[ 驚蟄 ] 預示有大變
[ 驚蟄 ] 淡友去鵝頸橋打好友
5/3 恒指早市跌穿10天線 國指一舉跌穿10/20天線 中央棄「保八」震散港股
好準呀! 今日轉節氣, [ 驚蟄 ] 預示有大變, 真係乜野牛鬼蛇神都貢晒出黎, 獲利盤湧現, 恒指10天線插穿左, 睇20天線撐唔撐得住啦! 再落就係250天線, 今早港股技術指標進一步轉差, 多隻重磅大藍籌已跌破20天線, 預示恒指亦將會跌穿20天線, 反映市場風險胃納的澳元.金價亦碌落山, 中國呢個經濟火車頭竟然話經濟增長放緩係頭號利淡消息, 股市炒憧憬, 當美夢幻滅, 乜鬼都會反艇 (6/3 補充: 大鱷走鬼, 恒指20/250天線相繼跌穿, 下一站在20500, 終極支持位在50天線, 跌穿上唔番黎就大大鑊! )
上周已經話恒指10天線(21480)湧緊上擺明唔守得幾耐隨時會插穿, 上面21760(20/2高位)係疑似小雙頂, 兩線之間只得280點空間, 而且不斷收窄中, 所以今天好淡大鱷必定要分出勝負走出方向, 過去幾日美匯彈得好急, 由78.5飆左上79.43, 上周五油價.金價急挫, 通常金.油齊跌即係走鬼, 股市都唔掂, 歐元急挫, 港匯今天顯著轉弱, 顯示有資金流出本港, 大跌市見港匯轉弱就唔係幾對路, 有分析指港匯轉弱部份原因係 AIG 配股, 有企業買入美元參與配售活動
阿爺將今年中國 GDP 增長目標定為7.5%左右, 內地經濟放緩, 被逼放棄「保八」目標, 八年來首度低於8%, 嚇到亞太區股市腳仔軟, 澳元匯價亦由上周五的1.0791美元跌至1.0709美元, 預期經濟唔掂, 內銀.油股就拉住港股碌落山, 呵))) 一早話壽仔企唔到$24, 建行做左二阿哥跌幅就比中移大, 二當家位置唔係個個受得起咖!
~~~~~~~~~~~~~~~~~~~~~~~~~~
下試250天線的支持力
恒指成份股比重變動, 由今天 (5/3) 起, 建行升左做二當家, 中移跌落第三位, 相信建行會霸住沽空榜, 成為大鱷操控港股的棋子, 導致建行波動性增加, 周五建行上升只係受比重調動的買盤所推動, 係假象, 唔係真升, 我一直感到內銀有壓力, 相信係有人暗暗出緊貨
匯豐控股佔恒指比重 15.47% ==> 15.00%
建設銀行佔恒指比重 7.37% ==> 8.51%
中國移動佔恒指比重 7.61% ==> 7.52%
道指由 16/2 起升左上 12900 就一直唔肯番落黎, 足足企左兩星期喇! 真係強爆! 亦穩住全球市場氣氛, 但QE3冇左聲氣就一盤冷水淋醒投資者, 道指無法企穩萬三點, 港股上沖左兩個月, 已累積龐大升幅, 過去一周見權重股向上動力減弱, 油股亦唔跟油價升, 港股無法再向上突破就要做定防風措施, 有心理準備恒指會下試20900~21100, 其實一日未試250天線的支持力我仍然唔放心, 所以上周已減倉鎖定利潤, 趁回調逐步分注補貨
現時港股短線技術指標進一步轉淡, 上周跌唔落只係時辰未到, 油股受壓, 內銀近排總係升唔起, 高位有沽壓, 另外亦要小心高盛隨時會配售工行, 上周內地公布 PMI 及歐洲第二輪長期再融資操作都係炒定先, 又係好似減 RRR 一樣當公布好消息就出貨, 上周一淡友偷襲來勢洶洶, 今日又食過番尋味突襲, 真係一不離二, 淡友力量已轉強
~~~~~~~~~~~~~~~~~~~~~~~~
匯控因英國金融業改革令在當地註冊的成本大增, 又要支付改革費用及銀行徵稅, 夾夾埋埋就令匯控每年開支增加約28億美元, 歐智華指監管收緊將降低匯控估值280億美元, 相當於市值減少17%, 真係好大鑊, 匯控表示不排除未來集團會以香港作為總部的可能性, 11月會作出決定, 匯控份業績我真係唔收貨, 再加埋成本大增皆不利股價, 唱好的大行肯定係別有用心, 權重股匯控回落將會拖累港股市況
