尹飛燕

燕姐和輝哥合作拍嘅VCD,全都刨哂,輝哥係我偶像,無論去任何角色,只要有機會,就一定睇,由佢有声到無声(雖然一直唔好声),就算而家近似失声,佢技巧高,高音有時用假声去,有時用抖氣位就,一定能解决.冇声唱到佢咁,都係代表嘞.

記得燕姐以前在一套戲扮觀音,只是尾塲出一出,就唔見人,未紅就係咁.(好似是声哥套喜得銀河抱月歸.)正印花旦江雪鷺,全塲戲聽亞鷺姐唱,辛苦到死,拉牛上樹咁,同亞姐有得揮,有時有色,靓絕都冇用,裝身100分,開声冇咗99,就死得啦.佢一段小唱情,骨子有肉,就係咁,冇叫声哥回半張飛錢,(声哥梗唔駛回,俾突都制.)

今勻睇VCD,大鬧廣昌隆,百戰荣歸迎彩鳳,金釧龍鳳配.........等等,睇劇目覺得佢地想保留一D嘢,例如:佢師父的藝術風格,排塲,佢自己鐘意嘅嘢保留存下,又或生意經.在任白四大名劇橫行下,重有好多好劇本.

唉,可惜吖,拍住一D同自己風格,處理方法又不同,裝身着嘢完全唔劃一嘅劇團,牡丹雖好都要綠葉扶持,两個主角唔會飛,有哂符.

唱-燕姐声带疲累,唱高音噤住唱,有時唱對冲,花旦唔敢去高音-攞命,所有VCD全是錄音,冇舞台感,明顯用口形夾,冇發力-有時口白重差少少-冇癮.

做-燕姐輝哥強項,冇問題,裝身着嘢靚,香港老倌風範,做重好認真添.有嘢睇.尤其有塲燕姐和輝哥打,輸咗重要起身打,又揼脚又卒眼,照足鳳凰女做,真係懷念女姐.

舞台-舞台窄小,行兩步,就要停,輝哥燕姐想演下嘢,揮下水袖,碎步或卒步都唔得,容乜易碌落台.

燕姐,輝哥好心,揀两套對手戲錄低-搶傘,鳳閣,催裝,碧波仙子......等留為紀念,好過而家咁,累我成日要飛哂個班人,揾你地出塲,幾十年前係大會堂睇你地,實驗粤劇團好正嫁,另外你地做三看御妹,登樓個塲,冇人做得番輝哥扒低裝御妹咁活潑.想下辦法啦,唔該.