真是「一命二運三風水, 四積陰德五讀書嗎」?(一) <舊文轉貼>

生平喜好易學亦熱愛打麻雀, 在當中, 我悟出一套道理來, 真是「一命二運三風水, 四積陰德五讀書」嗎? 希望能同大眾分享, 以此拋磚引玉.
 
人生就好似打麻雀一樣, 好多人以為可以一打就打足十六圏(64舖). 但我少年時到同學家中偷打麻雀, 打到一半, 人家阿媽殺到回家, 我們便要立即收檔, 結果只是打得十幾舖就無得玩.  又有否試過打完十六圏, 加埋冧庄, 摸和, 加埋打了七十幾舖, 仲有時間打多幾舖. 所以, 一個人可以打幾多舖牌, 不到你本人話事. 唯一可以說的分別, 是後者選對了時辰開枱. 落地喊三聲, 好壞命生成.
 
入正題, 先談「一命」: 好命的人, 就好似你舖舖牌, 一開手就已經八九隻萬子或者筒子. 命差的人, 一開手就筒索萬, 樣樣有齊, 兼一樣長度. 雞胡格. 當然不代表你不會食糊.
 
而「二運」: 可分為天運, 地運, 人運. 天運者時代也. 生於不同的年代就有不同的運數. 正如女人在現今的時代, 地位有所不同. 正如上例, 為何要擇那日去打牌? 又年少時, 你打的可能是一二亳, 到你大過仔, 你會打一二十也不定.
 
地運, 在不同的地方, 因應國家的條件, 地理的客觀環境, 人就有分別. 有些地方年年天災地震, 人命如草. 正如上例, 為何要擇那個同學屋企去打牌? 一個突然, 牌局終止. 為何不到你自己家打?
 
人運即是機會. 正如你摸入的牌, 好運者, 隻隻入章. 運差者, 摸餐死都未成局, 莫說叫糊, 不出沖已經好好.
  
所以, 一個人命好, 運不好, 都未必有糊食. 命不好, 但運好都可以有糊食, 當然是辛苦些, 舖牌都未必好大, 但總算有糊食.

當然, 一個人牌又好, 摸手又好, 人人都想, 但凡事點會咁理想. 摸唔到牌, 求上家或者三家打牌給你上或碰. 他們都是你的機會, 但亦是你的敵人. 正是危中有機, 機中有危. 正如一個人, 在機會來臨的時候, 你的取捨, 全在於你自己的決定. 你一定試過, 上了上家的牌之後就漏了好多牌給下家, 但你只會怨上家打隻牌來害你, 而從來不會問自己, 為何要上那隻牌. 機會的把握全都在你手中.

  
--------------------------------------------------------------------------------(待續)