黃柏高《高舉．愛》賺人熱淚 杜汶澤啞鈴寓人生 邱禮濤：江若琳可塑性高！
2012/03/05 08:41:55 網誌分類: 娛樂
| 請支持港產片！過去9年參與不同電影製作，體會到電影世界的奧妙，就像漩渦，讓人着迷，未來的日子，我將會繼續支持香港電影。云云導演中，我最欣賞邱禮濤導演，須知道，他每部電影製作都是盡心盡力的，那種熱血非筆墨能形容，即將上映的新作《高舉‧愛》勵志感人，在此預祝電影大賣！ 主持：黃柏高 統籌：林永匡 協力：彭燕燕、袁東亮 髮型：JamesLee@HAIR 化妝：諺瞳‧小白 服裝：ztampz（江若琳）、 icefire（杜汶澤） 說電影像漩渦，一點不誇，一但踏入這世界便難以抽離，着魔似地奉獻，青春玉女江若琳接拍邱禮濤導演的新作《高舉．愛》便被牽引着。 邱禮濤：「電影靈感來自08年奧運舉重比賽115公斤男子組冠軍，他的故事感動了我，這部戲未正式上，大約有100人睇過試片，反應不錯，決賽那場很有張力，大家會好關心主角會贏定輸，睇過預告片的會知道阿澤會死，那場戲很震憾，還有他教仔那場戲，都很感人。我自己一路拍一路都好緊張，阿Ling對住個墓自白那場，我直頭一嗌CUT就衝上車，知自己頂唔住，眼淚湧住出。」 為電影犧牲 演員拍戲要豁出去，不能有包袱，今天的江若琳做到了，為全情投入角色，主動增肥剪髮，務求讓觀眾把昔日的「江若琳」忘卻，實在用心良苦。 江若琳：「起初導演要我增肥，我就想要由外型開始，刻意增肥20磅，由100磅增至120磅，但真係好難，食好多都唔肥，亦主動把長髮剪短，希望視覺上有別以往。戲中我演的是舉重選手，因患有糖尿病被迫放棄夢想，走去幫人搬屋維生，後來遇上生意失敗又失婚的杜汶澤，大家一見鍾情，互相扶持下組織家庭，後來再得阿澤鼓勵重新追夢。」 杜汶澤：「其實都冇話犧牲，我由170磅減至142磅，先要知阿Ling好辛苦，我覺得對比上，要襯托出佢大隻啲，就只有我減肥，好多人覺得演員增肥減肥係好大犧牲，我覺得好正常，工作需要嘛，又或者咁講，對女仔的犧牲會比較大，女仔貪靚，肥咗咁多，短髮又無長髮咁好睇。」 導演激發潛能 勵志愛情片，找杜汶澤配江若琳，出奇地擦出火花，邱禮濤導演坦言，在他眼中，演員的可塑性很高，杜汶澤不一定演黑幫蠱惑仔。 邱禮濤：「非第一次跟這兩位演員合作，我覺得作為演員，以前有些演出方法或方向他們未試過，所以唔敢話有冇進步，好似阿澤咁，以往演的大部份搞笑或做黑幫江湖片，但其實作為一個演員還有很多可能性，阿Ling就比較新，根本仲有好多角色可以去試。」 阿澤讚阿Ling 常說娛樂圈是大染缸，沒錯，看你能跳進那個缸染出那種色澤了，杜汶澤笑言這次拍《高舉．愛》便看出江若琳的轉變。 江若琳：「對上一次合作是4年前，那時覺得阿澤個人好寸，可能是當時的角色需要，今次再合作，個心就好驚，你知佢講嘢幾叻，心諗，會唔會畀佢寸死呢，但今次可以話係完全無壓力，佢真係好照顧我，拍舉重戲導致肌肉拉傷，佢都會買鎮痛貼畀我。」 杜汶澤：「第一次見阿Ling覺得佢好似一個細路，仲係讀緊書那種，今日再見，嘩，幾年咋，娛樂圈可令人長大得咁快，我覺得Herman揀阿Ling真係好適合，雖然佢隻手好幼，斬雞都唔死，但舉重唔係靠牛力，係靠意志，我覺得阿Ling係一個好堅強的人，啞鈴重，但不及生活負擔重，生活擔子，真係要有咁上下經歷的人就會明白，所謂『拎得起放得低』固之然係叻，但『拎得起撐得住』先係勁！不過又講真，那時對比真係好大，拍阿Ling前我拍薛凱琪，日日見到薛凱琪真係好頂頸，佢成日窒我，阿Ling就好乖，同薛凱琪完全係180度兩個人，心諗，唉，好呀，終於唔使受女人氣。」 |
 | |
| |
 | |
| |
 | |
| |
 | |
 | |
|
多謝你的資訊及訊息 !