《情迷戇豬男》

早兩日去睇《情迷戇豬男》，未開畫之前有個"高人"同我講，套戲前半幾好睇，後半的節奏就慢咗啲.......聽到之後，即時唔敢抱任何期望入場，一心諗住睇完權相佑show完肌肉就當番本。

套戲係講兩個青梅竹馬，見到對方有拖拍，先至慢慢發現自己對對方嘅"愛意"，結果當然係兩人最後排除萬難成為一對喇。其中仲加咗段韓片不能夠少嘅條死人冧樓撞車斷腳橋，照咁講應該好睇極有限，但呢個世界上，有樣嘢叫做:橋唔怕舊最夠要受。雖然條橋係就係舊咗啲，但係完全中晒一眾少女。睇完之後，就即刻有個妹妹仔嚟同我講:雖然好老土，但係我受。


雖然橋段一般，但勝在拍得流暢自然，唔會過份催淚；中間穿插住嘅"兒時片段"，亦夠晒溫馨搞笑兼窩心，兩個主角─權相佑同金荷娜有不少發癲位都夠演得夠放，嬴得不少笑聲。但係個中文字幕實在令人失望，好幾段都睇到人搲晒頭。

完場之後撞番個"高人"，同佢講話套戲都冇佢講得咁差啫，算中上之作，可以畀八十分。點不知個"高人"竟然話之前同我講的意見係經過悉心計算，免得我有過高期望，睇完出嚟會失望，所以事先打沉咗我，等我覺得有驚喜。"高人"即係"高人"，一個字─「得」。