PACO名人會
PACO名人會
PACO名人會

捐窿捐罅食好嘢 少年食神林澄光:大家口福同享!

2010/11/15 08:45:43 網誌分類: 生活
15 Nov

        說「識飲識食」是種本事,絕不為過,這個「識」意謂不需花錢歎貴菜也能嚐到佳餚,「少年食神」林澄光就有這本事,還出書開咪講飲講食,人氣熱爆。最近更入屋為無綫主持飲食節目《為食一條街》,把平日你我不為意的隱世食店公諸同好,主旨是「平、靚、正」,即是你我睇到食到那種,為能口福同享,這位食神日日晨早上山下海,捐窿捐罅,反轉玩足個半月,節目今晚首播,大家萬勿錯過。

        主持:黃柏高
        統籌:林永匡
        協力:彭燕燕、袁東亮
        場地提供:Palcoristorante(電話:26188383)
        服裝:RMCbyMARTINKSOHOH
        髮型:[email protected]

        稱得上「食神」固然識食,林澄光Michael講究飲食,曾因愛吃泰菜而遠飛當地學廚,自小嚐盡珍饈百味的他,最愛吃的,原來是火鍋。

        「我由細到大都鍾意食,睇身形已知我絕非浪得虛名,媽媽是台灣人,四歲那年起,每年暑假都在台灣度過,食唔停。講真,泰國菜真係好啱香港人,天氣悶熱,滴住汗咁,好正!我首選係打邊爐,你諗下,同枱食飯各自修行,幾時埋位食都係熱辣辣的,唔使怕有人遲到餸菜會涼,今時今日,打邊爐已成為香港飲食文化。」

        主打平價美食

        講飲食,林澄光的新節目《為食一條街》主打街頭地道美食,上山下海鑽進各區橫街小巷,捐窿捐罅,每集節目各有特色,處處有驚喜。

        「各區英雄雲集,無論住邊區都有好嘢食,香港人好得意,係唔怕揸車去食好嘢,『平、靚、正』係節目賣點,即係我Michael食到的,唔需要等出糧先去食,好似柴灣新桂香出品,三十蚊有找的叉燒飯,肉汁鮮嫩,一試就知龍與鳳。又或者車仔麵啦,香港人集體回憶,街頭巷尾都會有,各有風格,大角咀佳佳車仔麵好出色,豬大腸唔係冰鮮料,豬皮、豬紅好入味,炸芋丸簡直一流。再唔係就愛民邨天馬快餐,車厘哥夫班底,熒光汁豬扒飯由細食到大,呢度仲有,但你一定要試個漢堡包,塊麵包燒到有啲焦,塊牛肉肉汁豐腴,一啖咬落去,肉香四射。以上全部都係你我可隨時去食,花費不多,味道絕頂。」

        接手開廠做麵

        食出位,林澄光笑言朋友都視他為飲食顧問,也因識食,讓他不斷鑽研飲食,得意作,莫過於自家製豉油雞。

        「我自己都鍾意煮食,撚手菜一定係豉油雞,揀雞開始要講究,雞唔可以太肥,太肥豉油難掛身,兩斤半重已夠,太大太細都唔好,浸雞前要先做按摩,手手腳腳郁下捽下,鬆下肌肉,要選用日本萬字醬油。講食,食材好重要,你有冇發現今時今日出街食麵,陣梘水味好勁?我找到一間廠出品的蝦子麵係最好食,用天津鴨蛋,絕無加食用梘水,食落口陣蛋香味好正,彈牙,後來麵廠執笠,為免蝦子麵失傳,我接手頂來做,那位老師傅做麵五十年,我分了半間廠給他,要他為我繼續做麵,如今每年中秋做冬,過年過節都會送蝦子麵畀朋友作禮。」

        關注豬柳蛋漢堡

        說到「少年食神」這稱號,林澄光確係夠格,須知道,光吃是不夠,要食就要夠講究,估不到的是,今天還有人關注那區快餐店的漢堡包水準高低。

        「記得有次同朋友打邊爐,成班人有講有笑,食至尾聲森美先嚟,當時大家講紅酒經,講講下,森美突然話肚餓,我就推薦佢去土瓜灣近浙江街麥當勞,試下個豬柳蛋漢堡,即叫即整,森美大讚之後,小儀又叫我上節目講飲食,講講下,大家稱呼我做『少年食神』,其實都幾開心,可以同人分享自己的飲食心得,因為我覺得食飯係享受而唔係忍受,幫到人我一定會幫。」

        

        

 
■林澄光
■林澄光
■「少年食神」林澄光捐窿捐罅介紹街頭地道美食,加上推介食肆全部屬於平民價格,將「識飲識食」這個詞語草根化。
■「少年食神」林澄光捐窿捐罅介紹街頭地道美食,加上推介食肆全部屬於平民價格,將「識飲識食」這個詞語草根化。
■(左起)高海寧、陳敏之及森美小儀(右一、二)都愛跟林澄光到處品嚐美食。
■(左起)高海寧、陳敏之及森美小儀(右一、二)都愛跟林澄光到處品嚐美食。
 
■早前,Michael與高海寧跟鏞記老闆甘健成飯聚,細說賣燒鵝世界馳名,燒鵝以76刀斬71件的絕技。
■早前,Michael與高海寧跟鏞記老闆甘健成飯聚,細說賣燒鵝世界馳名,燒鵝以76刀斬71件的絕技。
 
■新桂香:電話:25561183,柴灣道345號金源洋樓地下17號
■新桂香:電話:25561183,柴灣道345號金源洋樓地下17號
 
■天馬快餐:電話:2711 7760,愛民邨商場地下G6C
■天馬快餐:電話:2711 7760,愛民邨商場地下G6C
 
■佳佳車仔麵:電話:2787 9569,大角咀福全街14號地下
■佳佳車仔麵:電話:2787 9569,大角咀福全街14號地下
 
 
回應 (0)
我要發表
user