我很欣賞陳奐仁（Hanjin），一直希望跟他在音樂上合作，來自新加坡的他入行十年，憑着個人努力逐步而上，近年已成為香港炙手可熱的音樂創作人，明年2月24日，Hanjin將會首踏紅館開Show，而「十年仁事幾開心」是其演唱會的宣傳標語，的確，跟Hanjin做訪問或聽他的作品是會讓人豁然開朗，永遠的笑面迎人，難怪進軍電影及電視圈不久便成功入屋，「陳奐仁紅館演唱會」門票將於今日正式公開發售，想在現場感受Hanjin音樂魔力的讀者要快手了。
主持：黃柏高
統籌：林永匡
協力：廖思慧、袁東亮
01年，一首《愛是懷疑》令香港人更加認識陳奐仁，除了音樂，近年的Hanjin亦逐步入屋，先後參與電影及電視演出，今年更憑《李小龍》內奀仔一角，贏得電影金像獎最佳新人獎項，而在處境電視劇《結．分@方情式》中飾演的吳樂仁，讀者應該很熟悉，究竟Hanjin是如何開始進入音樂創作人的康莊大道？就由他親自解說。
「嗰時喺新加坡一邊返大學一邊在Pub唱歌，其間有經理人賞識叫我寫吓歌，然後，當年好出名的香港音樂監製區丁玉對我啲歌有興趣，最後仲揀咗我三首歌畀學友唱，之後經理人叫我寫多啲商業歌，我係咁寫，但寫多咗反而無人買，最後我放棄了，寫番自己鍾意嘅嘢，後來Eason唔只搵我寫歌，仲叫我做監製，做咗一隻國語碟《反正是我》，當時係01年，自此就多咗人搵我寫嘢，我又去過台灣做歌，但最後都留喺香港，因為香港人好開門見山，我鍾意香港人夠直接，要咩會直接講，喺香港做嘢好開心。」
快樂的十年
在紅館開Show是香港歌手的夢想，我做音樂30年，以往也會認為歌手要企在紅館的舞台上必定要有相當大的知名度及歌曲數量才可以，但時移勢易，像之前的側田或衞蘭，只出了一隻碟便能站在紅館的舞台，所以識寫識唱的Hanjin實在讓觀眾久等了。
「多謝Paco對我嘅支持，對紅館無話特別心願，因為一直覺得『有排啦』都無諗過，因為我又唔係多人識，又唔靚仔，歌又唔多，幾時輪到我吖，所以我好開心老闆對我嘅信任同支持，人生有幾多個十年？呢十年我好幸運，好多姿多采，所以我會將個Show同樣整到多姿多采，會有好多環節，由Rock到情歌再到Jazz、嘉賓環節、R&B、金曲等等，想唱50首歌，但我知超時會罰錢，哈哈哈。」
普度眾生的笑容
一直有個理念，希望有生之年可以見到廣東歌能夠再次發揚光大，好可惜，近年出色的創作人買少見少，因為唱片業太難做了，叻的人也不願投身樂壇，幸好，還有一個陳奐仁。
「好希望可以跟Paco一齊努力再次令廣東歌發揚光大，其實唱片業真係好難經營，因為唔食飯會死，但唔聽音樂未必咁快死。有人同我講過，我個奐字係燦爛咁解，出到街又有好多人同我講『你個樣好好笑，見到你好開心。』原來我嘅能力除咗音樂之外，仲有我嘅笑容，所以好希望由今次演唱會開始，睇吓可唔可以透過我嘅音樂演出去令別人每日開心多一分鐘。」
聽出真心真音樂
看過Hanjin唱Live，很欣賞其在台上的超強音樂感及魔力，明年的紅館Show，Hanjin更會落重本在音樂製作上，令觀眾能夠享受一個真正用耳去聽的演唱會。
「演唱會有三個舞台，兩隊Band，佢哋會互相鬥法，但樂手唔夠時間背譜好難做到比併嘅效果，但我好幸運，老闆願意用四倍價錢提早做綵排，好開心，所以聲一定要做到最好，唔好浪費所有人嘅心血。」 | 
