棟篤笑第五彈驚嚇登場 林海峰:最驚觀眾無反應
2011/09/05 08:52:42 網誌分類: 娛樂
林海峰(Jan)開TalkShow其實已是信心保證,觀眾搶飛亦是指定動作,所以10月17-20日舉行的《是但噏我好驚》只進行優先訂票已因反應太好而確定由四場加至六場,明日將會正式公開售票,不想飲恨的讀者們記得一早去買飛。不過,這個阿Jan的第五次卻令他有點驚,驚內容不夠好之餘亦「好驚觀眾無反應。」不會吧! 主持:黃柏高 統籌:林永匡 協力:廖思慧、袁東亮 林海峰每次開TalkShow也有其主題,《求其大合唱》後又有講婚禮的《我願意》,今次開Show撞正萬聖節,Jan亦順勢以此作為今次Show的主題。 林:「咁啱10月咪試下整個萬聖party囉,但其實內容又唔太關事,只想在紅館開一個大party,所以會加插一個末日派對環節叫『是但扮,求其驚』,觀眾可以約埋三五知己一齊扮鬼扮馬,有機會上台同我一齊玩,因為想觀眾入場可以癲番晚,搞呢個Party係想畀理由大家去放縱一下,放工之後有機會去變身,輕鬆吓,不過,識得睇我嘅人年紀應該有番咁上下,郁動範圍好細,今次就可以畀個理由大家一齊郁下,其實真係好驚觀眾無反應。」 唱歌加跳舞驚退飛 雖然林海峰講得又演得,但他明言今次只會齋講,不過仍然會安排FullBand上陣。 林:「載歌載舞?我驚觀眾退飛喎,其實上次做咗,今次唔會嘞,我唔會話特登為個Show加啲乜,諗咗內容先,內容最緊要。你知我每日都要做節目,日日都要發掘新鮮嘢,所以每日都要儲啲題目,留番啲好材料放喺Show度。不過若然下次再有機會做,我希望回歸伊館,場地細啲可以拉近同觀眾嘅距離,互動性可以更多。」 未開Show先擔心 第5度開TalkShow,林海峰坦言籌備過程一次比一次困難,皆因觀眾對他的要求較以往更高,不過最令他擔心的反而是傳媒的好心做壞事。 林:「其實優先訂票嘅第一日個股市開始跌,嗰刻我都驚一驚,究竟仲有幾多人會留意訂飛呢件事?好彩,反應都幾好。不過講到最驚,一定係第一場Show後嘅報紙同周刊都會替我個Show整一個文字版,所以買唔到飛嘅觀眾唔使驚,好快有文字版畀你哋睇。」 創作如下廚 瓣數多多的林海峰自言記性開始差,創作的習性亦跟以往有些不同。 林:「創作有時會有一Team人,有時只有自己,記性開始差,所以一有Idea就要寫低,而家度橋就好似廚師買餸咁,今日菠菜靚就係菠菜,到煮餸嗰陣就睇吓當日買咗咩靚材料,啱整咩食就去整,我嘅創作習性開始變咗咁樣,有朋友父親做廚師,佢都係打開雪櫃見到有咩先諗整乜嘢,係另一類嘅廚師風格,見到咩炒咩,各師各法啦,所以意念嘅嘢點嚟,講唔埋,有時有好多,有時得好少,照煮啦,好睇廚師本身嘅修為。」 |
| |
| |
| |
| |
回應 (0)
我要發表