AIG 持有32.89%友邦, 今日停牌, 停牌前報$29.2, 將以每股$27.15-$27.5大手配售17億股套現約468億元, 持貨將會下降至18.79%, 嘩))) 怪不得沽貨食糊後仲見佢升到$30關口創新高啦! 原來係有心人刻意推高股價, 去年年尾人人估AIG會配股, 但係就一直冇聲氣, 早排 AIG 竟然吹風話增持, 點知轉頭今日就話大幅減持友邦, 真係大話精, 抽高股價再折讓配股, 奸到爆! 所以話呢股份急升必定有原因, 要有兩手準備
炒兩會即係憧憬有刺激經濟措施出台, 兩會關注的熱點離不開民生、內需消費、社會保障、農業、物價、新能源、房地產政策、保障房等議題, 除房地產會受壓外相關股份一般會熱炒, 不過最弊就係早前呢類股份已累積龐大升幅, 大鱷借勢出貨, 不過溫總今日表示中央增加對三農的投入, 受惠國策, 多隻農業相關股份例如中國綠色食品.亞洲果業.第一拖拉機今日仍能逆市造好
~~~~~~~~~~~~~~~~~~~~~~~~
歐美形勢
睇見歐洲就頭痕, 西班牙經濟下滑 , 失業率上升至接近 25%, 已連升7個月, 高達470萬人冇工做, 是歐盟成員國之中最高, 今年的預算赤字將佔國內生產總值 5.8%, 遠高於早前與歐盟協議的 4.4% 目標, 擺明係你打死我都係無法達到削減赤字目標, 歐盟要懲罰即管放馬過來
歐盟同呢班豬仔簽署加強財政紀律的契約只係空談, 希臘.西班牙同樣都係受困於死局之中, 逼佢地慳家, 唔准洗腳唔抹腳, 但大幅削減政府開支卻令經濟加快萎縮, 如果同債權人講掂數, 大幅削債超過7成, 以後就更難重返金融市場集資, 俾你搵過笨仲有第二次咩! 本周四就係希臘債權人自願削債74%談判死線, 債務轉換計劃會否告吹好快揭盅, 講唔掂數的話希臘就會違約, 呢d消息就益晒淡友
中國近期公布的出口訂單跌至47.4%, 是8個月以來最低, 歐洲經濟真係唔掂, 歐債問題係無法解決的絕症, 為免豬仔爆煲全球一鑊熟陷入經濟衰退, 只能用拖字訣
2011年第一季老美的經濟數據好靚仔, 但踏入第二季就開始走樣, 今年老美第一季數據又係好掂, 究竟係唔係受季節性因素影響呢? 所以要睇下四月會否歷史重演經濟轉差
>>>>>>>>>>>>>>>>>>>>>>>>>>>>>>>>>>>>>>>>>>>>>
三月份恒指波幅
三月份開波又要斷估, 唔使諗得太複雜, 簡簡單單以每月波幅來推算三月市況. 見步行步再作出修正
三月份恒指平均轉倉位在 21350, 以最少波幅1500點計
市底強勢的話, 向上1000, 向下500, 高低位就係20850~22350
市況轉弱的話, 向上500, 向下1000, 高低位就係20350~21850
大鱷走鬼向下炒2000點波幅的話, 向上500, 向下1500, 高低位就係19850~21850
恒指由 30/12 的18434 升至 29/2 的21680, 升幅3246點( + 17%), 過去兩個月港股已跑贏全球股市, 而去年 1/8 恒指係由22808開始大插插, 由去年低位亦彈左唔少, 高見21680已收復大部份失地, 艇左足足半年既蟹貨亦得以鬆綁, 沽盤湧現
三月份 港股唔會好似 一.二月 單邊向上咁好炒, 因為去年係跌過籠而家作出修正, 爆上21000已重上價值區, 現水位港股並不便宜, 所以今個月會係風高浪急, 假如我係基金經理, 手頭上股份已賺到開晒巷, 我就會拿拿臨沽貨鎖定利潤, 袋袋平安, 交條靚數俾客戶睇, 所以我估今個月港股會有獲利沽壓, 波動性會較大
