鬼屋不驚魂

當～我～數～到～三～

就一齊對住個月光大聲叫，哇～哈～哈！

等～登～等～登～

＊南瓜王阿Jack

    周五晚，兩公婆帶花茶夜探黑色迪士尼，我們買了奇妙處處通，要好好用。太太一收工，我們便立即起行。到步時剛好開始黑色遊行，由《怪誕城之夜》主角南瓜王阿Jack打頭陣，猛咁叫我地對住月光大聲叫「哇哈哈」。可惜因為是國慶前夜，未到萬聖節，所以我投入唔到。不過，我地一家都係南瓜王粉絲，在我們心目中，南瓜王幾時都係咁有魅力。

    跟著南瓜王的，有破爛布娃女孩Sally真人跳舞，接著是《睡公主》之黑女巫宣告夜晚係屬於佢，然後有鐵勾船長、紅心女王和哈迪斯等奸角出場。遊行結束前，當然係要治癒被嚇親的小朋友心靈，所以由米奇朋友坐住鬼船出來跟小朋友見面，音樂也變由銅管樂隊擔當，氣氛炒番開心，一切按方程式炮製。

    夜晚，迪士尼員工好努力扮鬼，同遊人拍照。其實扮鬼都幾唔易，又要俾到客人刺激，又怕嚇親客人。如果嚇親一個空手道三段，一個手刀飛埋黎，扮鬼果個都幾慘。

    在Banquet Hall晚飯時，遇到太太學生一家，後來一齊排隊探鬼屋《黑色馬戲團》，花茶全程要我抱住，走完全程見哂Ｄ鬼，都唔知佢擘大眼睇到幾多，難得是入鬼屋之前，大家心情緊張，兩個小朋友互相壯膽，一陣話你保護我，一陣又話我保護你，氣氛很好。

    至於我自己，對遊樂場鬼屋似乎都幾免疫，原因是我有過以下兩次探鬼屋的經歷：

（一）2002年富士櫻小學校

＊富士櫻小學入場門券

    某年，一家製作公司在柴灣商場搞了一個幾本格的日本小學式鬼屋，講真，個人認為搞得唔錯。入場有一位鬼魅的日本女學生招待我們，她拿著對講機，售票後似乎立即通知了藏在小學裡的「朋友」，準備出來嚇我們。

    當時我在柴灣上班，跟一大班同事有男有女來玩，不知怎的我被推到最前帶頭。一個佔地不多的廣場，經製作公司調整，變成一條蜿蜒曲折的黑暗迷宮，裡面有齊日本小學許多讓人發抖的課室。後面一位男同事推住我，再後面是幾位女同事在害怕，我當然不能怕埋一份，否則不前進，就不能離開迷宮。

    不過，前進不容易，因為迷宮暗到伸手不見五指，所謂氣氛，我認為90%是黑暗造成。

    走呀走，我們穿過不少課室。有沒有可怕的生物科教室呢？我忘記了。只記得某個課室的桌椅，令我好懷念，是在昏暗燈光下的小朋友桌椅。另一個最記得的地方，就是夜裡小學校的洗手間……

    甫一進入，眼前兩個緊閉廁格，其中一個突然打開，出來一個人形鬼魅，我和鬼魅頭撞頭，也許我習過太極，撞擊後站得比較穩的是我。鬼魅定一定神，繼續完成他的工作，去驚嚇在我後面的同事。啊，不嚇我了……

    從這一次開始，我似乎就對鬼屋裡的鬼免疫了。怎麼說？只係一名打工的鬼，大家都係辛苦搵食而已QQ

(二）某個暑假FUN FUN騷

    這一次玩鬼屋，是最可憐的經歷。我是一個人去，唸住體驗下鬼屋的滋味。誰知，進入鬼屋之後，殭屍們都避開我，儘挑兩人一組不停尖叫的可愛女孩來嚇。結果，我大約一分鐘就離開了鬼屋迷宮，途中沒有任何殭屍認真的嚇過我一次。我心想：我係咪可以要求回水？

    扮鬼的，講到尾只係一些Part time打工的少男，青春期荷爾蒙的旺盛令他們追逐妙齡少女，避開一齊付了錢進來玩的中年阿叔。絕望了，我對青春期扮鬼嚇人賺外快的殭屍少男絕望了！

＊　　　＊　　　＊

滿意鬼屋

    令我最滿意的鬼屋，講到尾還是中二那年去東京迪士尼裡的鬼屋。那是一座西式鬼屋，進去後二人一組坐到卡車上去，途中看到滿屋的幽靈紳士和淑女在跳舞。最記得是去到某個鏡子前面，鏡中的自己旁邊的親人，突然變成骷髏頭。

    負責鬼屋的招待小姐全是蝙蝠小姐裝扮。整個鬼屋旅程，非常賞心悅目。最記得係鬼屋外頭有一塊石碑，記載了一個令人戰慄的傳說。

    石碑大意是這樣：

    這墓碑記載著吸血鬼伯爵99位妻子的名字，沒有他第100位妻子的名子，因為吸血鬼伯爵給她殺死了。

    令人留下最深刻印象的，不是炫目的視覺音響效果，而是令人戰抖的傳說！

＊Namja Town貓鬼屋

    另一個感覺良好的鬼屋，是2007年帶花茶去的東京池袋Namja Town鬼屋。那鬼屋是兒童向，小朋友Feel比較重。開始前大家先看一段影片，一隻鬼魂黑貓Tama-chan被其他妖怪捉住拿來BBQ。悲慘的黑貓向小朋友求救。接著，小朋友們就一人捧著一隻電子黑貓，在鬼屋裡走來走去，答一些鬼怪問題，從而拯救鬼魂小貓咪Tama-chan。

    我相信是天父的恩賜，三歲的花茶後來參加抽獎，竟然一下子就贏了個大獎，得到一隻Tama-chan手布偶呢！我同花茶話：係你救左Tama-chan嫁。

＊　　　＊　　　＊

今次夜探迪士尼，黑色馬戲團班主在我排隊時突然同我Say Hello。

我回頭：吓？

鬼屋不驚魂！