香港Model界被一眾混血模特兒雄霸多時,但隨着o靚模勢力彈起,混血模與港產名模恍如變成上世紀的名詞。多年前已成功轉型的楊崢(Vanessa)說:「無話刻意轉型,只係有機會就想嘗試唔同範疇。」曾擔任旅遊節目主持、DJ及將出飲食書的她,早前便夥拍著名玄學家李丞責穿梭祖國多個省市,解構中國歷史名勝,目的是希望在播映中的TVB新節目《中華福地》中讓觀眾更了解極富趣味性的中國歷史。 主持:黃柏高 統籌:林永匡 協力:廖思慧、袁東亮
從成為模特兒一刻開始,楊崢已較其他名模更有先見之明,除主力模特兒工作外,亦會涉獵其他媒體,拍電影做主持,由「開心大發現」到「更上一層樓」,以及正在TVB播映的「中華福地」,所主持的節目非常多元化,說Vanessa是百足名模非常貼切。
楊崢:「做電視節目主持最大好處係可以入到屋,以前只有留意時裝嘅人先會留意楊崢,但做主持,觀眾係會認得你把聲,最記得去街市買餸嘅時候,本來大家都好留心咁買緊嘢,但我一開聲,啲人全部望過嚟,一副『果然係你』嘅表情,好得意。可能,做Model純綷係演繹一件衫,但做主持就有好多自己嘅元素加落去,好似學識及喜好等,表現出嚟嘅我立體好多。」
變身海綿盡吸養份
目前播映中的「中華福地」,由楊崢夥拍著名玄學家李丞責共同主持,兩人走遍內地多個省市,去解構中國歷史名勝,再輔以玄學角度,為觀眾提供一個嶄新的學術性旅遊節目。
楊崢:「我哋為節目逗留內地一個月,走訪過南京、蘇州同杭州等地,每日由朝早六點拍到夜晚十點,攀山越嶺又日曬雨淋,係有啲辛苦,但卻令我眼界大開。雖然我自細喺香港讀書,但對中國歷史認識唔深,有機會同李生一個咁有認識嘅人合作,自己就好似一個海綿咁,喺佢隔籬不斷吸收,學到好多嘢,作為參與者,我都好期待呢個節目,因為以前去內地旅行,去到啲皇帝嘅陵,最多都係影張到此一遊嘅相,原來個陵嘅背後有好多引人入勝嘅古仔發生,好想知多啲。又例如我哋去過嘅濟公廟,以前睇關於濟公嘅戲,只係覺得好有趣,今次我哋好認真研究佢嘅歷史,發現佢係一個好厲害嘅人物。」
一腳踢才女
除了有口才外,Vanessa還懂揸筆,原本她的著作將在今年書展面世,但由於訂機票、約廚師、訪問、影相、試食及寫稿也由當事人一手包辦,令這本講述歐洲各地米芝蓮餐廳的書要稍後才能推出。
楊崢:「本書籌備咗一年,去咗歐洲十幾個城市,訪問咗好多米芝蓮三星大廚,當中領略到,點解有人願意花幾千蚊去食一餐飯,因為係一個好好嘅經歷,等於我哋花好多錢去睇一套好期待嘅歌劇,飲食同藝術一樣,應該用欣賞嘅角度去對待,好多嘢唔可以用錢去衡量,正如我去採訪一樣,食物同環境好正,但無人同你分享,好若有所失。好記得去過一間位於巴黎嘅餐廳,叫做GuySavoy,雖然餐廳好細,但好似一個博物館咁,因為廚師將自己喺世界各地收藏番嚟嘅嘢Show晒出嚟,入到去除咗食大廚嘅手工外,更可以睇到佢個性,感覺好特別。」 |