PACO名人會
PACO名人會
PACO名人會

《義海豪情》奸角出位 金剛直言愛上雯女 麥長青:我係好乞人憎!

2010/10/25 08:44:41 網誌分類: 生活
25 Oct
        無綫劇集《巾幗梟雄》去年風靡全港觀眾,最高收視達47點,成為上半年收視之冠。該劇在《萬千星輝頒獎典禮》中更連奪6項大獎,除了得到「最佳劇集」,黎耀祥更憑該劇「柴九」一角,連奪「最佳男主角」及「我最喜愛的電視男角色」,鄧萃雯亦憑「四奶奶」得到「最佳女主角」。由於首集的成功,續集《巾幗梟雄之義海豪情》未開拍已成為萬眾期待之作。監製添哥李添勝早已講明,今次劇中兩大奸角,包括麥長青飾演的「廣州警察廳科長梁非凡」和金剛飾演的「日軍大佐向山鐵也」會是全劇最爆角色,今日就請兩位大奸角親剖拍攝時的心態和精采場面,讀者萬勿錯過!

        主持:黃柏高統籌:林永匡

        協力:袁東亮、杜淑霞

        去年《巾幗梟雄》造就了兩大奸角,包括飾演「大奶奶」的謝雪心和飾演「必文」的敖嘉年,憑該劇成功彈出,兩人更在頒獎禮中奪得「最佳女配角」及「飛躍進步男藝員」。今次續集《義海豪情》麥長青和金剛兩個「衰到出汁」的奸角,相信亦會吸引觀眾邊鬧邊睇,因為連他們談到角色性格,已經講到眉飛色舞,齋聽都覺得吸引。

        麥長青:「梁非凡係一個乞人憎高層,有功佢就領,有好嘢佢就貪,人哋老婆靚佢就搞,假公濟私,蝦蝦霸霸。好彩觀眾由《閃電傳真機》睇住我大,知道我未致於咁大奸大惡,只係大家最憎嗰種衰人。」

        金剛:「我好厲害做大佐,未試過做大佬,唔係好慣有啲怪怪地,最初大家以為我係鍾意雯女,其實我哋係利益關係,有錢搵我先會照顧佢,之後冇錢搵,就會同佢反枱。」

        角色夠立體

        麥長青在電視台多年,跟添哥合作不超過5次,金剛更加是首次跟對方合作,但兩人談到這個殿堂級監製,不論對他編寫的角色,以致本身人品,兩人都讚不絕口,更感激對方給他們今次發揮的好機會。

        麥長青:「當日添哥話預埋我玩,真係好開心,雖然未定角色,有份參與都開心,因為對添哥有信心,知道會成為經典。收到劇本更開心,佢畀咗個血肉角色我,寫得好立體。以前做反派,做件壞事就算,但今次好多細節,例如人哋畀一千蚊,我只畀廿蚊手足分。嗰個年代大家都貪,喺大仁大義面前,祥仔就有人性同道德,我就完全冇,就係咁分好人同壞人。」

        金剛:「首次同添哥合作,以為佢好威嚴,其實好好人,佢乜都話得、得,真係乜都得㗎!最唔好意思,係講日文做得唔係咁好。」

        麥長青:「你好勤力學講日文,呢樣值得表揚。(我係好勤力寫貓紙就真!)試過將貓紙係直情貼喺鏡頭前面睇住講。」

        戲裏戲外感觸多

        添哥講過《義海豪情》比上輯更多高潮位,麥長青和金剛講到必睇場面時,亦數不完,麥長青特別多感觸,因為有不少場口都勾起童年回憶。

        麥長青:「有場講我畀金剛同祥仔玩,攞我嚟當靶試槍,嚇到標尿,呢場真係好笑!但角色嚟講,係男人嘅屈辱,引發佢一定要向祥仔報仇。之後講我俾啲手足笑瀨尿,同嘉年喺泥漿度打,拍得好辛苦,喺南生圍拍完冇水沖涼,好遠先有水喉,兩個人好似o靚仔住木屋區時,除淨條底褲用水喉沖身,真係好笑又過癮。」

        金剛:「有場戲講我細佬死咗,飲咗好多酒,麥包突然出現殺我,全部對白都係日文,真係好難講,但係好有感覺。另外一場,講日軍輸咗,好唔甘心咁走,我仲要講啲好寸嘅嘢,兩場戲嘅差別好大。」

        多謝祥仔雯女

        在《義》劇中麥長青和金剛除了有不少對手戲外,主要跟男主角黎耀祥和女主角鄧萃雯同場大鬥演技,他們都大讚兩名好戲之人名不虛傳,更笑言戲裏戲外跟兩人擦出火花。

        麥長青:「最多對手戲係祥仔,多謝呢個師兄,由出道一路教咗我好多嘢,好多人問,對住佢會唔會有壓力?我從來冇壓力。由《西遊記》到《秀才遇着兵》到今日,佢畀好大信心我,叫我放膽去做,對住佢反而好輕鬆。其次就係美儀,佢係唯一見到我善良同情感一面,有場都好激,講祥仔知道美儀喺樓上,搵槍要脅我,當住全世界面前講,用咩鬼計呃美儀。」

        金剛:「我同雯女最多戲,我係訪問認識佢,嗰時佢都話我好笑。我哋拍第一場時,佢見到我咁正經話唔慣,仲忍唔住笑。佢想練國語,喺現場會同我講國語。佢仲會畀意見我話,叫我試下另一種演繹方法,其實佢顧自己就得,唔駛顧我,佢咁做令我好warm,同佢合作完,都有啲愛上佢!」Paco麥長青金剛

        黃柏高

        
■左起:金剛、Paco、麥長青
■左起:金剛、Paco、麥長青
■所謂奸角易上位,《義海豪情》中,麥包、金剛分別演活兩大奸人。
■所謂奸角易上位,《義海豪情》中,麥包、金剛分別演活兩大奸人。
■麥長青
■麥長青
■金剛
■金剛
回應 (0)
我要發表
user