恒指10天線已上移至21480, 20天線在21284, 要守住呢兩條平均線, 就必需要向上走, 才可避免插穿, 但由於21600~22000攔到實, 突破唔到就要向下, 恒指20天線/250天線及二萬一大位形成的支持區約在20900~21100, 跌穿左就要睇50天線
29/2 恒指收報21680, 首度企0.618倍黃金比率21620之上收市, 但權重股並未見有突破, 向上動力明顯不足, 另外當日成交只有$708億 (2月20日恒指爆上21760就有$705億), 但今次$708億成交當中有$110億係受尾市15分鐘MSCI變動影響, 上周港股再上沖其實成交並不配合, 已預示港股未夠力向上突圍
~~~~~~~~~~~~~~~~~~~~~~~~~~~~
內地股市
內地股市是港股升跌的關鍵, 但阿爺個場係神經刀, 政策市, 未必跟章法走, 技術指標不可盡信, 阿爺擺明係唔想內地股市半生不死, 所以就派高官唱好搞活股市, 但阿爺又唔鍾意細路玩得太癲, 人人炒股不務正業, 所以就會耐不耐壓住個場, 內地股市有人睇場跌極有個譜, 散戶最簡單既做法就係趁低吸納
A股連升7周, 為自2009年6月以來最長升市, 內地股市已確認見底
上証綜指上周五收報2460, 上周一曾高見2478, 其後受壓回落
內地數浪專家分析:
上証綜指2465是壓力點, 如受阻回落, 在2336獲支持冇問題, 跌穿就不妙
如能升穿2465壓力點就有運行
向上方面, 2661是關鍵位, 如能突破則確認新牛市誕生
2661是上証綜指去年1月的低位, 亦是180周均線
~~~~~~~~~~~~~~~~~~~~~~~~
全國政協十一屆五次會議3月3日（星期六）開幕, 3月13日（星期二）閉幕
十一屆全國人大第五次會議3月5日開幕（星期一），3月14日（星期三）閉幕
本周五 (9/3) 內地公布2月份通脹數據
港交所冇睇通勝擇錯日, 揀 [ 驚蟄 ] 來更改交易時段, 變左搞 [ 驚嚇 ], 以往內地股市下午比港股早半小時開波, 呢半小時內地股市的升跌就導致港股下午一開市就爆上或急挫, 但今日起中港股市午後會同步開市, 即港股亦會在下午一時開波, 以往有A股先行一步做升跌指標, 我就可於午市預先部署買賣價位, 但現在同步開市冇左指標對我來說就甚為不便
soho 及各位：早晨
soho, dai dai, 花姐, 史哥, 緣仁, 藍貓 及各大大 早晨!
Soho早晨,我真係服了你,我比你早入苦海,由於初期乜都唔識,而且97年好好炒於是賺了丁點利潤後就與股海深交了,窩輪牛熊都玩過,始終都輸番比佢,然後歸正途,炒實力股,然而很多直接形響股市的因素都是拜讀你的大作才較懂掌握,現在知道基金經理都係人,總有盲點不可信晒他們,其實買基金都唔見得實羸,自己的話,市況不佳收手唔買賣,擺係佢地度你要沽他們都跟你說這種產品是長線,但08年至今有很多都未到價,也許上班的可以買,因沒時間睇住,反正已退出工作就小注投放,驚死輸晒老本,我會擺定期,雖然息唔多,但是風險較少。
話說我帶入股場的朋友竟然股齡才三年左右,豪氣入十萬股瘦身站0.97,我唔
知她憑甚麼覺得此行業必賺,盈利好,終於苛包瘦了功效顯著,要瘦身一定要入
此站,日前她高位入了1157結果11.1溝貨昨日驚起來10.8沽了,結果高位
上到11.2,她氣結極呢,我覺得此人很不成熟,我唔返工不代表沒事做,
她想知道股價,每十分鐘給電話一次,為什麼不出股票機或問股票行,真係一種米養百樣人。花你時間睇廢料,哈哈!
