大戶插過龍?

自己心入面記著, 日日都可能係大升市既開始, 日日都要問自己需要執行大升市大買long call未......

周二大跌後過左一日半市, 個市好似跌到呆左, 自己睇覺得係之前外資大戶沽得太勁, 市場上冇對手同佢地打, 震走晒d人之後呆左, 可能國內大戶真係水緊, 本地大戶明知鬼佬做淡又睇定d, 個市呆晒, 照計鬼佬月中未到就由22700殺落嚟, 學陸sir講就係"心急做世界", 由依家開始禁住個市到月底, 如果中間有咩好消息都幾犯本, 睇怕最後一星期可能再插一兩棍之後先等結算下月再玩過....

國內大戶水緊對個市真係影響好大, 2007年果陣大陸錢同鬼佬錢日日玩博擊, 大市一日升千幾點, 另一日又趺一千, 後日再升返二千, 記得陸sir當年叫果d市做"波子機"式彈來彈去市, 極難睇, 依家就唔同, 相當明顯係鬼佬搵唔到對手, 插完冇人反撲.....所以我始終覺得, 大市要真正大升, 一定要有大陸大戶落場玩埋一份, 前題係大陸股市要夠火熱同埋大陸既大戶水頭充足, 依家暫時睇嚟, 除非上証上返3500樓上, 否則牛三式大升唔係咁易出現, 至多好似上年炒qe2咁升返3千幾點, 不過咁都好夠了......

因為估計大戶係淡底, 投資倉方面本來想換緊d"增長股" 不過依家d民企咁鬼牙煙, 我d內銀又平到震, 內銀要彈既話力度都唔會太差(雖然自己覺得內銀就算真係彈都可以係水尾先彈, 好似上年咁, 升晒資源同其他板塊先到內銀), 不過作為長線投資內銀都ok啦, 唔轉太多了

期權部處方面, 睇下月尾有冇得博反彈, 如果結算倒數6-7個交易日又有急趺, 趺得夠勁而又仲有4-5個交易日先結算既話, 或者可以買少少即月價內call博下正股有冇~5%反彈(因為趺過龍或者平倉), 不過結算前大升幾乎可以唔使諗的了

另一個部處, 可能係睇下今個月最後一棍插到幾多, 如果真係夠多, 或者買下月價外call博佢好似5 6 7月咁, 插完下個月月頭先彈一浸, 如果果一浸有一千點反彈, 個股應該都有6%升幅, 買lc博中應該都有一倍賠率, 假設趺得夠勁反彈機會有50%, 都有足夠值博率了