曹格：跌低要識起番身

        《曹格Sensation世界巡迴演唱會》香港站將於11月20日假亞洲國際博覽館舉行，自去年跟側田發生打鬥事件後，曹格回歸老家馬來西亞閉關一年，努力改掉壞習慣兼將失落化為創作靈感努力寫歌，新專輯《曹之在我》及世界巡迴Show同於11月出擊，「我要做一個以音樂為主，好有Quality同好有Heart嘅演唱會。」事發前一直沒有想過歌手身份有影響社會能力的曹格說：「我有諗過放棄，為乜啫？但身邊嘅人無放棄我，更拖住我隻手行返出嚟，做人跌低咗，最緊要識起番身。」說畢，曹格開懷地笑了。

        主持：黃柏高
        統籌：林永匡
        協力：廖思慧、袁東亮

        曹格回來了。這個曹格跟一年前的他判若兩人，說着曾闖下的大禍、說着如何擊退藏在內心十數年的心魔，當事人恍如說着別人的故事，坦然面對，一笑置之，就讓曹格來一次自白，向讀者們訴說巡迴演唱會將如何挑戰自己、闖禍後的心路歷程以及如何放低對至親爺爺的遺憾所帶來的多年鬱結，最重要是他會以一個過來人身份勸勉各位，跌低了，不要緊，拍走滿身的泥濘重新上路，明天絕對會更好。

        ShowOff演唱會

        曹格：「邊度跌低就喺邊度起番身，所以世界巡迴Show選擇以香港為首站，其實去年演唱會已決定加場，亦做晒記者會，但因為發生事故，老闆羅生好好，佢即刻取消，佢覺得嗰個時候上台對我係好殘忍，佢叫我Ready好再同佢講，而家，我一切準備就緒，近日忙為演唱會揀歌，廣東歌英文歌都會唱，呢啲歌亦肯定只會在演唱會先出現，另外，一直強調想做有Quality同有Heart嘅演唱會，所以今次台上會有三隊唔同風格嘅Band助陣，風格更多變化，而我就會以唔同嘅Vocal去挑戰佢哋，時而Jazz時而清唱，好似一個ShowOff咁。嘉賓會有，但未必搵側田，因為我同佢合作過好多次，無論佢同我嘅演唱會，都經常擔任對方嘅嘉賓，我想同唔同嘅歌手合作，好似我好少Rock，都想搵一個Rocker合作，好似相識十幾年嘅周國賢，發覺佢啲嘢愈嚟愈好，但唔知佢想唔想，因為Rocker通常好有性格，哈哈。」

        沒有理由再飲酒

        曹格：「未出事前，覺得自己只係一個歌手啫，依然可以結婚生仔，去Party，想點就點，對社會無責任，我嘅歌你哋鍾意聽就聽，出事後好奇怪，點解會變得咁嚴重，原來我有影響社會嘅能力。當時有報道話我曾經拎刀斬我老婆，真係嚇死我，好影響我老婆啲屋企人，人哋將個女嫁畀我，佢哋會點睇？我個仔啲老師又會點睇？所以我唔會再提屋企人，對佢哋都係好事。其實同阿田件事，可以話係我人生中最好嘅一件事，如果唔係，我到而家都唔知自己做緊咩，嗰刻我成個人醒晒，可以畀我有反省機會。其實我無刻意戒酒，只係搵唔到理由去飲，可以話係自我挑戰，我想證明畀自己睇，只要肯做一定得。」

        解開爺爺的心結

        曹格：「休養一年，除咗畀我反省外，更令我放下多年心結。未夠一歲時，父母離婚，我一直由爺爺湊大，到我離家，由紐西蘭、加拿大去到台灣，更患上抑鬱症，日日飲醉，當年爺爺離開，屋企人都唔敢畀我知，驚我發癲，到搞好晒後事先同我講，呢件事放喺心裏面好耐。舊年出事後，我個心重新洗牌，又不斷諗究竟我人生裏面邊一Part出錯，加上我一年無飲酒，日日好清醒，又見過兩個心理醫生，同屋企人關係Close番，明白爺爺對我好重要，所以新專輯亦作了一個叫《爺爺》的作品，希望呢首歌可以讓呢件事LetItGo。」

        時間不等人

        曹格：「我心態已完全調整好，時間唔會停，係時候LetItGo，之前我有一段時間放棄自己，我覺得：『為乜吖？』但好多人無放棄我，仲拖住我隻手行返出嚟，好多人有勇氣去道歉但無勇氣去接受人哋嘅幫助，其實無所謂㗎，錯咗唔緊要，最重要點樣面對自己，識企返起身，接受人哋幫助係好緊要。」