止賺止蝕

extracted fr Luk Sir

可以舉一舉炒作的例子，早前有幾隻事件急跌股，例如霸王(1338) 和瑞年(2010) ，都是受一些產品質素的傳言困擾，股價一度大插。我都講過，從炒作角度看，這些股份可以留意。先睇霸王，我話過想炒不要在急跌時入，等佢跌定反彈，彈完再跌唔破底時才入，霸王第一跌低位4.29元，反彈後再跌至4.27元，都算守到底，之後再彈上4.4元左右牛皮，這便是合理進入的時機。這些位入，一成止蝕3.96元，當時霸王快公布業績，開大開細好快知。結果出業績普通，多派2.5仙特別息，本周一開番市，高開4.43元，之後不斷回，收4.1元，這是近期低位，醒目少少不用等3.96元止蝕位，出完業績公司發埋功都頂唔住，收市前都可以走人，4.4元入，4.1元走，輸6.8%。你唔走就大鑊啦，之後佢不斷插，昨日收3.12元，由此可見6.8%已經好抵輸，唔走揸到而家輸29%，這就是炒撈底股的風險。霸王的進出位不難把握。

另一隻係瑞年，出事後低位4.51元，彈番上5元樓上，有一段時間在5.1至5.2元中間牛皮，無再回落尋底，合理入貨價約5.15元，10%止蝕4.635元，但之後反覆上，公布業績後一直抽，高見6.64元，但抽得急回得亦幾急，上周五亦高見6.55元，但單日轉向急回，一度穿過6元，收6.08元，回得咁急，炒友可以止賺走人，以收市價6.08元計，賺18%。事後才知是持股主要基金減持，唔走再回，昨收5.79元，唔走賺價減至12%。

用呢兩個例子想解釋，炒股有風險，結果不肯定，但只要方法正確，以上面兩隻股計，一隻蝕6.8%，一隻賺18%，夾埋有賺11%以上。但揸住唔走到而家，夾埋要輸17%。呢個故事告訴我們，炒股方法正確好重要，和聽消息的關係不是很大。方法不對，多多錢都不夠輸。

陸羽仁