曾任電視台高層兼捧紅過不少明星的馮美基（May），02年退休後專心鑽研廚藝。今年2月，在朋友慫慂下，加上其前得力助手剛巧想轉行賣曲奇餅，兩人一拍即合，May便將只在家裏宴客當作飯後甜品的HandMade曲奇餅及蛋糕公諸同好，在灣仔開了首間曲奇餅店May'sCookies（一口曲奇）。May的老友兼今次訪問的客席主持朱慧珊好奇地問老闆娘有何做曲奇餅的心得，穿上橙紅色裙子跟店舖十分相襯的May開懷地說：「老土咁講，材料一定要靚，靚料加心機作出來的曲奇一定好食。」 主持：黃柏高
統籌：林永匡
協力：廖思慧、袁東亮
Paco︰「其實早於餅店開業前，May的招牌曲奇及蛋糕已被城中名人明星熱烈追捧，是名副其實的星級出品。店舖開業兩個月便已大受歡迎，除藝人朋友爭相幫襯外，May姐的低糖曲奇更衝出香港，在上海世博展銷出售，是少數能打入上海世博的新品牌。然而店舖名稱為何叫「一口曲奇」？獲無數識食的紅星鍾愛的曲奇究竟有何製作秘方？同樣愛美食的阿珊較我更為緊張，坐下不久便已追問這位女強人。」
朱慧珊：「我整嘢食唔叻，但我好鍾意食嘢，第一次試阿May的曲奇實在有驚為天人的感覺，一啖啱啱好，鬆化又唔漏，究竟有咩秘訣？」
馮美基：「老土咁講，煮任何餸都一樣，最緊要材料靚，整椒鹽大蝦都要啲蝦新鮮先會好食，我啲曲奇只有6款，但全部用靚料，牛油同朱古力都係法國出品，加上美國杏仁及意大利麵粉，每件都係師傅每日HandMade限量製作，唔落防腐劑確保新鮮。至於為何將店舖命名為『一口曲奇』，全因為我老公，因為佢好鍾意喺梳化同牀食曲奇，每次都食到成地碎，好乞人憎，所以我就決定將曲奇整到一啖啱啱好，所以就改咗呢個店名。」
推介DoubleChocolate
朱慧珊：「我知道店舖暫時有6款口味，包括牛油、花生牛油、檸檬、杏仁、特濃朱古力同碎朱古力，邊一款係你心水首選？除此之外，店舖還同時售賣蛋糕，不過，你哋好招積，蛋糕一定要兩日前預訂，突然心血來潮想食肯定無可能，點解做生意有錢都唔賺？」
馮美基：「首選當然係DoubleChocolate（特濃朱古力曲奇），因為係採用法國Valrhona61%朱古力，所以曲奇充滿濃濃朱古力香，但又唔會太甜，所以呢款賣得最厲害，其次係杏仁味。我哋啲客男女老幼乜都有，有婆婆專登由九龍城過嚟買，附近啲OL同學生哥又好鍾意買嚟食，雖然地方隔涉啲，但我相信曲奇品質有保證一定吸引到客人返轉頭。另外我哋啲蛋糕全部都係Signature，特別喺鍾楚紅最鍾意嘅招牌脆焦糖蛋糕（CrunchCake），鍾記同我講，佢話蛋糕有糖，焦糖又有糖，Cream可唔可以唔落糖呀，我覺得佢提議好好，試吓用法國淡忌廉而唔用傳統甜忌廉，中和脆焦糖的甜味，甜度啱啱好，味道變得更完美，因為我要求好高，希望做到質量控制，千祈唔好做壞個名，所以蛋糕一定要兩日前預訂。」
煮得一手好菜的女強人
Paco︰「馮美基去年推出的食譜《最愛宴客》加印至十多版，並長期榮登各大書局暢銷書榜；今年推出的《星級宴客》亦已加印至第四版，其食譜以簡單易做為賣點，獲得一致好評。究竟怎樣才算是一本好食譜？又有那款美食食譜可以推介給讀者呢？」
馮美基：「好多娛樂圈嘅朋友都成日嚟我屋企食飯，好似朱玲玲同梁朝偉等，佢哋個個都叫我出食譜，咁我咪試吓出囉，其實『簡單易煮』一向係我設計食譜嘅宗旨，好少Step，好適合喺屋企煮，我成日都話，太複雜嘅菜式就不如出街食啦。我心水推介就一定係炸吉列豬扒，只需要用普通喺街市買到嘅豬扒，然後用蛋醃過夜，煮出嚟相當鬆化，呢個方法喺當年九龍凱悅酒店個大廚教我；另外，梁朝偉最鍾意嘅叻沙啦，都易整又好味，有時偉仔會同我講：『喂，聽日可唔可以整碗嚟食吓。』哈哈，咁我又會整畀佢食囉。」
朱慧珊：「長遠計劃會唔會開餐廳呢？」
馮美基：「嘩，唔會嘞，可以開呢間曲奇店已經好開心，做人最緊要開心嘛。」 | 
