陳奕迅：我好想演惡毒奸人！

        說陳奕迅唱功了得，從沒人質疑，這位絕對有資格代表香港的歌手，威盡海外。今天，他演戲獨特，有戲味，唱而優則演，演出總有驚喜，即將上映的《戀人絮語》，陳奕迅演被愛情迷惑，周旋在范曉萱和林嘉欣之間，需知道，這種愛情三角錯最收賣人心，演的睇的皆心動，初執導筒的曾國祥夠保險，碌爆人情卡，玩串感情瓜葛，既窩心又心酸，誓要搶奪觀眾淚水。

        主持︰黃柏高
        統籌︰林永匡
        協力︰彭燕燕、袁東亮、陳紀瑩
        場地提供：港島海逸君綽酒店
        陳奕迅服裝提供：D-mop

        自小受父親曾志偉影響，曾國祥對電影充滿熱誠，所謂「虎父無犬子」，處男作《戀人絮語》賣愛情，把錯綜複雜的感情關係串成故事，感人又細膩，電影先拔頭籌，在釜山國際電影節贏盡讚賞。

        曾國祥︰「電影以幾個短篇愛情故事穿插而成，早在05年已出第一稿，可惜初稿故事太單薄，不斷被打回頭，唯有不斷修改。爸爸好支持我，雖然無特別畀意見，但好戥我開心。演員方面，真係花盡心思，陳奕迅配范曉萱、林嘉欣，謝安琪配彭于晏等，每一對都好特別，好耐冇見嘅陳潔儀能帶出新鮮感，平日個樣好chok嘅陳偉霆表現令人驚喜，呢條線比較奇情，後生仔愛上死黨阿媽，我諗觀眾會鍾意。」

        陳奕迅得償所願

        陳奕迅說，多得曾國祥拙合，終有機會跟范曉萱和林嘉欣合作，更激讚這段三角錯關係，細膩動人，劇本到手一刻，已打動他。

        陳奕迅︰「我好欣賞曾國祥和郭子健兩位新導演，佢哋由present劇本一刻已經很有誠意，準備充足，故事完整。拍攝呢部電影，我最難忘係同林嘉欣嘅一段情，之前一直希望同嘉欣合作，佢係一個好專業、好投入嘅演員。劇本寫得好好，重遇舊愛依然存在好感，呢一Part好有真實感。當中有一場同嘉欣嘅親熱戲，好精采，可惜因為要配合情節而被剪走，希望會放晌DVD。另外有一場同萱萱冷戰，好寫實，亦都好好睇。」

        渴望演奸角

        我很喜歡陳奕迅，他的戲流於自然，風趣幽默，參演過的電影很多元化，每次演出都讓人印象深刻，估不到的是，他最渴望演大奸角，還即場示範「奸狡」表情。

        陳奕迅︰「之前多數飾演搞笑、胡鬧或者沉默角色，唔知點解導演都鍾意搵我做被害者，仲成日要我跑嚟跑去。好想佢哋搵我做奸角，相信會好好玩！其實我係可以好毒好奸，即係溫兆倫的毒，羅蘭姐的奸，陰險得令人發毛。」

        范曉萱母親聲援

        個性獨特的范曉萱鮮有參與電影演出，當她得知好友曾國祥開戲，第一時間答允演出。最令人驚喜的是，范曉萱請媽媽主唱電影主題曲，大膽有創意。

        范曉萱︰「今次拍戲真係好開心，同向佐最多對手戲，個樣亦正亦邪好似『龍五』，哈哈哈！陳奕迅又成日逗人開心，有時輕鬆到令自己諗『我是在工作嗎？』，同這個團隊合作真係好舒服。至於搵媽咪唱主題曲，主要係因為作好主題曲後，細心一諗，唔應該由我把聲呢首歌，因為我已經化身做電影中一角，首歌需要由一個更客觀成熟嘅人演繹。」