PACO名人會
PACO名人會
PACO名人會

真功夫闖天下 有意開戲做導演 洪金寶:實戰一定要有!

2012/03/12 08:40:30 網誌分類: 生活
12 Mar
        大哥大洪金寶是我偶像,憑真功夫打出一片天,從香港到荷李活,縱橫影圈數十年,地位超然,04年合作《殺破狼》後,我一直部署開拍續集,今天終有眉目,即請大哥大擔任名人會嘉賓,促膝詳談,大哥大慨歎電影圈青黃不接,武星接拍電影機會大不如前,決定自家籌拍動作新片,提攜後輩,說到吾家有喜,大哥大直言恨抱孫,還豁然歡欣地分享跟家人的相處,這叫甚麼?這叫豪氣干雲。

        主持:黃柏高

        統籌:林永匡

        協力:彭燕燕、袁東亮、龍婉琪

        洪金寶醉心武術,大半生在電影圈度過,說到最新佳作《太極》鬧四胞,大哥大豁然自得,絕不怕貨比三家。

        洪金寶:「唔怕比較,第一,我雖不是太極宗師但會研究,第二,我們做娛樂只要贏得口碑,人哋要比較不關我事,我只能做好自己,人家拍什麼怎樣拍我唔知,最緊要盡力做好自己。」

        籌備開動作喜劇

        當年的《殺破狼》贏盡口碑,全因連場武打拳拳到肉,睇得人人熱血沸騰,大哥大一口答允合作,還雀躍告訴我他的電影大計。

        洪金寶:「自己好耐冇做導演,預計六月會開拍一部動作喜劇,都是老本行,有點幽默的,現頭痛劇本,真的很難,我想要一部能牽動觀眾情感的動作喜劇,實戰對打一定要有,特技只能豐富畫面,始終真功夫才好睇,拳來腳往,你一拳我一擋,係講唔到的,要行入戲院睇,想跟吳京合作,覺得他是時候上位,你知嘛,以前一話開戲,洪家班都夠齊人,至後來《五福星》、《富貴列車》注入明星參與,成件事又唔同了,所以動作喜劇以外,都想拍一部大堆頭的喜劇,只要班老友想玩都可以埋嚟,開開心心聚首一堂,這部預計明年開工。」

        做事認真撐到行

        說到電影圈,大哥大慨歎早已青黃不接,酷愛武術真功夫的他,早年在河北保定設立「洪金寶國際影視特技培訓基地」培訓動作新星。

        洪金寶:「說港產片式微真的好心痛,無辦法,太少機會給新人,唔通你叫班細路跟你練武撈武師?無可能,反而泰國、韓國仲有機會,因為他們可以來香港到內地發展,至於合拍片是政策,造就內地演員更吃香。自己最開心就係一路做落去,有咩快活得過在片場做指揮?二百幾人聽你一個肥佬喺度呱呱嘈?站在自己崗位上去拼,時而武術指導,時而導演、監製,我做事好認真,脾氣好大,成日忍唔住,那時拍《狄仁傑》零下十幾度,個個着潛水衣落水拍打,我忽然好谷氣,除晒衫褲『噗通』跳落水鬧『有冇搞錯?咁都唔得?』就做畀人睇,結果十幾人跳落水拉我上去,講真,到電影上,可能那part只係得幾秒。」

        大哥大恨抱孫

        大哥大好福氣,三子一女,天明、天祥、天照及煦榆皆食娛圈這行飯,一家人互相扶持,說到吾家有喜,新老爺笑逐顏開。

        洪金寶:「我跟天明講,老竇講你要聽,我不去衝不代表你不用衝,可以個個唔賣我帳,但你唔得,因為你未到咁嘅級數,未有本事。記得十幾年前講話邊個同我食飯畀五千,都冇人睬我,我認脾氣大,唔知班仔女怕唔怕我,但肯定我怕佢哋,怕佢哋唔睬我,你叫我這個『28歲』老人(現年60歲)點辦?現在大家各有各忙,得閒食飯,講真,我梗係想抱孫,但真係無所謂,快就快啲抱,遲就遲啲抱,呢啲睇細路仔,從來唔會迫,結婚都無得催,自由戀愛嘛,成熟咪結婚囉。我係坐唔定的人,愛四圍走,得閒會開車去東莞、廣州打波(高球),我太太(高麗虹)都算好大忍耐力,有時見我一埋位開工就起碼半年,睇住我捱,所以都唔出聲由得我放假去玩。」
■洪金寶打得,全人類都知,他健談有趣就未必人人知,「幾十年都係咁打出來,30年前老外成日講自動,我們都係自動,係自己去動。」
■洪金寶打得,全人類都知,他健談有趣就未必人人知,「幾十年都係咁打出來,30年前老外成日講自動,我們都係自動,係自己去動。」
■天不怕地不怕的洪金寶,原來最怕四名子女對他不理睬。
■天不怕地不怕的洪金寶,原來最怕四名子女對他不理睬。
■洪金寶與甄子丹在《葉問2》中,最強對最強。
■洪金寶與甄子丹在《葉問2》中,最強對最強。
■當年《殺破狼》贏盡口碑,洪金寶在戲中拳拳到肉,觀眾看得血脈沸騰。
■當年《殺破狼》贏盡口碑,洪金寶在戲中拳拳到肉,觀眾看得血脈沸騰。
回應 (0)
我要發表
user