soho真係天才,我99年開始炒,自問有地方不及你
無辦法,資質愚鈍也
Soho 唔洗五年就可完全掌握市場節奏？ 嘩…天才也。 勁！ 我O4年呀，不個07 .年先開始炒牛熊。
史哥, 你唔好再取笑我啦! 我睇圖係低B班, 呢D大屍真係笑屎人, 雷曼那年見港股跌到好平, 就正式開始買下股票, 之前偶爾要幫家人買股票, 所以開左個股票戶口, 自己就一年做一兩單買賣, 完全唔識睇市, 亦唔知股市搞乜, 對股市興趣不大, 我都係近呢幾年至明白股票係乜冬冬
花姐, 你蠱蠱惑惑, 歸功於我? 係唔係暗示 soho 係龜公? 我個老細放完大假下周回歸, 冇得搏懵密密炒喇!
bluepanda, 勝利証券的財經資訊好齊全, 一目了然, 凈係睇每段新聞的標題都已經有個慨念, 冇時間可以唔睇全文
友仁, 千祈唔好學我咁手痕就得喇!
緣仁, 今日見中移跌穿 $80, 我就諗你有冇掛牌呢?
賺到唔該俾五舊水會費
誠心感謝 soho、dai dai sir 及史哥等無私奉獻
soho ：我這三日都入咗少少貨 ，今日差 0.1 入唔到中銀香港，盈富基金就到價但排唔到，不過都入咗一注 941，如好彩明日還有得跌，我又入過，你寫的入市策略真係幫到我，只是我要時間慢慢改善，謝謝你
Soho 晚安 我越來越覺得妳有大師級的風範。 勁！ 其實妳在股海多少年呀？
SOHO我日日黎睇你份用心用血的分析報告,確實,又要上班又唔想我依d散戶輸到渣都冇,你既苦心我feel到架,你放心我如果在股海愈來愈少失利,都係歸功於你!
請用茶
7/3 周三恒指收報20627 跌178點 連跌3日 累計下跌934點 嚴重超賣 反彈有望
踏入2012年國指未試過連續四日比恒指弱, 明日港股有望作出反彈, 恒指由高位21760跌至今日低位20521, 累計下跌1239點, 但不少成份股跌幅溫和, 並未有跟隨大市急插, 低位有買盤承接, 亦顯示大鱷並非全面撤退, 沽盤已略為收斂, 只係個別股份遭洗倉, 或受獲利盤拖累急挫
道指由 16/2 起向上突破 12900 就一直唔肯番落黎, 尋日失驚無神急跌穿埋12800, 呢個位道指足足守左12日未穿過, 非常硬凈, 應有一定支持力, 睇下今晚能否企番上去, 我覺得尋日歐美股市係反應過敏, 今晚蘋果新 iPad 舉行發布會, 有利市場氣氛, 我估納斯達克指數會作出反彈
明天就係希臘債權人自願削債談判死線, 債務轉換計劃會否告吹呢? 拖拖拉拉, 乜呢班債權人仲有得揀咩? 算把啦! 粗粗地收貨啦! 我估可以過到骨, 傾得掂就有利市場氣氛, 歐元亦會回穩, 假如我係淡友就會暫時收手, 以免被好友挾番轉頭, 不過萬一講唔掂數的話希臘就會違約, 金融市場會俾乜野反應呢? 散戶應預先制定買賣策略
李稻葵發功唱好A股, 他表示今年投資內地股市必有收穫, 他指出今年內地股市正進行一系列改革, 股市改革首要是實行強制分紅, 即使股市波動也讓股東有分紅收入彌補, 內地居民如欲增加財產性收入, 就應把錢投入股市, 數下手指, 人行行長周小川.中證監主席郭樹清.人行貨幣政策委員會委員李稻葵, 已有三位高官相繼出黎唱好A股, 有乜啟示呢? 我認為內地股市係反覆向上格
在投資者毫無心理準備下, 溫總宣布棄「保八」確實嚇了市場一大跳, 港股就應聲倒下, 連跌三天, 市場需要時間消化壞消息, 但中國 GDP 增長目標定為7.5%亦殊不簡單, 不應過份悲觀, 我認為港股回落正是趁低吸納的大好良機, 我正陸續補回早前沽出的股份
本周五 (9/3) 內地公布2月份通脹數據, 發改委早前已放風話2月 CPI 按年升幅將回落至4%以下, 通脹回落已獲確認
興業銀行計畫配股集資, 意味著持有興業12.8%股權的恒生銀行無需供股, 加上下周一恒生銀行派股息 $1.9, 恒生逆市造好
ｄａｉｄａｉｓｉｒ，好像一個慈父一樣，得閒就溫馨提示我們，謝謝您
真係要向 soho 同 dai dai sir 學習!
soho:早晨!
