鄭伊健是我最好的酒腳朋友，為人率真，每次見面總會暢所欲言，在此要恭喜伊健8月紅館騷再加場，24日至27日舉行四場《LightandShadow》演唱會，再次兄弟班上陣，錢國偉任監製、朱祖兒做美指，還有音樂總監陳光榮，全屬頂班人馬，「今次有壓力，想給觀眾驚喜！」伊健笑言要努力操肌玩線條，嚴守戒條，但今晚適逢酒腳共聚，暫且放寬一下，舉杯痛飲。
主持：黃柏高
統籌：林永匡
協力：彭燕燕、袁東亮
Hair：JohnChung@BarbieriPrivata
Makeup：WillWong
服裝提供：visvim@I.T.
演唱會定必要花盡心思，讓人驚喜，鄭伊健的可塑性高，美指朱祖兒每次都玩得很盡，繼穿盔甲翹飛天後，這次玩光影，找來電影美指張世宏設計舞台。
鄭伊健：「上兩次的舞台電影感很重，亦正亦邪，今年會做回自己，跟觀眾拉近距離，主題『Lightandshadow』就好似天秤座的我有兩個性格，一個正一個反，光與影，光就做回自己最natural，另一方面繼續玩Darkside，重電玩。張世宏覺得鄭伊健需要改變一下身形，因為onstate的身形size唔同，感覺轉變好大，這個過程最辛苦，因為你不是要減肥咁簡單，找Michael幫手，話明我唔係要操大隻係操細隻，我都覺得好難，上次操肌為玩飛天，今次就跟個潮流玩slim，要瘦要有muscle。」
兄弟班上陣
宣佈開騷，監製錢國偉、音樂總監陳光榮、美指朱祖兒個個自動波埋位，伊健坦言度Rundown最頭痛，很多金曲都想演繹，奈何演唱會有時限。
鄭伊健：「過去兩次演唱會大家會投票揀出最Hit的歌去唱，但有些Hit歌因夾唔到個流程而被飛走，其中一首我好鍾意的，次次都話唔夾流程被飛，今次我堅決一定要唱，夾硬要肥仔幫我砌掂個rundown，嘉賓方面真係好難講，又要人唱你的歌，又要排又要跳，要度清楚先敢去拍門求幫手。幾經辛苦屈到陳光榮幫我寫演唱會主題曲《LightandShadow》，佢依家只做電影配樂，加上本身做廣告已賺到發達，唱片呢瓣基本上唔會做，但係無法啦，識着我，夾硬迫佢，講真，廣東金曲愈來愈少。」
為港女平反
電影，伊健有種解釋不了的親和力，觀眾喜歡在大銀幕上看到他，說到最近煞科的新作《我老公唔生性》，伊健忍不住為港女平反。
鄭伊健：「是延續十年前《我老婆唔夠秤》的，呢部戲我睇得複雜，上集講我這個英國留學生跟港女阿sa盲婚啞嫁下發生好多趣事，咁十年後呢？呢兩個人基本上有個gap，咁大家點相處呢？都相處咗十年啦，呢個時候加個中國女仔入去又會點呢？中國女仔讀書叻、英文叻好多嘢都perfect，個英國男仔就覺得港女好似唔夠內地女仔好，好挑戰性喎！我覺得個劇本幾得意，究竟點解我哋會鍾意港女呢？有咩原因？如果你係男人又會點揀呢？我研究咗好耐，係真喎，從來只有香港人話港女有問題，因為對得多嘛，你試下問外面人，你會聽到『我真係想識個香港女朋友！點解？咩都唔識淨係識玩！』但你要記住，可能這是優點，係咪先？例如你話台灣女仔溫柔，但當你成日見到，太溫柔喇，個個都一樣，突然有個好粗魯的，走埋嚟問『食唔食呀？唔食就算啦。』又或者『識唔識煮呀？唔識呀，外賣喇！』你又會好鍾意，咁又係喎。出面人從來唔會有人歧視港女，我覺得永遠都係自嘲，唔會有人講香港女仔唔好，只有香港人話香港女仔唔好。」
| 
谢谢!谢谢!