咁，但拍出來效果真係好得，《法網群英》好睇係鄧特希功勞，佢剪得好。起初同鄧特希合作都好辛苦，我個人好Drama，感情澎拜嘅劇演得多，但鄧特希要求我演到好無嘢、淡淡然那種，即係明明係話鍾意一個人，但佢唔會畀我將句說話講出口，每件事都要淡然表現，其實唔容易！」

廝殺情侶鬥演技

　　當演員的，有誰不渴望主演的劇集有好收視、演出備受注目，只是很多時要集天時地利人和，張文慈說《法網群英》錯在亞視播。

　　「今次演女督察，同以往演開壞女人或女人味重嘅角色好唔同，事後發現可以演到一個剛陽味重嘅角色，感覺好正！演女警最難係要留意每句用言、動作，要維護警隊形象。案件方面都係大家很熟悉的，唔需要額外搵資料去補充，劇中同呂頌賢演情侶，好矛盾，佢係卧底，亦正亦邪，又係唔講出口嘅愛，演技大挑戰，不過最後又會互相廝殺。其實《法網群英》好多場戲都好正，剛剛開播時我有上網睇討論區，雖然收視麻麻但口碑好。坦白講，呢部劇放無綫播可能好不得了，但無奈亞視有慣性收視。」

讚羅守耀人品好

　　張文慈說，剛完成新片《殭屍新戰士》，與一班o靚模合作讓她感到這班後起之秀非常聰明，首度跟導演羅守耀合作的她，激讚導演人品好，給予她無限自由和信任。

　　「其實我好鍾意做殭屍，造型同動作都超現實，以前拍《我和殭屍有個約會》系列時已經好鍾意，好開心有機會重溫這種感覺。羅守耀導演好好人，畀演員好大自由度，對我有信心，任我發揮，佢真係好好，以前我拍過唔少戲，好多時要有人際關係先有機會，佢唔需要我擦鞋，用人唯才，好好！我覺得呢個年代嘅女仔好厲害，班o靚模好知自己想要咩，唔會做多餘嘢，好適合呢行生存，始終佢哋競爭大，要人留意好難，又有幾多個周秀娜吖？佢哋令我諗起以前初出道時好豬，豬咁蠢，成日遊魂，又呆下呆下，兜遠個圈行。不過，唔緊要，好在我傻有傻福。」

期盼主安排新戀情

　　今天的張文慈散發着一股愉悅氣息，讓我感到，信主真的可改變一個人，不再執著名利，活在當中，張文慈說她期盼愛情，祈求主會為她送上一個絕頂好男人。

　　「我已經滿約亞視，無續約，老實講，我真係好鍾意拍劇，有人搵我北上拍劇賺人仔，但真係好辛苦，記得有次北京拍劇，零下廿幾度著住件無得打底嘅旗袍演戲，凍到講唔到對白，去橫店又熱死，依家真係唔想捱，隨緣啦！以前個人好無安全感，好易亂諗嘢，信主後，有信念有期盼，相信主為我安排。工作上無特別計劃，自己都入行咁多年，明白好多嘢唔係我想點就點，感恩自己在內地仍有工作，可以維持生活，有嘢做就開心。我相信主會為我安排新戀情，最希望將來另一半都係基督徒，有共同信仰，又唔係喎，好似蔡少芬老公最初都唔信，後來都成為教徒，所以我唔會排除任何機會同可能。」

主持：黃柏高統籌：林永匡協力：彭燕燕、袁東亮、陳造宜

黃柏高

張文慈在《法網群英》中飾演一名剛強的女督察，
剛陽味道重，有別於以往的她。

《法網群英》劇照

張文慈大讚監製鄧特希，發揮了演員的潛質。