西樓錯夢夢成真(下)

西樓錯夢夢成空至真,情牽西樓数十載,幾個鐘頭真相大白,由幻像到影像,本來想草草了結,話睇咗算數,但要首尾呼應,上篇寫咁多,下篇都要咁上下,好,且聽慢慢道來......ｏ

第四塲-驚訊,大幕一開,紅紗幕掛堂前,係人都知,喜事盈門,池同欲聘素徽,素徽拒嫁,姐妹楚楚報叔夜死訊,如此這般,素徽騙池同下嫁,佢要廟堂拜祭,附薦亡魂,講完一輪,即係過塲交待劇情,冇佢唔得,有佢又一忽忽.如果硬要揾d嘢睇,就係彭生落幕前,玩幾下水袖花,笑哈哈,坐定粒六,以為素徽實嫁他.輕輕鬆鬆背塲落幕.

第五塲-壇劫,佈景大佛一尊,莊嚴肅穆,現塲氣勢定比看DVD好百倍,劇情當然係偷樑換柱,有大俠打救,用自己姬妾李代桃𦍑,刨嗲男女生角好似蝶影咁,同塲又碰唔到面,戲大紋大路,冇セ好講.

第六塲-會玉,生旦對手戲,激嬲佢,氹番佢,由誤會到諒解,就係咁.

第七塲-堂訊,騙父,諒解,嫁入門.講哂,乏善足陳.有時重有小小唔耐煩.

阮兆輝,廖國森,任冰兒,尤声普,各守其職,各盡其責,不搶戲.咁係好抑或唔好呢?只係一個老爺或俠士或歌妓或相國,認真嚴肅,波叔,靓次伯的釆,去了那裹?連第ン塲阮兆輝訓子,也都是戰戰惊惊,念哂對白入塲,我想要靓次伯做呀,仙姐.

花旦如果唔識用腰力,轉身或退後或入塲,身段好難優美,似條柴,洒水袖扎架,硬柴柴,會唔會正旦幇花腰肢過胖呢?(大胆忖測,胡言亂語,不知所謂,抱歉抱歉.)

學戲做手,有兩句,開要開哂,收要收哂.意指攤開雙手要開揚,合埋雙手要合埋哂,收腹挺胸.刨姐寒背勾胸,手攤不揚,收手不合,隨意瀟洒,生活化,冇刻意食鑼鼓,但又食正踩正鑼鼓,(參考壇劫出塲,會玉打馬上塲),師父話華光師父賞佢飯吃,你地咁多規條,代入公式,就嚟冇飯吃,可見理論同實際難配合,徒喚奈何.

其實全劇最令我心頭一震,就是謝幕那一刻,各大小演員面帶笑容,感覺佢地能參與演出,是一種驕傲,名牌效應,每個演員有自己的位置,沒有像:"齊歡暢,同慶賀."草草完塲收エ,就算係揾食,俾人尊重都係好感覺.仙姐或知重演有困難,所以出dvd,發揚任白藝術,保留戲宝,任門得亞刨,仙門得亞嗲,重揾邊個延續? 留下dvd好過,仙姐係醒嘅.