雞肋股

上星期終於沽出持貨超過半年嘅金輝（0137）．佢可以話係我買股票以來，持貨最耐嘅一隻股票．當初買入嘅原因係平同高息．今次沽出嘅原因係貴（ＰＢ＝１．６５）同唔派息．雖然０７年航運股仍然處上升週期，但係過去股價升幅（１７５％）已遠超ＢＤＩ升幅（１５０％）．未來升幅將有限，加上唔派息，如果繼續持貨風險將增加．

之前買入過嘅皖通高速（０９９５）同堡斯龍（０５９２），都好快咁無聲無色被沽出．原因並非唔睇好．而係想借機重整規則，觀察清單同組合．由原來著重１）ＰＥ，２）息率，３）ＲＳＩ，轉為１）增長，２）息率，３）ＲＳＩ，４）ＰＥ．因為市場已好少低ＰＥ好股．

其實，喺ＢＬＯＧ內亦多次提到買入一Ｄ股票後，好快就沽出．沽出後，股價有唔錯嘅升幅．檢討過後，發覺係注碼問題，如果注碼太細，固然會嫌無肉食；注碼太大，資金唔夠分散，當股票一跌就會驚，一驚就止蝕．又或者見異思遷，見有其他好嘢，就忍唔住換馬．所以日後買賣嘅對象，會係Ｄ一手值ＨＫ＄２０００至ＨＫ＄６０００嘅貨．一買最少買３手（方便分批止賺）．當然隨著資金上升，對象嘅身價亦可以提高．

皖通高速會愛惠國家１１．５計劃及中部崛起．惠記（０６１０）亦都一樣，而且仲有中國地產概念．唔直接買路勁係因為佢一手價錢太貴，而且喺高位未有調整．

堡斯龍會喺下次業績前，反幅向上．是龍是蟲要睇變革後業績．成功嘅機會好大．但既然要估估下，不如買隻唔駛估嘅．同樣係做細路生意，仲要係做ＢＢ仔生意嘅隆成（１２２５）．最近公布業績已成功化身火鳳凰．

陽光信託（０４３５）有增長有高息．

如無意外，今次組合內嘅股票除非下跌１０％，又或者未來業績唔可以持續高增長．否則會揸貨直至超買，先會分段沽出．