9~10/1/2012 收市現突破

9/1/2012 周一 恒指收報18865 升272點, 阿爺打救.中港股市單日轉向:

一般來說, 港股大多會在每個月10號前見頂, 但去年港股1月係19號才見頂, 可能係受基金重新部署影響, 有一月效應, 如果阿爺有救市政策出台, 港股可能會好似去年一樣, 玩多一個星期才見頂, 過去幾日大市有沽壓, 回落至18302急彈, 好明顯係有心人力撐, 所以識得拗腰上番黎, 今日好友突襲, 挾死淡友, 港股重上強弱關鍵位50天線, 確實唔簡單, 恒指如能突破超強阻力位100天線, 下一個目標係19300, 內地將於本周四 (1月12日) 公布上月宏觀經濟數據PPI, CPI, 下周一美國假期休市

今早美匯在高位81.5徘徊, 但在午後突然下滑, 直衝81關口, 港股當堂生猛番, 又升番去 3/1 紅盤收市位, 即係過去幾日既跌幅全面收復了, 有點睇頭, 過去幾日一直覺得港股有點怪怪的, 美匯飆升.歐元急挫, 人民幣連跌4天, 但港匯竟然走強, 港股亦咬住高位, 好似想破頂, 但係又欠缺催化劑推升, 結果由及時雨溫總出手, 中港股市才得以拗腰倒升, 我估呢幾日係有春江鴨收到風暗暗收貨, 所以令人有跌唔落的感覺

雖然溫總只係下達軍令, 未有實質新政策出台, 但已能提振市場信心, 久旱逢甘露啊! 我仍然相信一月會放水救企業, 有溫總撐市言論, 加上神華.中石化.聯通母公司都增持自己A股股份, 我估唔係巧合, 上周五新加坡黑期急升係有料到, 如內地股市觸底回升, 對港股有利好作用, 今個月港股波幅好窄, 仍未達標, 今日港股成交增加至$475億, 是過去三星期以來最大成交, 有點力水, 不過同時沽空亦大幅增加, 淡友都做緊部署

阿爺好.A股好.國企好.港股好, 內地股市急升有成交配合, 睇下升勢能否持續, 要內地股市續升, 港股才會有運行, 我地食粥食飯就要睇阿爺, 因為本周德國.法國.西班牙.意大利.希臘都拍債, 斷估賣得麻麻地, 歐美股市就會受壓

另外美國企業開始公布業績, 美國鋁業打頭炮, 在今晚美股收市後公布業績, 照計唔慌靚仔, 不過市場都預左鋁價下跌盈利會倒退, 假如老美炒下業績, 或可抗衡一些歐債既壞消息

2012年開波後, 港股成交逐步增加, 過去兩日都係尾市成交急增, 大鱷正在作出部署, 有望破頂而上:

9/1     半日224億/全日475億(升272點) ~ 受A股帶動.港股單日轉向.重上 50天線.再度挑戰 100天線

6/1     半日229億/全日437億(跌220點) ~ 港股再度失守50天線, 恒指10/20天線失而復得
5/1     半日189億/全日370億(升86點) ~ 反彈重上50天線
4/1     半日217億/全日425億(跌150點) ~ 回吐.一跌到尾.恒指/國指失守50天線
3/1     半日167億/全日326億(升443點) ~ 新年紅盤高開高收.一升到尾.重上50天線

記得當日恒指股災式下挫, 由23000一直碌落去18000, 跌幅驚人, 內銀跌到阿媽都唔認得, 大家都估阿爺會出手, 但係阿爺等到16170才出手, 同樣, 上証綜指2300~2400是公認的鐵底, 但外資撤離中國, 內地股市跌勢好急, 阿爺等到2132才出手

結論係阿爺要維穩, 但也不會蠢到伸手去接利刃, 要撐中港股市也要等到時機成熟才行動, 阿爺早晚會出手打救我地, 一定要有呢個信念, 太悲觀好難炒股票

10/1/2012 周二 恒指收報19004 升138點, 企100天線及萬九之上:

內銀強勢帶領港股破頂, 大行又轉口風唱好, 今次內銀起動真係望到我頸都長, 以往內銀走強港股都有運行, 今次港股一舉突破50/100天線, 連呢個阻力位都搞得掂, 好友已主導大市

要留意的是過去兩日港股尾市都抽高, 但今日尾市受壓升幅收窄, 另外港股突破100天線, 但港股溫度計港交所升唔起就有點古怪, 明日要睇恒指能否企穩萬九, 有冇力升穿19100, 國指強弱變化, 以及內地股市會否在2300關前作出回吐

內地股市觸底回升, 連升三天, 有成交配合, 同以往一彈即散好唔同, 加上有一月效應, 亦有利港股繼續尋頂, 而中國股市好轉亦可穩住全球股市, 美匯由高位回落, 投資者風險胃納上升, 對歐債壞消息的敏感度亦下降, 呢種市況短炒仍有可為, 恒指如能突破19300, 下一個阻力是去年11月10日的下跌裂口 19640~19967, 但要有兩手準備港股隨時會見頂, 見一步行一步啦!

X'mas rally 只得一日貨仔就無以為繼, 係因為基金經理收爐

New Year rally 作出大突破, 重上50/100天線, 因為基金經理歸位入市掃平貨, 為2012年重新作出部署, 港股成交正逐步回升, 屬好現像

過去三日內地股市成交急增:

6/1(上周五): A 股成交縮減至 393億元人民幣；深證成指成交縮減至375億元

9/1(本周一): A 股成交大增至 619億元人民幣；深證成指成交增至534億元

10/1(本周二): A 股成交增至 908億元人民幣，為六周新高；深證成指收報成交增至 786億元