你對大市的觸覺, 是我要好好學習的地方.
dai dai sir: 有好0野當然要同人分享啦....
7/3 港股早市低開低走
早市內地股市力守2400點, 美匯由高位回落, 港股跌幅略為收窄, 惟金融股沽壓沉重壓住大市
[ 恐慌指數 ] VIX 急升15.6%, 連升三天, 市場情緒吹淡風
壽仔業績差, 高層要打 pat pat, 近日多間企業傳配股消息, 市場亦傳聞壽仔會供股, 大行全面看淡, 並指壽仔有可能會減派息, 或會有管理層變動
中央一再強調樓市調控不會放鬆, 又傳擴大房產稅及上海樓市限購趨嚴令內房股反彈乏力
傳成品油調價期臨近, 或於本周四啟動, 石化雙雄逆市倒升支撐大市, 惟獨力難支
恒指量度跌幅首個目標為 20400, 再落20272及50天線絕不能有失, 今早低見 20521後暫時喘定, 恒指由三月高位21641累計下跌 1120點, 仍未達每月最低波幅, 相信港股跌勢應未完, 不過連日急跌港股嚴重超賣, 如作出反彈, 向上暫定目標20700及250天線20876
有散戶 cashin, 18兄, soho 買盤支持大市跌幅略為收窄, 惟少量買盤不足以扭轉港股跌勢, 今早恒指大裂口低開284點屠牛39隻後跌勢回順, 不過投資者入市態度審慎, 普遍觀望周四希臘換債談判結果, 另外澳洲第四季經濟按季僅增長0.4%, 巴西去年 GDP 增長大幅放緩至2.7%遜預期, 加深市場對經濟前景的憂慮
Soho,每天都看見你的文字真開心，簡直賞心悅目!謝謝!
我只係老散一名, 亂up一通, 見笑了!
cashin, 沽貨後見股價急跌好有滿足感, 證明這次走貨是辦對了, 賺了差價, 就算補貨後再跌都已心滿意足了, 我好手痕, 連 #2828 也游水, 見升穿 $117 就一路向上沽貨, 而家見佢碌落黎真係好開心, 我會趁今次回調慢慢補貨, 遇上大跌市我補貨既策略係分三級, 頭幾注買少少, 當跌到市場出現恐慌情緒時就買大注d, 當自己都好驚時就再買大注d
dai dai Sir, 我每天都會去府上一行, 網誌資料詳盡, 一目了然, 衷心感謝你的分享!
18兄, 當日急升換來今日急跌, 出得黎行預左要還, 任何時候都要做好防風措施, 作兩手準備, 是炒股的座右銘, 經歷過一次又一次的股災洗禮, 對跌市已經有點麻木了, 也學懂了如何面對, 算是經一事長一智, 冇白交學費
早前見屍捷.狗子爆上已對大市感到不安, 上周五見屎頭水霸王爆上更令我有戒心, 蛇虫鼠蟻都走晒出黎, 呢d就係地震前的凶兆
soho兄，呢兩日跌到咁，adr又跌到咁，真係好驚。彈都唔彈。不過我都係會驚之中買貨！
dai dai,
Soho的資料真係很詳盡,分析很細心,好多細節野,很有points及前瞻性,唔係一般坊間報章可比
soho,
我同你一樣,尋日一開市已快速減倉,仲搵埋熊仔倍我,現時我手上有足夠子彈, 見港股愈墮落我就愈快樂, 今日都開始分注補貨, 所以我既買賣策略係跟你架
Soho:您的資料很詳盡，分析很細心，很有points及前瞻性，bluepanda大力推介，dai dai已將您的blog放在我的最愛，每日必讀的好blog。感謝！感謝！
Soho 晚安 其實G20後通常反向走。 阿爺減速，上証30週又失守，看來上半年高位已現。 嘩！
淡友有冤報冤 有仇報仇 全日共41隻牛仔被屠宰 大鱷走鬼 港股跌勢未完
6/3 恒指收報20806 跌459點 失守250天線牛熊線 是近3個月來最大的跌幅
