叮囑散戶切忌溝貨，陸叔：內地消費股有得諗
2011/08/29 08:51:11 網誌分類: 娛樂
| 5年前「名人會」的第一位嘉賓就是人稱「陸叔」的陳永陸，他是目前香港最給力的獨立股評人之一，有「股海明燈」及「散戶黃大仙」美譽。5年後的今日，因為受歐美債務危機恐慌蔓延，全球股市一片風聲鶴唳，彷彿第二輪金融危機捲土重來。所以，特別邀請這位有三十多年投資策略經驗的老朋友抽空接受訪問，跟浮沉在股海的讀者們分析戰況，用「明燈」去帶領他們踏出苦海。 主持：黃柏高 統籌：林永匡 協力：廖思慧、袁東亮、黎寶倫 近數月金融市場波濤洶湧，投資市況非常兇險，各國政府和各地投資者都會問同一個問題：怎麼辦？ 陳：「香港資金流向係全世界最快，所以股票市場中，3、4日就可以跌3000點，仲要好多非恒指成份股都跌咗一半。好似對沖基金，舊年我都同大家講咗，世界上最頂尖嘅對沖基金經理好睇好香港嘅市場，個個以為得米，原來係嚟搞亂香港。因為市場資金流得快，同埋歐美經濟差，以前幾差都好，歐洲同美國都頂得住，但今次唔同，08年之後，佢哋為咗谷起經濟印好多銀紙，但後遺症就係通脹，而通脹令到成本增加，咁樣經濟一定會衰退。但我覺得呢個係一個循環，等對沖基金有機會轉身，盡量做沽空嘅行動，壓你個股市落去，喺下低兜返啲平貨去平返個倉，係無辦法㗎，大家要接受依個現實。」 勿沉迷保險金融股 通脹猛於虎，港府立即以100億港元的「通脹掛鈎債券（inflationBond，簡稱iBond）」來打老虎。究竟現在還有甚麼股票值得投資呢？ 陳：「自從政府出個iBond到依家都仲升緊，iBond收息好囉，因為政府包底呀，你唔會輸錢㗎，你依家買咩股票都輸錢㗎啦，自從有iBond之後，個市未停過跌，政府做啲嘢每次都累街坊㗎。我始終覺得依家揀股票，要揀關於內地生意上唔會受歐美債務或資本增值影響嘅，好似高消費嘅零售股或汽車代理股，我同大昌行主席許應斌傾偈，佢話內地啲Bentley賣到斷晒貨，排成年都未必有得坐，個個落訂二百萬都肯等，歐美經濟差對佢哋無影響。記住一樣嘢，好似六福呀，東方表行嗰啲都跌得咁勁，因為佢哋有價值，畀人捧到上天，到大家一齊跌，佢哋就跌得慢同耐，但到啲基金股都無貨沽嘞，就強勢都要沽，所以跌得好快，有平貨可以執，所以大家做吓功課，搵一啲內地消費股反而有着數，唔好再沉迷咩保險同金融類股份嘞。」 溝貨愈溝愈淡 小股民對股市態度不同.銀行外整日都人頭湧湧，有小股民認為股市的波動太大，暫時不會買賣手上的股票，但亦有小股民認為可以趁低吸納，購入一些實力較強的股票。究竟小股民們何去何從呢？ 陳：「股民們擔心一定有，但散戶投資者要記住，如果你用好平嘅股份去換一隻好貴嘅股份呢，有機會貴嘅會落後，平嘅會上先，但係一定要睇呢個行業係咪真係有用，另外，唔好胡亂溝貨，因為只會愈溝愈淡，你保持自己嘅實力，係唔需要將手上買咗嘅貨沽出，情願保持呢個蟹貨。一路溝呢，你又輸double，輸多好多錢㗎。」 樓市跌極有限 為遏止炒風，政府不斷出招令樓市下調，但樓價仍然高企，小市民能夠上車的機會依然渺望。 陳：「樓市下調係啱㗎，但幅度係幾多呢？去到沙士嘅機會好微，其實依家1億以上嘅樓，百分百係內地人買㗎嘞，加上而家咁低利率又咁高通脹，我沽咗啲樓咁我買咩呢，一係買金唔會買股票，風險大嘛，所以啲樓係跌極有限。不過今次全球個調整快又急，經濟又唔好，會影響中下價嘅樓，下調幅度大約10至15﹪，到出年，內地經濟如果放寬，我預測到季尾，啲錢一樣湧返入嚟，所以樓價調整幅度同時間都係有限。」 |
 | |
| |
 | |
 | |
| |
 | |
 | |
| |
 | |
回應 (0)
我要發表
