錢小豪：我係新人唔怕捱！

　　隨着武打動作片回歸，硬橋硬馬的功夫演員一個個重新浮面，錢小豪是其中一員，在新片《殭屍新戰士》中硬拼元華，打鬥場面讓人熱血沸騰，拳腳動作快狠準，賣的都是真功夫，錢小豪說這次流的汗水特別多，無他，導演羅守耀的動作片，出名要求高，貨真價實，就連宅男女神周秀娜都披甲上陣，絕不欺場。

主持：黃柏高
統籌：林永匡
協力：彭燕燕、張詠森

　　羅守耀導演熱愛動作電影，過去投資執導的作品令人讚歎，我很佩服他，能夠排除合拍片的種種掣肘，拍出自己喜愛的電影，新片《殭屍新戰士》睇準歐美巿場，賣拳腳真功夫。

　　羅守耀：「都係賣動作，食住歐美殭屍熱潮，《吸血新世紀》都係行呢套，賣CG賣淒美愛情，我的是賣真功夫，老實講，港產殭屍片已經好耐，要加入現代元素，殭屍唔再係殺人吸人血的，係好人，故事寫元華飾演的兇殘殭屍四出追殺同類，廝殺過程好精采，同錢小豪、蔣璐霞打得好激烈。」

　　錢小豪：「以前就捉殭屍，今次係正式做殭屍，角色好人性化，導演將我塑造成一隻好不覊，鍾意追女仔好hea的殭屍Daddy，衫褲造型好靚好有時代感。」

激讚錢小豪

　　說得沒錯，動作片賣的是真功夫，動作科班出身的錢小豪對決元華，沒留力，拳拳到肉，交足功課，搭埋打得狠勁的蔣璐霞，場面精采叫絕。

　　羅守耀：「錢小豪係第一次合作，比預期中好，估唔到佢仲打得咁勁，動作夠快又亮麗，元華唔使講，交足功課，大部份打鬥場面都係實戰，殭屍擁有超人類力量，打鬥要好狠勁，飛身先踢腳，撞穿牆等，動作要好流暢，吊威吔唔係單一點橫飛，係點對點咁飛，動作指導李忠志功不可抹，對打場面好有睇頭，最精采一定係最後決戰。」

屠房決戰元華

　　錢小豪說，這次恍如重生，靠動作功夫食胡，埋位自不然拼搏到底，拳風狠勁，汗水固然特別多，始終是一個發圍機會。

　　錢小豪：「依家我當自己新人，咩都做，唔怕話要捱，講真，導演真係好叻，完全知道條路點走，賣點清晰，動作片梗係要打，華哥身手好唔使講，大家唔留力去打，好有火花，相隔廿幾年再重聚，感覺幾『懷舊』，同華哥決戰場戲拍足五日，大熱天在密封屠房拍攝，要吊好多威吔，蕩嚟蕩去，真係好辛苦，流好多汗水，武指李忠志的動作設計真係無需要懷疑，度得好靚。」

周秀娜搵命博

　　打女唔易做，來自內地的功夫女蔣璐霞博到盡，深得導演歡心，宅男女神周秀娜亦唔輸蝕，谷胸上陣玩倒吊，任人舞。

　　羅守耀：「周秀娜真係得，搵命博，戲中好多倒吊場面都親身上陣，又唔錫身，觀眾可能唔知，倒吊動作真係好危險，我都唔知佢係真唔驚定唔識驚，吊威吔頭落地，唔係講笑。蔣璐霞功夫打得好，全國武術冠軍，好肯打。講真句，好多主流電影選角上，一定係甄子丹，再唔係就排隊搵李連杰，我就貪新鮮，鍾意畀機會新人，吳京拍《蘇乞兒》幾勁呀，邊個話唔得先。」

　　錢小豪：「我都係睇報章雜誌先知邊個係周秀娜，呢個女仔好肯做，唔會識驚又唔會嗌攰，要佢由廿幾呎高位吊威吔飛落嚟都肯制，換着第二個女仔未必肯。蔣璐霞捱到苦，會好認真問我同華哥意見，好肯學。」

Paco，羅守耀，錢小豪

黃柏高