邊有學校係萬能架...

針對每種唔同既症狀, 要對症下「藥」, 處理既人需要對資料極為熟悉。之前做過一間小學, 佢地有個躁狂加自閉既小朋友, 會打人、咬人、踢人, 果份工我做左2日就唔做~ 因為我對自閉症既認識好唔夠, 而且相信就算上好多課程, 都要好多嘗試同失敗, 先可以比較成功。但有咩係100%架? 根本冇可能。冇可能100%處理得好。

今次見到東涌有間中學既學生「自殺」既新聞, 睇到一段:

「教育局發言人指出，校方可根據《學校行政手冊》指引，參考建議照顧患精神病的學生；局方亦有提供為中、小學教師而設的學生訓育及輔導證書課程，以認識、預 防及處理有學習、情緒及行為困難的學生。自2007至08學年起，局方每年均舉辦「以心理學方法處理學生行為問題的有效策略」課程，以加強教師了解學生在 不同發展階段的需要，去年亦與醫管局合作為教師舉辦講座，邀請精神科醫生和教育心理學家分享對患思覺失調學生的支援。」(http://hk.news.yahoo.com/%E8%B7%B3%E6%A8%93%E7%94%B7%E7%94%9F%E8%A3%81%E8%87%AA%E6%AE%BA-%E6%AF%8D%E6%93%AC%E5%91%8A%E5%AD%B8%E6%A0%A1-%E6%8C%87%E5%AD%90%E6%82%A3%E6%80%9D%E8%A6%BA%E5%A4%B1%E8%AA%BF%E4%BB%8D%E8%99%95%E7%BD%B0-%E4%B8%8B%E5%91%A8%E5%B9%B3%E6%A9%9F%E6%9C%83%E6%8A%95%E8%A8%B4-213700002.html)

其實呢, 好多野要實踐,而好多野就算係社工都搞唔掂。我提到果間只做過2日既學校, 有3個社工, 加2個主任, 都要一段時間先平伏到個小朋友。呢d同其他學生思考方式/ 敏感度 (或者其他字眼更好, 但暫時用呢d字眼先) 唔同既學生, 要猜到佢地下一步會做咩真係好難, 於是就好難準備。

「訓導主任林錫榮曾稱處理精神病患學生感到很大壓力，且資源不足。」

呢句好同意呀~ 同一間學校可以包含過度活躍、專注問題、品行症、對立反抗症、讀寫障、語言障礙、社交障礙等等不同特質既學生, 同時兼顧, 需要幾多個「專家」先得? 如果你相信同一個人可以應付晒咁多野, 或者同一team人可以應付晒咁多野, 咁果team人一定頭髮白晒、好多學問、經過好多實踐機會先得, 但佢地會走左去做「教育心理學家」la! 人工高過做老師嘛。至於d主任, 仲有好多野要兼顧, 於是照顧特別學生多數係俾教學助理、支援教師或者助理教師果d做架la喎~ 呢d位既人雖然都會受過培訓, 但明顯地, 要同時處理咁多野, 係會「愛莫能助」, 因為人係有極限既, 老師或者助理或者社工都同樣係人,唔係神, 好多野有心都做唔到、做唔切、做唔黎。

好似叫學生食藥呢件事咁丫... 之前實習, 見d老師真係開口問d專注欠佳既小朋友早上食左藥未... 好在多數小朋友都好合作, 話食左,但有一個過度活躍既冇食, 又周圍整同學、拎住支尖筆追住同學...好在個訓導主任食得住個小朋友, 個小朋友只係會嚮訓導主任面前停落黎。因為, 個小朋友既呀爸好縱佢, 老師寫小朋友既手冊話欠交功課, 個呀爸寫手冊投訴老師呀!

對於個中學生跳左落黎既事, 我覺得個中學生好慘, 因為佢會受到好多歧視, 而如果佢學校真係就食藥既事做過d強迫既行為, 相信個中學生會好難受, 令佢跳樓都唔出奇既。我睇左篇新聞第一件想到既事係: 「原來死左, 都唔可以解決問題, 仲可以衍生更多問題: 好似, 佢既死冇令大家少左負擔, 而係令佢媽媽覺得好唔抵, 要申訴。」如果我係佢媽媽, 我都會好唔開心, 養到個仔咁大, 讀左咁多書, 咁就冇左喎~ 但係咪應該追究學校呢? 兩方面同樣有難處, 應該用諒解既心態去再商討後事。

作為局外人, 我講既野當然好似比較理性。只係想講下感受姐...香港政府做咁多機建, 但教育既資源同撥款好似好火喎! 大家知道一個要處理各種奇難雜症既教學助理/ 支援教師, 嚮今年勞工處同其他求職網站上寫既薪酬只係4500-8500一個月? 呢個係政府撥俾學校既數目。大家覺得夠唔夠? 我好好彩, 讀完教院, 唔使搵d咁低人工既工, 但香港依家有好多需要特別照顧既學生, 每個老師都唔會放棄(只要個心仍然有把火), 都希望盡量幫到佢地。政府, 你對呢件事, 想講d咩? 我認為政府係我地可以追究既人...唔知大家點睇?