發展空間受阻

全屋最細你地以為係好事咩~ 我講咩都冇人聽, 講咩都俾人話係錯既 (個「人」係二哥)... 26歲啦, 仲當我好唔識野。返工都返左咁多份, 係咪好似佢地想像中咁唔識野先? 佢地唔當我係大人, 我都好難當到自己係/ 好難做到大人做到既野。嚮出面成日只做到助理, d人當我係d讀完中學既女仔 (我個size似初中生), 當我好細個, 又係冇人會聽我講野, 發展唔到潛能。

又或者我個人唔鍾意俾人過度關心, 因為就算係關心, 我都唔想講太多野 (唔鍾意人地八卦)。以前做英文助理時, 黎自澳洲既肥鬼婆成日搵我陪佢傾計, 佢講好多佢屋企d野, 佢以為我都會講我屋企d野, 但真係唔想講, 好唔想講私隱出黎。佢如果尊重我就唔可以期望我會講囉... 佢強迫我講, 只會令我情緒低落, 影響嚮工作場所既形象、減低每日既工作「件數」, 以效率為優點既我唔想千年道行一朝喪。不過唔講, 個鬼婆又話我唔理佢, 佢同d主任講, d主任同我照肺。做咩要搞成咁先? 整到我果份工做到成日哭, 因為鬼婆對我既定型影響左其他人對我既觀感。鬼婆太口疏la。

講屋企點解咁難講? 想深一層, 依家又唔想講太多。總之, 全屋最細你地以為係好事咩~ 我講咩都冇人聽... 26歲啦, 仲當我好唔識野。返工都返左咁多份, 係咪好似佢地想像中咁唔識野先?

依家屋企人只會嚮傾一樣野時唔會鬧交, 就係講bb姪女。我好悶既時候畫佢出黎, 絕對冇人會鬧我又畫公仔~（有時我只係想plaｎ下嚮暑期班要教咩，呀媽都叫我唔好用咁多電腦……但真係有需要架嘛） 有佢真係好, 減少好多磨擦。第日同同事或者高級d既同事講照顧小朋友, 又有野傾, 唔使傾咩化妝品、護膚品、日劇、台劇、明星既事呢d無聊野...

講真, bb出世之後我一份工都冇做過 (要實習, d時間好難就... 之後又搵唔到la)。好在今個暑假大嫂可能再返工, bb多d時間同我呀媽呀爸一齊 XD 好神奇架! 爸爸雖然唔鍾意bb係女仔, 但昨日無端端走左去搵bb玩, 話bb前日對佢笑喎... 一個「識笑」、識「飛吻」又識搵人同佢玩、識錫人既bb, 邊個唔鍾意丫...

我細個時都好開心, 但我冇咁「社交型」, 大概因為大嫂同d朋友整左個「playgroup」, 一到四點就同d 媽媽去行商場, 成堆bb車走埋一齊, 又成堆bb走去公園拍寫真...

如果我呀媽都咁社交型就好la。不過我呀媽對bb用品既衞生就講究d, 而且我呀媽做家務好勤力。等我嚮度讚下佢先!!! 針冇兩頭利。

堂細佬大學畢業（個有錢同大把兼職既堂細妹都係今年畢業）, 佢都搵到野做la。我... 期待緊快d有成績表。成績表大概7月中先有, 註冊做教師先要有成績表同畢業証書, 而基準豁免又要果d文件。點同堂細佬丫... 佢間u至少真係香港既, 而且佢讀到建築, 擺明成績好過我多多聲la。

真係唔知點面對d嬸嬸。我選擇「隱形」, 盡量唔出席d聚會, 直到我「衣錦還鄉」 (可能要再等一年先得)~

其實男仔要面子, 女仔都要架ma。我做唔黎好多工作, 因為我把聲同個樣... 所以我對工作好揀擇, 因為我知道就算去見工有d工都會唔請我, 我點解要去食檸檬先。而且我讀左教院, 就俾人定左型, 社區中心既人都話「學校同社區中心唔同」, 唔通佢地都唔覺得有critical thinking既人可以解決到呢個問題? 唔通佢地唔相信我可以分辨到? 我真係咁難俾人相信咩... 每講到呢d野我二哥就話我框住自己。咁我覺得樽鹽緊要d, 因為我性格比較男仔 (細個時跟住呀哥周圍走, 又嫌d 女仔玩既野好悶) , 最似既就係自尊心。我自尊心太強真係唔可以打工打得好, 但鬼婆整到我缺乏自尊心既時候我真係好似活死人喎~ 唔想只為金錢勞役, 唔要做奴隸喎!

同樣地, 唔想二哥獨尊朝政。呀爸呀媽都睇唔過眼。我就覺得真係好想離開呢個家。