古巨基將於10月7至8日再踏紅館，舉行第5次個人演唱會「Amazing World世界巡迴演唱會2011」，對基仔而言，這是一次很有意義的演唱會，因為1991年是他入行的日子，由當年的黃毛小子到今日成為天王巨星，這個20年確是值得好好慶祝及紀念。眾所周知，基仔一向計仔多多，為了給予觀眾新鮮感，基仔絞盡腦汁，以加強版勁歌熱舞作引子，誓要帶歌迷們齊齊進入他為大家建立的Amazing主題樂園，預祝樂園大爆特爆。
主持：黃柏高
統籌：林永匡
協力：廖思慧、袁東亮、張詠森
場地提供：文鼎壹號（31532186）
化妝：HubeiHair@AdelierdArris
髮型：MarkIp@Hair
基仔一向很多鬼主意，這個入行20年的演唱會，當然要費盡心思，今次他親自構思主題，將紅館化身成主題樂園，帶領觀眾進入多姿多采、最Amazing的世界。
古：「香港人一向好忙，但忙完之後都好鍾意搵個地方去輕鬆吓，所以我好想觀眾拎住張飛嚟睇Show可以開開心心。我就諗，閒時好多人都鍾意去主題樂園玩，咁我就諗到將主題樂園定為演唱會嘅主題，當中有唔同嘅場館去演繹唔同部份嘅歌。從我演唱會嘅Poster可以見到當中概念，Poster同樣由林海峰設計，海報中嘅我喺膊頭爆出好多主題樂園會出現嘅得意公仔，畀觀眾感受到演唱會將會好繽紛同視覺豐富。」
驚喜熱舞跳不停
今年是基仔入娛樂圈20年的重要日子，亦是其加入英皇後的第一個演唱會，雙重意義下，當然不容有失，所以一向擅長唱深情歌的他，亦要秘密練好「舞」功去回饋支持多年的Fans。
古：「為咗配合演唱會，都會出一張新專輯，而剛派台嘅歌就係叫《爆了》，係一首好有未來世界Feel嘅快歌，首歌係畀大家去紓緩壓力，因為香港人都活喺壓力中，無論工作或生活，所以大家預備爆之前，可聽吓呢首歌去紓緩吓，而呢首歌喺演唱會中，將會放喺太空館入面，再配合埋一Part勁歌熱舞，希望能夠畀到驚喜大家。另外，當然會跟觀眾去分享不同時期嘅我，一齊進入時光隧道，去聽我不同時期嘅代表作。」
基仔渴望引你笑
最近基仔跟英皇再續新約，加盟新公司兩年來，基仔推出過粵語及我很喜歡的國語專輯《大時代》，亦有拍攝內地劇，加上10月的巡迴演唱會，工作非常忙碌，相信在未來日子，基仔將會走得更高更遠。
古：「同新公司合作好順利亦好愉快，所以都無乜討論過程先去續約，不過，除咗音樂上，都希望同演戲同步發展，我都係啱啱先喺蘇州拍完劇番嚟，呢套《歡樂元帥》係一套古裝神話喜劇，自己一直多拍愛情片，做深情角色，其實我一直好鍾意演喜劇，因為拍喜劇好開心，人都生猛啲，而且拍愛情片易掌握，但拍喜劇要引人笑唔易㗎，所以都好期待劇集嘅推出。」
人生大事未計劃
已3奪「最受歡迎男歌手」了，事業有成的基仔都是時候踏入人生新階段，成家立室實理所當然。
古：「工作嘅佔據令我無空間去計劃，好似我啱啱喺內地拍完劇番嚟一星期，我都未有時間番屋企見父母。但靜落嚟會諗，會嚮往婚姻，但一要工作，睇到未來日子嘅工作表，又會無空間畀我去嚮往了。」
| 
