新碟新突破 征服旋律賣感情 吳雨霏向女歌手獎進發
2011/11/28 08:43:20 網誌分類: 娛樂
| 由九變四，再由四變一，獨立發展後的吳雨霏（Kary）連名字也改了（原名吳家穎），今年更由舊公司轉投環球唱片，這九年間，我見證了她由蛹變成蝴蝶的蛻變過程，聽畢Kary的新碟《我本人》後，我只有一個感覺，證明當年我沒看錯人，蝴蝶愈飛愈遠了，正在向女歌手獎進發，很高興看到Kary有這個新開始及新發展，明年紅館再見。 主持：黃柏高 統籌：林永匡 協力：彭燕燕、廖思慧、陳辰 Kary的新碟很好聽，整張碟的曲風非常一致，散發了濃濃的時代女性味道，特別是主打作《我本人》，其溫柔的演繹令人聽得陶醉，難怪一推出便立即登上三個電台流行榜No.1位置。 「其實錄新碟只用咗兩個月時間，試過一星期錄五首歌，從來未試過。好鍾意呢隻碟，因為全碟嘅Message都好統一，好女性化，好代表到現今女生嘅心態，好似《我本人》就用林黛玉去跟呢代女仔作比較，以前嘅女仔好軟弱，但而家嘅會好獨立好堅強。另外我都好鍾意《歸宿》，係一首好溫暖嘅歌，希望藉住我嘅歌聲去祝願天下女生都能夠搵到幸福嘅愛情，雖然幸福得來不易，但跌跌碰碰過後必定會搵到。所以新碟好表現25歲嘅我，一個成長咗嘅Kary，因為呢類Topic都係我想講嘅嘢。」 新班底新Kary Kary在新碟的演繹明顯跟以往不同，皆因兩位監製EricKwok和AlvinLeong，以至其他班底，均屬首次合作，當中梁榮駿更是相當資深的音樂人。 「兩位監製各做5首歌，因為入咗行一段日子，所以兩位監製對我嘅要求已經唔只係技巧上嘅嘢，Eric執得好仔細，唔關音準時，係要有Feel，所以唔可以逐句錄，要成首咁唱。至於Alvin亦一樣，其實《我本人》唔難唱，但佢要我唱到個情緒出嚟，之前我有眼不識泰山，上網SearchAlvin嘅資料，先知佢好勁，之前做歌畀王菲同張國榮佢哋，難怪《我本人》嘅Demo本來好普通，但經佢一監之後即刻唔同晒。」 《未晚》靈感來自林憶蓮 一直知道Kary很喜歡林憶蓮，估不到她在新碟中也唱了一首好有90年代憶蓮感覺的《未晚》向偶像致敬。 「我真係好鍾意憶蓮，有日同監製講，希望佢做一隻有舊時Feel嘅歌，然後就出現咗《未晚》，旋律同編曲都好林憶蓮，加上周禮茂填詞，成件事嘅感覺好有味道，我好鍾意，所以啲人問我點解會有呢首歌嘅出現，我會話靈感嚟自憶蓮。」 再開Show出國語碟 雖然Kary只有25歲，但入行已9年的她目標好清晰，能夠知道自己想要甚麼的歌手不多，可以切實執行的更少，希望正邁向女歌手獎項的Kary繼續努力。 「希望出年能夠由年頭忙到年尾，雖然轉新公司日子尚短，但只用2個月就做到一隻我好滿意嘅碟係一個好好嘅開始。年頭開完個唱，但呢一年自己成長咗好多，目標更清晰，知道自己要做啲乜嘢，所以好想下年可以再開，另外當然係國語碟，除香港外，內地同台灣市場都好重要，我唔怕做得耐，只想做一隻好質素嘅國語碟。」 |
 | |
| |
 | |
| |
 | |
| |
 | |
 | |
 | |
回應 (0)
我要發表