4j, 我甚少寫即市評論, 但係尋日朝早見唔對路特登出文就係想提醒大家走鬼, 上面網誌已作詳細分析, 港股技術走勢全面向淡, 今日跌勢好急, 恒指連250天線都撐唔住係極不尋常, 傳緊希臘換債出左問題, 所以全球股市暴瀉, 歐元.澳元急跌, 美匯急升, 資金避險, 憂慮希臘私人債權人的換債告吹係拖低股市元兇之一, 但呢班債權人係冇得揀, 我估會搞得掂
踏入3月份我係沽多多買少少, 策略係減倉, 因為我認為基金經理會食糊埋數, 冇左基金買盤, 港股就會失去向上動力, 昨日溫總講話係跌市催化劑, 中國確認經濟增長放緩係股市大忌, 憂慮需求減少資源商品價格例跌, 相關股份下挫就會拖低股市, 今日銅價就急跌, 反映市場風險胃納的澳洲持續下滑, 美匯亦衝向80關口
21/2 我話港交所單日無啦啦急挫逾7蚊見$138.8再急彈倒升收市係有暗湧, 令我覺得港股未跌只係大鱷未完成部署, 即係時辰未到, 今日港交所卒之現形, 今日低見$136.9跌穿21/2的低位, 印証上次急挫真係有古怪, 另外我一直強調內銀有壓力.油股唔跟油價升, 股價跌多多彈少少, 顯示高位有人出緊貨, 長實沽壓沉重亦係極不尋常, 所以我在上周同大家講我已止賺沽出恒指成份股壽仔.長實.和黃及恒地, 明知港股升唔上就會下試250天線, 呢d已累積龐大升幅既股份跌起上黎唔講得笑, 無理由唔做防風措施
上周三 (29/2) 恒指收報21680, 首度企0.618倍黃金比率21620之上收市, 但這次上沖成交不配合升勢, 動力不足, 已預示港股未夠力向上突圍, 當天我話投機的我有得執就拿拿臨食糊先, 就係要鎖定利潤, 我連中線倉既股份都沽貨游水, 現時我手上有大量子彈, 見港股愈墮落我就愈快樂, 會分注補貨, 所以我既買賣策略跟那些沒有減倉的散戶係完全唔同
高盛配售工行遲遲未能成事係因為冇投資者肯在高位接貨, 過去兩星期我不斷提醒大家高盛隨時會配股係因為消息不利股價, 有貨應要走, 我唔炒工行就係怕左高盛, 另外港股收市後壽仔發盈警, 話去年盈利料按年跌40-50%, 明天死得!
今日升跌股份比例亦不妙, 港股已連續兩日下跌股份大幅多過上升股份, 係今年展開升浪以來首度出現, 另外港股連續兩日急挫累計下跌756點, 連公用股都有沽壓, 顯示大鱷正沽貨撤退, 好明顯港股已轉勢向下
港股連續兩日急挫擺明係走鬼格, 睇勢頭仲未跌完, 因為每月波幅仍未達標, 加上仲有三個星期才結算, 冇誘因造上, 現階段向下炒先啦! 今日扣除友邦配股成交高達$804億, 是2月中以來最大成交, 沽壓沉重恒指收市輕易跌穿250天線, 未來兩日能否重上該位是關鍵, 下面50天線絕不能有失, 穿左就玩完, 國指方面較弱, 11000應該會好快跌穿
dai dai Sir, 本來諗住今晚計除凈等同期指低水多少, 幸好得到你的幫忙, 省卻我不少時間, 衷心感謝!
soho最新看法?
soho: 大約68.04點。
3月份除凈藍籌股: 匯控 0.14美元.新世界發展$0.1.信置$0.1.新鴻基地產$0.95.恒生銀行$1.9 .中電控股$0.96
點解周圍都冇人計除凈等同低水多少, 想偷懶都唔得, 唉! 又要自己計
究竟今個月除凈股份等同期指低水幾多點呢?
5/3 恒指收報21265 跌297點 恒指.國指雙雙一舉跌穿10/20天線 走鬼格
恒指自從13/2起未試過連跌兩天, 如明日續跌, 代表好友已放手, 明日能否重上20天線(21297)是關鍵
中國呢個經濟火車頭竟然話經濟增長放緩係頭號利淡消息, 資源商品.金融.地產將會反艇
今日港股成交只得$577億, 顯示跌勢未完
AIG 擬以每股27.15-27.5元配股, 最終以下限27.15元定價配售友邦 明日復牌
soho ：午安