塞翁失馬又如何 涉貪案見盡人情冷暖 錢國偉：我上了寶貴一課

　　我敢說，錢國偉是個不可多得的創作人，主理的綜藝節目贏盡掌聲，為觀眾帶來歡樂，非一般監製，沒架子，人緣好，出入有大批美女紅星相伴，誰不羨慕？說到在廉署的「威遠行動」被捕，錢國偉說是時運低，然而，塞翁失馬又如何？今天的錢國偉離開無綫，轉投電影戰場，開拍青春喜劇，延續使命，把美女和歡樂帶給觀眾，大家不妨拭目以待。

　　我欣賞錢國偉，這位金牌監製絕非浪得虛名，炮製出《四葉草》、《美女廚房》和《獎門人》等熱爆節目，他完全掌握年輕人的潮流脈搏，如今把舞台移師到電影銀幕，觀眾有福。

　　「我大半生喺TVB度過，吔住麵睇台慶睇梁朝偉做戲，你問我，最難忘一定係做《獎門人》，成班人玩咗十幾年，有邊份工會畀錢你去玩？真係好多謝TVB，發生件事（「威遠行動」）我冇嘢喎，冇怪任何人、任何機構，只係我時運低。依家有咩都做，會幫側田、伊健搞演唱會，亦有同內地媒體合作搞搞新意思，亦籌備一部愛情喜劇，心目中已有人選，但唔講住，預計年底開拍，最重要係個古仔，劇本真係要好小心處理，要顧及內地巿場，所以要度得好先開工。」

學習居安思危

　　掛上「金牌監製」美譽，地位超然，身份固然敏感，錢國偉難免招禍，在廉署的「威遠行動」被捕，清者自清，兩星期前終獲撤銷保釋。

　　「發生件事令我明白到『人有不測之風雲』，當你開心時又點會諗到居安思危？當初自己都驚，會慌，以為事業就此終結，畫上句號，廿幾年功績隨水漂去。你問我有冇學懂甚麼？小心啲囉，對人處事都要小心，嘻嘻哈哈、大癲大廢係我優點，唔識防人係我最大缺點。屋企人冇講過一句，係支持，自己冇嘢做有時間就陪佢哋飲茶，依家冇事，阿爸都返咗內地。」

圈中朋友好現實

　　從前，錢國偉身邊美女如雲，紅星朋友多不勝數，出事後，酒肉朋友雞飛狗跳，患難見真情，錢國偉看得淡，說他沒所謂。

　　「託賴，冇人問我『你有冇罪？』身邊朋友係百分百信任，志偉、伊健係好到冇嘢講，記得初初出事，有位高人叫我去拜神，咁個人慌，咩神都拜吓啦，去咗四個廟，依家都要去還神。呢個圈好現實，嗰排真係有啲唔出現，冇事又係咁搵你，我冇諗人唔好，可能有啲朋友唔想煩我先唔搵啫，做人豁達啲好。」

笑談女人緣

　　常說，錢國偉有女人緣，身邊總有一兩個由他發掘入行的士多啤梨蘋果橙，還有那批天使女，整天在身邊團團轉，說羨慕，還不如替他心煩。

　　「人在江湖，身不由己，講都唔信，遇過好急進嘅女仔，黐埋嚟博新聞，唔係未試過被人擺上枱，真係驚，唔敢試，依家見到個女仔好積極黐埋嚟會不自覺退縮，呢個世界好危險，唔係女仔先要防。女友有冇詐型？唉！做得呢行，冇拍拖幾年啦，拍到個明白自己真係好難，你諗吓，嘩，同廿個港姐出埠咁開心，轉頭又華裔小姐又四葉草，日日都忙，忙喺其他女仔身上喎，女友點會唔嬲，上一個女友都係咁分手。好多人話羨慕我，唔係晒命，我想講，周邊太多女仔都好煩，女仔多是非多，作為男友人要識得處理，唔可以表現得唔公平。」

統籌：林永匡
協力：彭燕燕、袁東亮
場地提供：Palcoristorante（訂座電話：26188383）